Жума Муборак

Бароат кечаси

Бароат кечасида Аллоҳ таоло томонидан бир нидо қилувчи нидо қилиб: “Бирор мағфират сўровчи борми уни мағфират қилсам? Бирор сўровчи борми унга сўраганини берсам? Бирор ризқ сўрагувчи борми унга ризқ берсам? Бирор мусибатга гирифтор бўлган борми ундан мусибатни аритсам?” дейди.

Бундай нидо ҳадислардан маълум бўлишича, Аллоҳ таоло томонидан ҳар кечада бўлади. Лекин, бароат кечаси билан умумий кечаларда Аллоҳ таоло томонидан бўладиган нидонинг фарқи шуки, умумий кечаларда кечанинг учдан бирининг охирида бўлади. Бароат кечасида эса, қуёш ботишидан нидо бошланади.

Бизлар бу кечани ғанимат билиб, Аллоҳ таолодан гуноҳларимизни мағфират қилишини сўрашимиз ва Аллоҳ таоло ҳузурига жоиз ҳожатларимизни тақдим қилишимиз ҳамда ҳалол ризқ сўраб, мусибат, ташвишларимизни аритишини дуо қилиб сўрашимиз лозим.
У кечада қандай улкан фазилат ва саодат бор, бизнинг Мавлоимиз Аллоҳ таоло: “Сўранглар! Сўраганларингизни беришга тайёрман” дейди.

Бароат кечасини Набий соллаллоҳу алайҳи васаллам бедор ўтказиб, бошқаларни ҳам бедор ўтказишга ҳукм қилиб, бароат кечасини бедор ўтказиш фазилатлидир деганлар.

Расулуллоҳ соллаллоҳу алайҳи васаллам:
“Бешта кечани ким тирилтир(бедор ўтказ)са, жаннат унга вожиб бўлади. (Улар:) тарвия, арафа, қурбонлик, фитр ва шаъбоннинг ўн бешинчи кечалари”.

Ушбу беш кечани ким тирилтирса, унга жаннат вожиб бўлади. Улар:
1. Саккизинчи зул ҳижжа кечаси;
2. Тўққизинчи зул ҳижжа кечаси;
3. Қурбон ҳайит кечаси;
4. Рамазон ҳайит кечаси;
5. Шаъбоннинг ўн бешинчи кечаси.

Шунинг учун фақиҳлар бароат кечасини ибодат билан бедор ўтказишни мустаҳаб амаллардан санаганлар.

Муфтий Муҳаммад Шафеъ раҳматуллоҳи алайҳ: “Юқоридаги ҳадислардан бу кечанинг фазилатлари маълум бўлганидек, мусулмонларга бу кечада қуйидаги амалларни қилиш суннат эканлиги маълум бўлади:
1. Кечасини бедор ўтказиб, намоз ва зикр тиловатга машғул бўлиш;
2. Аллоҳ таолодан мағфират, оқибати хайр ва ўзининг дунёю охиратдаги мақсадларини ҳосил бўлишини дуо қилиб сўраши” Муфтий Муҳаммад Шафиъ. Фазоилу ва аҳком шаби бароат. – Б. 8.

Аҳли сунна вал жамоа улуғлари бу кечада бедор бўлиб ибодат қилиб чиқишни ўзларига одат қилганлар.

Бароат кечасини қандай бедор ўтказилади?

Ҳасан ибн Аммор ибн Али аш-Шурунбулоли ҳанафий (ваф. 1069) раҳматуллоҳи алайҳ:
“Кечасида қоим бўлишнинг маъноси кечанинг аксар қисмида ибодат билан, бир қавлда эса кечадан андак бир вақтда Қуръон, ҳадис ўқиш ёки уларни эшитиш ёки тасбиҳ ёки Набий соллаллоҳу алайҳи васалламга саловат айтиш билан машғул бўлишдир” деб айтган. Мароқил фалоҳ. – Б. 326.

Бундан маълум бўладики, бу кеча учун бирор хос ибодат тайин қилинмаган. Кимнинг кучи қанча вақт Аллоҳ таолони ёд қилишга қодир бўлса, ўшанча вақт Қуръон ва ҳадис тиловати билан ёки уларни эшитиш билан ўтказиш лозим.

Манба: Фиқҳ.уз
@mehrob_uz

Тўрт илоҳий ваъда
1.
ادْعُونِي أَسْتَجِبْ لَكُمْ
«Менга дуо қилингиз, сизларга ижобат қилурман» (Ғофир сураси, 60-оят).
2.
فَاذْكُرُونِي أَذْكُرْكُمْ
«Мени ёд қилинглар ва Мен ҳам сизларни ёд қилурман» (Бақара сураси, 152-оят).
3.
لَئِنْ شَكَرْتُمْ لَأَزِيدَنَّكُمْ
«Агар шукр қилсанглар, сизларга, албатта, зиёда қилурман» (Иброҳим сураси, 7-оят).
4.
وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ
«Улар истиғфор айтиб туришар экан, Аллоҳ уларни азобловчи эмас» (Анфол сураси, 33-оят).

