Armon

Kitob o‘qisa-da,
Kino ko‘rsa-da,
"Chiroyli" so‘zlashni bilmadi enam.
Gap ochilsa urush va ukasidan,
Bir-ikki oygacha kulmadi enam.
So‘rabman:
"Amakim jo‘nagan payti
Qandoq qasam ichgan,
Qandoq so‘z aytgan?"
-Hech narsa demagan
Faqat fashistni
Bir yomon so‘kkanu...
Qizarib ketgan.
Jim qolaveribman qarab ortidan,
Diydoriga to‘ysam bo‘lar ekan-ku?
Ilk bora uyatli so‘kinganidan
Yuzimga qarolmay ketgan edi u...

✍️ A’zam O‘ktam