Нигоҳингда яшар илоҳий белги,
Ўқдек қарашларинг дардимга ҳомий.
Табиат баҳори уч ойдир балки,
Сенинг кўзларингда баҳор давомий.

Яхши одамларни изланг дунёда,
Шу мақсад йўлида дунё кезингиз.
Топа олмасангиз уни мабодо,
Ўша яхши одам бўлинг ўзингиз!

Ёшинг чегарага тез кирган кунинг,
Ҳаммаси кеч бўлар эс кирган кунинг.
Дунё бозорининг қоидаси шул
Янгисин топурлар эскирган кунинг.