Hurfikr.uz

Диплом можароси:  Истанбулдан Тошкентгача...

Истанбул шаҳар ҳокими Акром Имомўғлининг олий маълумотига оид дипломи можаролари мамлакатда йирик тартибсизликларга сабаб бўлди. Аммо бизнинг ўлкада сохта диплом,  олий таълимдаги жиноятларга кичик кўнгилсизлик деб қаралади.

Тармоқларда Республика Судьялар Олий кенгаши раиси ўринбосарининг синглисига тегишли экани айтилаётган сохта диплом тасвирлари пайдо бўлди.  Муаллифларга кўра,  опамиз дипломини йўқотган экан,  унинг дубликатини олиш чоғида оддий диплом имтиёзлига айланиб қолибди. Сизга айтаман:  бу ҳеч нима эмас,  нари борса ҳужжатни қалбакилаштириш ва ҳоказо.

Аммо бошқа соҳа ходимларига юридик дипломларнинг бериб юборилишига нима дейсиз?  Улар бирор куни прокурор бўлади,  судда ишлайди,  бевосита Сизнинг тақдирингизга оид масалаларни ҳал қилади. 

Бир неча йил аввал Тошкент Давлат юридик университети қишлоқ хўжалиги,  ирригация ва ҳатто зоотехника соҳасининг 40 га яқин бакалавр босқичини якунлаган талабаларни икки йил магистратурада ўқитиб,  юридик диплом бериб юборган. Ҳатто магистирлар орасида ўша пайтдаги ректор Канъязовнинг қизи ҳам бўлган,  бу жаноб жиноятлар ортидан кўтарилиб ҳам кетди.

Ўшанда Бош прокуратура Адлия вазирлигига тақдимнома киритгани,  бир қанча шахсларнинг жавобгарликка тортилганига қарамай асосий айбдорлар қутулиб қолган.  Университет жамоаси менга ҳозирги каби виртуал ҳужумлар уюштирган,  бу жиноятларнинг Ҳукумат қарори билан амалга оширилганини таъкидлаган.

Шунақа - бир мамлакатда сохта диплом йирик можарога айланади,  бошқа осмони мусаффо юртда коррупция Вазирлар Маҳкамаси қарори билан амалга оширилади.  Соҳа олимлари эса бундай кўнгилсизликларни муҳокама қилиш ўрнига одамларни судга бериб юради.

Абдураҳмон Ташанов

https://t.me/Hurfikruznews

Кеча Судялар олий кенгаши раҳбари Холмўмин Ёдгоров ЭффектУз сайтини танқидий мақола учун судга бериб, БҲМнинг 30 баравари миқдорида жаримага тортилди. Аввалроқ “Менинг юртим” телеканали мухбири Рухсора Ғофурова ўзи тайёрлаган репортаж учун маъмурий ишга жалб қилинганди.

Шу кунларда Инсон ҳуқуқлари “Эзгулик” жамияти раиси Абдураҳмон Ташанов ўзига нисбатан қилинаётган босимларга жавобан ёзган мақоласи учун Миробод туман судида жаво бермоқда. Блогер Отабек Бакиров устидан Истиқболли лойиҳалар миллий агентлиги томонидан шикоят киритилган. Жаҳонгир Тўлаганов иши судда, Зоҳид Жумаев иши судда, яқинларига кўра, бутун бошли тирик жон, блогер Зафаржон Жақинов шу кунларда таг-туги билан йўқолган, топилмаяпти. Журналист Анора Содиқова ўзига нисбатан давом этиб келаётган  ҳақорат, шантажлардан тўйиб, журналистлар киритилмаётган судлардан адолат излаб юрибди. Медиаси эса ёпилиш арафасида эмиш.

