ILOJI BORMI?

Seni bir ko‘rmoqning iloji bormi,
Menga yuz burmoqning iloji bormi?
Xushingda ko‘rmasam, hech bo‘lmaganda
Tushingga kirmoqning iloji bormi?

Sevgining mehri — dard, qahri zahmatdir,
Bu dardning darmoni sabri-toqatdir,
Sen bilan dunyo bir istirohatdir,
Yoningda yurmoqning iloji bormi?

Qarshilar bo‘lmasa yo betaraflar,
Muhabbatga aytib shonu sharaflar,
Ikkimiz sayr qilib hindu arablar,
Yurtiga bormoqning iloji bormi?

Sen bog‘larni olgin, cho‘lni menga ber,
Oppoq qorlar senga, do‘lni menga ber,
Uzuk taqib qo‘yay, qo‘lni menga ber,
Hov anov barmoqni, iloji bormi?

Olislarga uchar hayol kaptarim,
Yerda qoldirmasang agar gaplarim,
Dengiz ko‘zlaringga qo‘yib lablarim,
Bir hayol surmoqning iloji bormi?

G'ayrat Sheraliyev

@legistuz