Улғайган сари, ранжиган пайтларда, болалик кезларига қайтар экансан.

Баъзида, хаёлларинг капалакдек кўз олдингда пайдо бўлиб, юзингда ширин табассум уйғотади. Шу хотираларга суяниб, чуқур ҳўрсиниб, яна ҳаётингни давом эттирасан.

Менда шундай ҳолатлар кўп бўлади.

Дадамнинг ҳаёт бўлган кунлари, Аямнинг ёш бўлган пайтлари… Дадамни ишдан кутишимиз, эшик “звоногини” бир хил тарзда чалишлари, “Дадам келди...” деб югуриб эшик очишимиз, оила даврасида безатилган стол атрофида бирга овқатланишимиз, ўйин-кулгу, маош олган кунда дадамнинг ўйинчоқлар олиб келиши, ота-оналар мажлисидан дадам билан бирга мазза қилиб гаплашиб қайтишимиз, кечаси билан тинмайдиган ёзув машинкасининг тиққиллайдиган товуши, хонада ота-онамизнинг бир-бирлари билан мароқли суҳбати, таътилда бирга Ўшга боришимиз — ҳуллас, шунга ўхшаган бирам ширин дамларни кўп эслаймиз.

Оғриган қалбларга малҳам бўладиган ҳам болаликдаги ширин хотиралар бўлар экан аслида. Ширин хотираларимиз учун ҳам уларга ҳурматимиз чексиз.

Бугун, дадажоним Шавкат Раҳмон ҳаёт бўлганларида, катта дастурхон атрофида 74 ёшларини нишонлаган бўлар эдик.

Жойлари жаннатда бўлсин.

(Расмлар сунъий интеллект ёрдамида жонлантирилган)

✈️ https://t.me/kamolashavkatovna