****

БЕРКИНИШ

Мени ҳам соғинган бирон зот борми?
Дунёда ҳижрондек истибдод борми?
Сизиб гул юзиндан умрим ўтарми? –
Тиниқ кўз ёшингга беркингим келди.

Учаман, юксакроқ чорлар самолар,
Тубанга тортолмас мени иғволар.
Ғаюр ғийбатчилар, шум бенаволар,
Бас! Само тўшингга беркингим келди.

Ерда на зўрим бор менинг, на зарим,
Қуллик не? Зулм не? Узлатим, қаърим –
Ҳақ йўл иморати – Қуръони карим,
Шаффоф оғушингга беркингим келди.

Дўстлардан юз бурдим, эркдан беркиндим,
Чангидим, тилсимот сочига индим,
Ёмон парчаландим, мен ёмон синдим –
Бир шафиқ очунга беркингим келди.

Сиз мени на шовқин-ғавғодан изланг,
На исён, на шеър, на дунёдан изланг,
Ёронлар, Мирзони Мирзодан изланг,
Ўз ичу тошимга беркингим келди!

1990 й


Мирзо КЕНЖАБЕК



@m_kenjabek
┈┈• ❀ 🌷☘️🌷 ❀ •┈┈•