@mehrob_uz

Садақанинг беш фойдаси

1. Балоларни даф қилади.
Анас розияллоҳу анҳудан ривоят қилинади. Набий соллаллоҳу алайҳи ва саллам: "Албатта, садақа Аллоҳнинг ғазабини ўчиради ва ёмон ўлим топишга парда бўлади", дедилар (Имом Ибн Ҳиббон ривояти).

2. Гуноҳ ва хатоларга каффорот бўлади.
Набий соллаллоҳу алайҳи ва саллам Ойша розияллоҳу анҳога: “...Чунки у оч қолганни тўйдиради ва худди сув оловни ўчирганидек хатоларни ўчиради", дедилар (Имом Термизий ривояти).

3. Дўзахга парда бўлади.
Расулуллоҳ соллаллоҳу алайҳи ва саллам: “Ҳатто бир дона хурмо бўлаги билан бўлса-да, дўзахдан сақланинг”, дедилар (Муттафақун алайҳ).

4. Мол-дунёга гаров бўлади.
Расулуллоҳ соллаллоҳу алайҳи ва саллам: “Молларингизни закотини бериш билан ҳимояланглар”, дедилар (Имом Табароний ривояти).

5. Беморларга даво бўлади.
Расулуллоҳ соллаллоҳу алайҳи ва саллам: “Беморларингизни садақа билан даволанглар”, дедилар (Имом Байҳақий ривояти).

@mehrob_uz

САБР ҚИЛГАН ЭДИ...

Ҳунайн ғазотида Аллоҳ мусулмонларга нусрат берди. Кўп ўлжа қўлга киритилди. Пайғамбар алайҳиссалом уларни тақсим қилишда айримларга кўпроқ улуш ажратдилар. Ақроъ ибн Ҳобисга юзта туя, Уяйнага ҳам юзта туя бердилар. Арабларнинг обрўли инсонларига ҳам тақсимот кўпроқ бўлди. Албатта, буни ўзларича қилмадилар. Балки У зотга Аллоҳ томонидан бир илҳом бўлган эди.

Шунда бир киши: «Бу тақсимот адолатли бўлмади. Аллоҳ учун қилинмади», деди. Абдуллоҳ ибн Масъуд розияллоҳу анҳу: «Аллоҳга қасамки, бу гапни Расулуллоҳга айтаман», деди ва бориб айтиб берди.

Бу гапни эшитган Расулуллоҳ соллаллоҳу алайҳи васаллам: «Аллоҳ ва Расули адолат қилмаса, ким адолат қилади? Мусони Аллоҳ раҳмат қилсин. Унга бундан ҳам кўп озор етганди. У эса сабр қилган эди», дедилар.
Абдуллоҳ ибн Масъуд айтади: «Ўшандан кейин Расулуллоҳга озорловчи хабарларни етказмайман, деб қасам ичдим».

Изоҳ: Ўшандаги тақсимотнинг ҳикмати кейин юзага чиқиб, мол-дунё туфайли ҳам мусулмонлар сафига кириб, кейинчалик асл иймон ҳаловатини тотганлар бўлди...

“Расулуллоҳ соллаллоҳу алайҳи васалламнинг ҳаётларидан 101 қисса” китобидан.
@mehrob_uz

ҚАЛБИ МУҲАББАТ ИЛА МУНАВВАР ЭТИЛГАНДИ

Мусъаб ибн Умайр розияллоҳу анҳунинг кийими йиртиқ-ямоқ, ўзи кўп оч юрганидан озиб, заифлашиб қолганди. Расулуллоҳ соллаллоҳу алайҳи васаллам уни кўрганларида: «Аллоҳ таоло қалбини ҳидоят нури билан мунаввар этган зотга қаранглар. Мен уни Исломга киришидан олдин ота-онаси (Маккадаги энг бой одамлардан бири бўлган) энг зўр таомлар, энг зўр ичимликлар билан парваришлаб едирганини кўрганман. Аллоҳ ва Расулига бўлган муҳаббати уни сизлар кўриб турган мана шу ҳолга келтириб қўйди», деган эдилар.
Мусъаб ибн Умайр розияллоҳу анҳунинг бу муҳаббати туфайли у бир маҳалладан ўтса, одамлар унинг шу кўчадан ўтганини ифоридан билишар эди. Энг бой одамлардан бирининг фарзанди, энг яхши таом ва ичимликларни ичиб, энг яхши кийимларни кийиб юрадиган инсон Исломни қабул қилганидан кейин Аллоҳ ва Расулига муҳаббат қўйгач, бу оламнинг фароғатидан воз кечган эди.

“Расулуллоҳ соллаллоҳу алайҳи ва салламга муҳаббат ҳақида 101 қисса” китобидан.
@mehrob_uz