Nigina's blog

Shaxsan oʻzim kimyodan milliy sertifikatga tayyorlanishda har narsa qilib koʻrganman. Hozir maktabdagi tayyorlanish jarayonini tasvirlab beraman. Soat taxminan 3 yoki 3 yarim. Timer'ni 2 soatga qoʻydik va test yechishni boshladik. Osilganga yarasha baland dorga osilish kerak deb, toʻgʻridan toʻgʻri Asilbek domla bilan raqobat qilardim. Ishlayapman va menda birorta masala chiqmay qoldi yoki ishlagim kelmayapti. Shunda "maraz odamcha"m keladi-da, aytadi: Domlang sendan oʻtib ketib qolsinmi? Va men bu gapdan keyin testni ishlashda maksimal darajada imkoniyatimdan foydalanaman. Vaqt tugadi. Testni tekshirish boshlandi. Men shu test jarayonida faqat domladan oʻtib ketishni maqsad qilganman, xolos. Va lekin biror marta natijam Asilbek domlanikidan baland chiqmagan. "Maraz odamcha"ga meni asablarimni yeb olishi uchun maktab darvozasiga yetguncha vaqt berardim. Undan keyin negativ fikrlarni yigʻishtirib uyimga ketardim. Uyda ham bitta variant yechardim, lekin endi raqobat qilgani Asilbek domla yoʻq. Raqobatlashgani yagona tanlov - oʻzim. Bugungi natijam kechagidan yaxshi chiqdimi? Ha. Demak, oʻsish boʻlyapti. Maktabda ishlaganimizda oʻsish boʻlish boʻlmasligi bilan ishim yoʻq, faqat domladan oʻtib ketsam boʻldi derdim. Va maksimal darajada harakat qilardim. Uyimda ishlaganimda oʻsish boʻlish boʻlmaganini tahlil qilib, bunga ham yaxshigina harakat qilib test ishlardim. Nega kechagi Nigina bugungisidan yaxshiroq boʻlishi kerak axir?

* Mana raqobatni plyus va minus taraflari. Bu atmosferani biz bilan birga imtihonga tayyorlanganlar juda yaxshi bilishadi.

+ Menda bor ichiqoralik. Va buni faqatgina oʻzimni rivojlantirish uchun ishlataman. Boshqa maqsadlarda emas.

#thinkAboutIt

O‘zini boshqalar bilan solishtirish ikki tomonlama taʼsirga ega bo‘lishi mumkin. Raqobat o‘z-o‘zini rivojlantirishga, harakat qilishga va yuksalishga turtki bo‘ladi. Biroq bu jarayon samarali yoki zararli bo‘lishi o‘zingizning yondashuvingizga bog‘liq.

Yaxshiroq natijalarga erishgan kishilarni ko‘rib, ularga yetishish istagi paydo bo‘ladi. Bu o‘z-o‘zini rivojlantirishga yordam beradi. O‘z maqsadlaringizga erishish uchun qaysi jihatlarda o‘zingizni yaxshilash kerakligini bilib olasiz. Sog‘lom raqobat shaxsiy o‘sishga va ko‘nikmalarni rivojlantirishga yordam beradi.

Qachon samarasiz bo‘ladi? O‘zingizni doimiy ravishda boshqalar bilan qiyoslash o‘z qadr-qimmatingizni pasaytirishi va o‘z-o‘ziga ishonchsizlikka olib kelishi mumkin. O‘z imkoniyatlaringiz va sharoitingizni e’tiborsiz qoldirib, boshqalar bilan qiyoslash sizni noto‘g‘ri yo‘nalishga olib borishi mumkin. Agar siz atrofingizdagilardan ustun bo‘lsangiz, shunchaki yetarli deb hisoblab, rivojlanishni to‘xtatishingiz mumkin.

Tasavvur qiling, guruhda 15 nafar oʻquvchi bor va siz ulardan eng yaxshisisiz. O‘zingizni faqat bir guruhdagi o‘quvchilar bilan cheklab solishtirish va "eng yaxshi" degan holatda qolish rivojlanishni sekinlashtirishi mumkin. Bunday vaziyatda o‘zingizni avvalgi natijalaringiz bilan solishtirish va yuksalishni davom ettirish muhim. Chunki bu dunyoda har doim sizdan yuqoriroq bo‘lgan kishi topiladi, va siz o‘zingizni shu global raqobatda ko‘rib, motivatsiyani saqlab qolishingiz kerak.

O‘zini boshqalar bilan solishtirish foydali bo‘lishi mumkin, lekin bu jarayonni sog‘lom me’yorda olib borish va asosiy raqobatni o‘zingiz bilan qilish eng yaxshi strategiyadir.

@Kamiljanovas_blog

2 kun avval shu postga izoh yozmoqchi edim. Esimdan chiqib qolibdi.

📌 Men tan olaman:

– Hamma kitoblarni hidini yoqtiraman. Eskisini ham, yangisini ham oʻzgacha hidi bor.
– Kitob o‘g‘irlamaganman.
– Nimadir yeb kitob o‘qiy olmayman. Sogʻlom turmush tarziga toʻgʻri kelmaydi.
– Istalgan narsani xatcho‘p qilib ishlataveraman.
– Kitob olaman deb hech qachon tushlik pullarimni tejamaganman.
– Kimlarnidir  menga kitob sovg‘a qilishga majburlaganman
– Kitob sovg‘a qilishni emas, sovg‘aga olishni yaxshi ko‘raman.
– Kitob haqida suhbatlashishni sevaman.
– Detektiv asarlar shaydosiman.
– Shovqin bo‘lsa  kitob o‘qiy olmayman.
– To‘yga borishdan ko‘ra uyda tinchgina kitob o‘qishni ma’qul ko‘raman.
– Zamonaviy turk adabiyotini va motivatsion, psixologik kitoblarni yoqtirmayman.
– Kitoblarni chiroyli rasmga olishni sevaman.
– Pdf kitoblar oʻqimay qoʻyganman. .
– Doim o‘zim bilan kitob olib yuraman.
– Kitoblar asosida ishlangan kinolarni sevaman.

Siz ham o’zingiznikini yozib qoldiring, kanalingiz bo’lsa challenge'ni davom ettiring! Xohlasangiz shaxsiy odatlaringizni ham qo’shib yozing!

@Kamiljanovas_blog 🩵

#

Happy New Year 🥳🎊

2024-yil sarhisobi

1. 26-mayda boʻlib oʻtgan kimyo fanidan milliy sertifikat imtihonida A darajani (65.9 ball) qoʻlga kiritdim. Va maktab rekordini qoʻydim. (9-sinfda 💯 % li sertifikat olgan oʻquvchi)

2. Asosiy fan olimpiadasining II bosqichida kimyo fanidan 1-oʻrinni, III bosqichida 3-oʻrinni egalladim.

3. Umumiy 10 dona kitob oʻqidim. Juda kam. Bu yil koʻp kitob oldim ham sotib oldim. Lekin oʻqishga vaqtim boʻlmayapti.

4. Oʻquvchilarga dars berishda davom etyapman. Aytishlaricha, mendan yaxshi oʻqituvchi chiqarkan va ayrim ustozlardan yaxshiroq dars oʻtarkanman. (Bu gaplarni xalq orasidan eshitganman)