Бошқа нашрларда ҳам шунга ўхшаш ҳолат. Кузатинг, мамлакат ички ҳаётига оид таҳлилий, танқидий, ўткир мақолалар деярли тўхтаган, тополмайсиз. Таҳлиллар эса маиший, хавфсиз мавзулар ва асосан океанортидаги сиёсат таҳлилига қаратилмоқда. Бу масалада бироз ортга қайтиш, масалан, Россия ёки Хитой сиёсатига оид таҳлилларда ҳам ўта эҳтиёткорлик талаб қилинмоқда. Сабаби, бу мамлакатларга оид мақолаларга озгина эркин ёндашиш орқали ҳам бош (бошлар) кетиши мумкин.

Бу – бугунги ўзбек медиаси атрофида узоқ эмас, йил эмас, шу кунларда рўй бераётган воқеалар холос. (Балки, картинани ҳудудларда давом этаётган неча-неча судлар ва уларда қамалаётган журналист, блогерлар иши янада тўлдирар, ҳаммасини билмаймизку). Яъни, тан олишадими, йўқми, мамлакатда журналистика, блогосфера буткул ўлимтик аҳволга келтирилди. Аммо шу ўлимтик ҳолатида ҳам соҳалар кимларнидир қўрқитяпти шекилли, яқинда “Блогерлик фаолияти ҳақида” қонун қабул қилишармиш. Эшитишимча, унда блогерларни солиққа тортиш тартиблари ҳам белгиланади. (Кўнгиллари кимнидир жавобгарликка торттиришни истаб қолса, буям битта маъмурий ричаг-да. Ўзи ҳар қанақа оғир шароитга кириб боришдан аввал қонунчилик мустаҳкамланадику.)

8 йилдан бери айтиладиган ва неча-неча расмий чиқишларда ваъда берилган журналист фаолиятига аралашганлик учун жавобгарликни кўзда тутувчи ўзгартириш-чи, дейсизми? Шахсан мен яқин йилларда унинг қабул қилинишига ишонмайман. Ваъда бошқа, амал бошқа бўлиб тураркан, қабул қилингандаям нима ўзгарарди?!

Илёс Сафаров

https://t.me/Hurfikruznews

Истиқболли лойиҳалар миллий агентлиги танқидни "обрўсизлантириш" деб топиб, Бакироо устидан шикоят киритган!

Истиқболли лойиҳалар миллий агентлиги TEMU платформасининг тақиқланишига муносабат тарзида ёзилган "Қонунсиз суперрегулятор" постида агентликни обрўсизлантиришга уриниш бўлган деб топиб шикоят киритган.

Шикоятни Агентлик раҳбари биринчи ўринбосари В. Пак имзолаган. Шикоятга Агентлик ишончли вакилининг тушунтириш хати илова қилинган. Ариза ҳозирда пойтахт ИИБ Киберхавфсизлик бўлинмаси томонидан ўрганилмоқда.

Лекин шикоятда постларнинг фақат биттасига эътироз ва норозилик билдирилган, қолган постлар мазмуни ва мундарижасига, шунингдек, постлар ёзилишига асос бўлган сабабларга тўхталинмаган, дейди Бакироо.

https://t.me/Hurfikruznews

ЭҲ, ЁШЛИК, ЁШЛИК, БЕҚАДРУ БЕБАҚО ЁШЛИК!

➖ Ҳар қандай эътирофдан сукут яхшироқ, негаки, эътироф дегани албатта изоҳ талаб этади, сукут эса — чўнгроқ, маънолироқ, камтаринроқ.

➖ Гапнинг рости, тўғри гапни айтган одамга бориб, раҳмат, сиз тўғри гапни айтдингиз, деб табриклашнинг ўзиёқ кулгили туйилади.

➖ Эй, биродарлар, ўшал қаро кунларни ҳадеб эслайвериш керакми? Эҳтимол, эсда тутиш керакдир, лекин эслайвериш шарт эмас.

➖ Одамзот ўзининг зукколигини вақти-вақти билан англаб турса яхши-да, ахир!

➖ Боласи бўлгандан кейин отасининг тилини ўргансин-да.

➖ Ўйлаб қараса, сурбетлик ҳам ярим давлат.

➖ Мол-дунё топилади, лекин илм топилмайди.

Мурод Муҳаммад Дўстнинг "Лолазор" романидан олинган.

https://t.me/Hurfikruznews