​#taqriz

©Anif
📖"Oqdan qizilga"

Daydi shamolga havas qilgan
daraxtga oʻxshaymiz –
ildizimiz judayam chuqur.


Anifni yozuvchi, mahoratli tarjimon sifatida bilardim. Nazm yoʻnalishida yozgan ilk she'riy kitobini mutolaa qilishni boshlar ekanman, she'rlari ichida oʻz his-tuygʻularimni ham topgandek boʻldim. Nazm yoʻnalishidagi sevimli shoiralarim soni bittaga koʻpaydi. Kitob bir nafasda oʻqib tugatiladi.

She'rlarining har biri oʻzgacha. Mavzulari esa dolzarbdir. Jamiyatdagi minglab ayollar kechinmasini ham ifodalaydi. Ayollarning hayoti, ularning taqdirlari achchiq haqiqat tarzida yozilgan. Erk, sogʻinch, hechsizlik, ayol, yolgʻizlik va oʻz-oʻzini anglashga intilish kabi mavzular jam boʻlgan.

"Dagʻal qoʻllar", "Ketish", "Bolam", kabi she'rlarida mahorat bilan tanlab keltirgan soʻzlari kitobxonni oʻziga bogʻlab qoʻyadi. "Missiya" she'rida esa insonning yaratilishi, umr boʻyi oʻziga berib keladigan savollari haqida jamlangan boʻlib, oʻylashga majbur qiladi. Anifdan nazm yoʻnalishida ham yangi kutib qolaman. Bu kitob mutolaasini esa barchaga tavsiya qilaman.

Insonni bir o‘zini qoldirmang
hech yo‘q biror kitob 
yoki bir finjon qahva
balkim tuvakdagi gul 
ehtimol dastro‘mol bilan  
qoldirmoq darkor

hech nimasiz tashlab ketmang uni
maktub yozib qoldiring
yillarki asrab yurishi uchun
kalit tashlab keting
qachondir eshigingizni topib borar
garchi bilmasada manzilingizni

insonni oxir oqibat tark etarkansiz
hech vaqosiz qoldirmang uni
salgina umid
biroz hamdardlik
ko‘zlarida lipillagan nur qoldiring
yuragida sog‘inch qoldiring
bo‘m bo‘sh qoldirmang sira
loqayd qoldirmang
hissiz ketmang
izsiz ketmang
o‘zingizdan biror nishon qoldiring unga

olgan mehringiz
sizga bergan sevgisi haqqi
nimadir qoldiring 
yo‘qsilga aylantirmang uni
mavjudligingizni bildiring
axir hamma narsani kechirish mumkin
biroq yo‘qlikni emas
ketsangiz ham bor  bo‘ling unga 
bir zarrangizni qoldiring

unutilish o‘lmoq demakdir
siz o‘lmang - 
eslab jilmayishi uchun
bir xotira qoldiring.

Qahvali mutolaa