@SizdanTelegram© | Yangi O'zbekiston

“Мен – Шоҳсанам Абдулҳаева, Андижон вилояти Амир Темур шоҳкўчасидаги йўл ҳаракати хавфсизлиги бўлими ичида, давлатга қарашли ерда кичкина дўконча очиб, суғурта копия қилиб ишлаб келаман. Вилоят “ГАИ”да ишлаб пенсияга чиққан бир шахс менинг дўконимни олдириб, ўрнига ўз дўконини қўйдириб олди. Бундан ташқари, яна бир дўкон ҳам бор шу жойда.
Бир кун олдин менга “Дўконни оласиз, бу давлат ери, дўкон қўйиш мумкин эмас” дейишди. Керакли ҳужжатларни тайёрлаб берай, дўкон қолсин десам кўнишмади, дўконимни олиб ташлашди. Эртаси куни эса бояги дўкон қўйилди. Буни қандай тушуниш мумкин? Тартиб-қоида ҳаммага бирдек ишлаши керак эмасми?
Уй олганман, 17 йиллик кредитим бор. Ишламасам ким тўлайди?
Ҳозирда ёшларга давлатимиз тарафидан катта имкониятлар яратиб бериляпти. Мен каби ўз бандлигини таъминлаётган ёшларга ҳам шароит қилиняпти. Ҳужжатлар қилиш ва дўконимни сақлаб қолишда ҳурматли Юртбошимиз Шавкат Мирзиёевдан ёрдам сўрайман”.

“Тошкент тиббиёт академиясида тьютор вазифасида ишлаб келмоқдамиз. Ҳар бир тьюторга 200 га яқин талаба бириктирилган. Бизга 4 миллион сўм атрофида ойлик тўланади.
Жорий йилнинг бошида академияда ўтказилган йиғилишларда бош бухгалтер шифохонада даволанаётган пайтда бошқа бухгалтерлар ўзларига ҳеч қандай буйруқсиз мукофот пули чиқариб олгани муҳокама қилинган эди. Аммо ушбу бухгалтерлар ишдан кетмади. Ҳали ҳам ишламоқда.
Ректор, ректор ёрдамчиси, проректорлар, уларнинг ўрта маълумотли котибалари, режа-молия бўлими бошлиғи, бухгалтерлар, кадрлар бўлими ва юристлар ҳар ойда буйруқ чиқариб, ўзларига 10 (ўн) миллиондан 150 (бир юз эллик) миллион сўмгача мукофот пули ёзмоқда деб эшитдик.
Куни кеча ишга келган бухгалтер, юрист ва кадрлар бўлими ходимларига ҳам қўшимча устама ҳамда мукофот пули чиқарилади. Бироқ барча меҳнатни қилаётган бошқа бўлим ходимларига устамалар олиб ташланди.
Биз тьюторлар ҳам кечаси билан Тошкент шаҳрининг турли ҳудудларига бориб, ўз ёнимиздан йўлкира қилиб, ижарада яшовчи талабалар ҳолидан хабар оламиз, аммо бизга оддий устама ҳам тўланмаяпти.
Олий таълим вазири, Соғлиқни сақлаш вазири ва молиявий тафтишга масъул идора вакиллари Тошкент тиббиёт академиясига келиб, ҳолатни атрофлича ўрганса, адолатни ўрнатса, миннатдор бўлар эди”.

“Хоразм вилояти Янгибозор тумани ҳокими сабаб фермерларнинг косаси оқармаяпти. Мисол учун, фермерларнинг шолисини мажбуран оляпти, шоли бермаса 1 килосига 500 доллардан пул талаб қиляпти. Тумандаги 50 га яқин фермер шу ҳоким дастидан қийин аҳволда қоляпти. Прокурор ҳам тадбиркорларга ёрдам бериш ўрнига “боғчангни бузиб ташла, боғчанг керакмас”, деди.
Айтишларича, пахта бўйича қўшиб ёзиш ҳолатлари бор. Вилоят ҳокимиятининг бундан хабари борми?
Туманда ўтган йил катта миқдордаги шолини ҳоким еб юборди. Бу йил яна шу аҳвол кузатилмоқда. Фермерлар номидан ҳурматли Президентимиздан амалий кўмак сўраймиз”.

“Самарқанд вилояти Тойлоқ туманидаги 30-ИДУМдан ёзмоқдамиз. Директоримиз биз ўқитувчиларга босим ўтказиб, 2025 йил обунаси учун мажбуран маошимиздан 200 минг сўмдан нақд пул шаклида олиб қолди. Ҳолбуки, биз обуна учун розимиз деб ариза ёзмаганмиз. 5-синфдан 11-синфгача ўқувчилардан ҳам ҳар бир синфдан 250 минг сўмдан обуна учун йиғиб олди.
“Текширувчи келиб, мактабнинг 13 нафар ўқитувчининг 2023-2024 ўқув йили устама ҳужжатидан хато топди, текширувчига 200$ бердим, бир ойлик маош устамаcи миқдорида пул берасан” деб босим ўтказмоқда.
Директор ҳар бир ўқитувчидан туман касаба уюшмаси ва туман маърифатпарварлар уюшмаси учун маошимдан 1 фоиз миқдорида олиб қолишингизга розиман деган мазмунда ариза ҳам ёздириб олди. Мутасаддилар ҳолатга эътибор қаратишини сўраймиз”.

