Bobur mirzo 1511-yil boshidayoq Zobuliston va Badaxshon lashkarini yig’ib, Movarounnahrga hujum qilib, Hamza va Mahdiy sulton boshliq shayboniylar qo’shini ustidan Xatlon viloyatidagi Vaxsh daryosi kechuvi bo’lgan Puli Sangin degan joyda g’alaba qiladi. Hisor sultonlari Ubaydullaxon va Temur sulton qo’shini bilan madadga yetib kelayotganini eshitsalarda, amalda ularni kutmay jangga kiradilar. Jangdan keyin Boburning buyrug’i bilan bu ikki aka-ukalar va Hamzaning o’g’li Mamoq sulton qatl qilinadi (yoki jang vaqtida halok bo’lishadi). Hamza va Mahdiy sultonlar bu vaqtda 50-60 yoshdan oshgan kishilar bo’lgan. Bu g’alabadan keyin Hisori Shodmon, Dehnav, Xatlon va Qunduz Boburning tasarrufiga kiradi. Boburning iltimosiga binoan Ismoilshoh unga qizilbosh qo’shinini yordamga yuboradi. Natijada, shayboniylar Turkistonga chekinishga majbur bo’lishgan.

@Davlatchilik_tarixi