VII juft (n. intermediofacialis) — oraliq-yuz nervi, bu nerv o‘z ichiga 2 ta nervni oladi:

1. n.facialis — yuz nervi, harakatlantiruvchi nerv bo‘lib, uning o‘zagi (nucleus motorius) ko‘prikning retikulyar formatsiyasida joylashgan.

2. n. intermedius – oraliq nerv, ba’zi chet el adabiyotlarida 13-juft kalla nervi deb yuritiladi.
Aralash nerv bo‘lib, parasimpatik va sezuvchi tolalariga ega.

a) nucleus solivatorius superior – yuqorigi so‘lak ajratuvchi o‘zak, parasimpatik sekretor o‘zak bo‘lib xizmat qiladi.

b) nucleus tractus solitarii – birlamchi yo‘l o‘zagi, sezuvchi ta’m bilish o‘zagi bo‘lib, IX va X juft bosh miya nervlari bilan umumiy hisoblanadi.

Bosh miya asosidan bu ikkala nerv ko‘prik va uzunchoq miya olivasi orasidan chiqib, ichki eshituv yo‘li (meatus acusticus internus) orqali chakka suyagining toshsimon qismi ichida joylashgan yuz nervi kanali (canalis facialis)ga kiradi.

Kanalda 3 qism tafovut qilinadi va bu nervlar kanalning barcha egriliklarini takrorlaydi:
➡️ nervlar chakka suyagi toshsimon qismi uzunligiga ko‘ndalang-gorizontal borib, oldinga va lateral tomonga yo‘naladi.
➡️ ular to‘g‘ri burchak ostida orqaga qaytadi, chakka suyagi toshsimon qismiga nisbatan gorizontal yo‘nalishadi.
➡️ nervlar nog‘ora bo‘shlig‘ining orqa devori sohasida ikkinchi marta qaytib, vertikal yo‘nalishga ega bo‘ladi va so‘rg‘ichsimon g‘orning (antrum mastoideum) oldidan o‘tib ketadi. Oraliq nerv yuz nervidan farqli ravishda kanalni ichida qoladi, yuz nervi esa foramen stylomastoideum'dan chiqib jag‘ orqa sohasiga o‘tadi. Kanal ichida yuz nervi bor yo‘g‘i 1 ta tarmoq - n.stapediusni beradi (shu nomli muskulga).

Keyinchalik yuz nervi quloq oldi bezida plexus parotydeus (quloq oldi chigali)ni hosil qiladi. Bu chigaldan chiqadigan 5 ta tarmoq yig‘indisi katta g‘oz panjasi (pes anserinus major) deyiladi.