ДАРВИШЛАР
(Тарих)

Ҳақ деб кирар йўлларга,
Макони йўқ дарвишлар.
Ҳақдан ўзга сўзларга
Забони йўқ дарвишлар.

Гарчанд ранги сўлғундир,
Муҳаббатга тўлғундир,
Ичи ишқдан гулгундир
Исёни йўқ дарвишлар.

Севар кичик-катта ҳам,
Тани ёнмас ўтда ҳам,
Ичларида битта ҳам
Ёмони йўқ дарвишлар.

Дили соф, юзи нурли,
Ҳақдан огоҳ, шуъурли,
Қалби озод, сурурли,
Армони йўқ дарвишлар.

Маъсиятдан қочгувчи,
Бағрин нурга очгувчи,
Ўзидан нур сочгувчи,
Зулмони йўқ дарвишлар.

Жудо бўлмас аслидан,
Умид этар васлидан,
Ҳеч бир одам наслидан
Гумони йўқ дарвишлар.

Улар ким? – деб кулинар,
Мирзо бағри тилинар,
Маҳшар куни билинар
Ёлғони йўқ дарвишлар...

2002 й

Мирзо КЕНЖАБЕК


@m_kenjabek
┈┈• ❀ 🌷☘️🌷 ❀ •┈┈•