“Мен – Шерзод Жумабоев, 1992 йилда Тошкент шаҳрида туғилганман. “Зона”дан чиққанимга 3 ойдан ошди. Пробация хизмати август ойида моддий ёрдам учун қоғоз берди. Яшнобод тумани ҳокимлигига олиб бордим. Сентябрь охири, октябрь бошида оласиз дейишди. Аммо октябрь бошидан бери турли хил баҳоналар билан ёрдам пулини беришмаяпти. Ёрдам пулини тезроқ беришларини сўрайман”.

“Мен – Аҳадхон Машарипов, Наманган вилояти Косонсой тумани Боғишамол МФЙдан мурожаат йўллаяпман. Етти йил олдин М.Болтабоев деган шахсдан ер олганмиз. Ер эвазига у шахсга машина берганмиз. Бу шахс ҳужжатларни расмийлаштириб бераман деб бир неча йилдан бери алдаб келяпти. Кейин билсак, у битта ерни бир неча шахсга сотган экан. Ҳолат бўйича прокуратурага мурожаат қилдик, аммо натижа бўлмаяпти. Ҳурматли Президентимиз халқ қийналмай яшасин деб фармонлар чиқармоқда. Нега Косонсой тумани масъуллари биз каби жабрланганлар ҳуқуқини ҳимоя қилмаяпти?”

“Ўзбекистон Республикаси Б.Ф. ва Т.Х.Т.К.Р.М ходимлари номидан мурожаат йўлламоқдамиз. Бизга 2020 йил декабрь ойидан А. Қ. раҳбар бўлиб келгач, марказимизда тартиб-интизом йўқолди. Ходимларга қўпол муомала қилади, салгина ҳуқуқимизни ҳимоя қилмоқчи бўлсак, “ана дарвоза, бор чиқиб кетинглар” дейди. Давлатимиз катта маблағ сарфлаб, бемор болалар ёзда даволаниши учун барпо этган жойда ўз қизиқиши учун ҳайвонот боғи (зоопарк) ташкил қилган. Қушларга қараш учун алоҳида одам тайинланган. Бемор болалар ёзда иссиқ палатада ётганда раҳбаримиз қўйлари болалар учун мўлжалланган жойда сайр қилади. Бутун дунёда сув танқислиги ҳақида бонг урилаётган вақтда марказ ҳовлисида балиқлар учун ҳовуз қилдирган. Бу ҳовузга ичимлик сув кечаю кундуз оқиб туради. Ҳозирда яшил макон яратишга катта эътибор берилаётган бир вақтда марказ ҳудудида қўйхона қурилган. Қўйлар эса арча, оқ қайин ва бошқа дарахтларни еб, қуришига сабаб бўлмоқда. Ахир, бу ерда суяк сили билан касалланган беморлар бор-ку!
Шифохонада кўп йиллардан бери ишлаб нафақа ёшига етиб, имтиёзли нафақага чиқиш учун рухсат сўраган ходимларга ҳам рухсат бермаяпти.
Марказда таниш-билишчилик, яъни манфаатлар тўқнашувлар авж олган. Ўзининг ўгай ўғлини тиш шифокори қилиб ишга олган, лекин ишга келмасдан ойлик олади. Янги очилган реанимация бўлимига ҳам тоғасини ишга олган. Шу бўлимга шифокор Н. Н. ҳам ўз ўғлини ишга олган. Ишхонанинг ҳуқуқшуноси ҳам ишга келмайди, уни танимаймиз.
Ошхонада ҳам унинг таниши бош ошпаз. Навбатчи шифокорлар бир неча бор бемор болаларга берилаётган овқатлар ҳақида эътироз билдирган, лекин раҳбаримиз чора кўрмаган.
Айрим катта ҳамширалар ўзига тегишли бўлган ходимларга мукофот пули ёздиради. Аслида, катта ҳамшира олий маълумотли бўлиши керак, лекин биздаги катта ҳамшираларнинг дипломи йўқ. Катта хамширалар кечки навбатчилик соат 20:00 дан эрталабки 08:00 гача бўлса ҳам, ходимлар ўз вақтида уйига кетишига рухсат бермайди.
Марказда пуллик хизматлар очилган бўлиб, тушган маблағлар ҳам шубҳали тарзда ишлатилади. Бепул жарроҳлик амалиёти учун пул ундириш ҳолати ҳам кузатилган.
Юқорида кўрсатилган ҳолатларни ўрганишларини сўраймиз”.

“Жорий йил апрель ойларида мен ва ўғлим Телеграмдаги “Uzimiznikilar Polsha” деган гуруҳнинг офисига бордик. Улар виза, таклифнома каби масалалар билан шуғулланар экан. Қарийб 500 доллар тўладик. Лекин ҳалигача на бирор ҳужжат қилишди, на ўғлимни юборишди. “Uzimiznikilar Polsha” деган гуруҳнинг Телеграмдаги манзили: https://t.me/UZimiznikilarMB
Офис манзили ва телефони эса қуйидагича: Warszawa. Aleja Krakowska 127. +48 731 858 856.
Ҳолат бўйича амалий кўмак сўраймиз”.

“Навоий вилояти Хатирчи туманидаги Боғчакалон оилавий шифокорлик пунктидан мурожаат қилмоқдамиз. ОШПмиз қишки мавсумга тайёр эмас. Лекин ҳужжатда тайёр деб ўтказиб юборишган. Ҳозирги кунда ОШП ишчи-ходимларидан пул йиғиб ремонт қилишмоқчи. ТТБга мурожаат қилгандик, 1000000 сўм ёрдам қиламиз, қолгани ўз зиммаларингизда деган жавоб олдик. Мутасаддилардан амалий ёрдам сўраймиз”.