Globallashuv jarayoni davlatlar o‘rtasidagi o‘zaro uzviylikni yaqinlashtirib, ijtimoiy-iqtisodiy muammolarni harbiy xavfsizlik masalalari bilan uyg‘unlashtirib yubordi. Shu sababdan ichki va tashqi siyosiy masalalarni tizimli asosda mamlakat milliy manfaatlari negizida tadqiq etish, milliy manfaatlar artikulyatsiyasi hamda agregatsiyasini amalga oshirish davr taqozosiga aylandi.

Prezidentimiz bugungi kunga baho berar ekan: “Globallashuv jarayonlari yangi bosqichga ko‘tarilgan hozirgi davrda hatto eng rivojlangan va qudratli davlatlar ham chegara bilmas xavf-xatar va tahdidlarga yakka holda bardosh bera olmaydi. Shu choqqacha hech qachon sayyoramizda odamlar, xalqlar va davlatlarning kelajagi hamda taqdiri hozirgidek bir-biriga uzviy bog‘liq bo‘lmagan”, degan fikrlarni ilgari suradi.