Ayni kunlarda viloyat hokimi vazifasini bajaruvchi Ulug‘bek Mustafoyevning tashabbusi bilan hududlardagi mavjud muammo va kamchiliklarni o‘rganish ishlari davom etmoqda.

O‘rganishlar G‘allarol tumanida ham olib borilib, bir qator muammo va kamchiliklar borligi aniqlandi.

Xususan, G‘ofur G‘ulom mahallasi, O‘qituvchilar ko‘chasida qurilayotgan stamotologiya binosi oldida chiqindilar to‘planib qolgan.

Olimlar mahallasida joylashgan Qishloq vrachlik punkti sentabr oyida qayta ta’mirlangan bo‘lsada, hozirda hudud obodonlashtirilmagan, bino hovlisidagi hojatxona qayta qurish uchun buzib tashlangan bo‘lsada, hanuzgacha qurilmagan, bino xonalari esa bo‘m-bo‘sh, jihozlar bilan ta’minlanmagan, yo‘laklar esa ta’mirtalab.

Olimlar mahallasi H.Ziyotov ko‘chasida joylashgan umumiy yotoqxona binosi bugungi kunda fuqarolar yashashi uchun ajratilgan bo‘lsada, kuz-qish mavsumiga tayyor emas, bino yo‘laklari abgor ahvolda, yog‘ingarchilik mavsumida bino tomidan suv o‘tadi.

Baxt mahallasi Lalmikor ko‘chasida suv quvuri yorilganligi sababli, ta’mirlash ishlari olib borilmoqda. Mas’ullarning aytishicha ushbu kamchilik tez orada bartaraf etiladi.

Baxt mahallasi Baxt-2 ko‘chasida joylashgan 2 qavatli uylarning tashqi ko‘rinishi abgor ahvolda, bolalar maydonchasini aytmasa ham bo‘ladi, umumiy hojatxonaning holati esa hech qanday sanitariya talablariga javob bermaydi, hududda obodonlashtirish ishlari umuman amalga oshirilmagan, elektr ustunlari bazo‘r turganday, elektr kabellari betartib tortilgan.

Yana bir holat ham barchani dilini xira qilishi aniq. Baxt mahallasida joylashgan ko‘p qavatli uylardan chiqayotgan kanalizatsiya suvlari shu hududdagi sel arig‘iga to‘g‘ridan-to‘g‘ri chiqarib qo‘yilgan.

Markaziy dehqon bozori hududidagi ahvolni ham qoniqarli deb bo‘lmaydi. Bozor hududidagi irrigatsiya tarmog‘i chiqindixonaga aylantirilgan, hudud umuman obodonlashtirilmagan.

O‘rganishlar Marjonbuloq shaharchasida davom etdi. Shu hududda yashovchi fuqarolar bir qator muammolardan norozi. Xususan, bolalar maydonchalari abgor ahvolda, ko‘p qavatli uylarga xizmat ko‘rsatuvchi shirkatdan fuqarolar norozi, ko‘p qavatli uylarning tomidan chakki o‘tadi, tomlarda bazo‘r turgan qurilish materiallari shu hududdagi fuqarolar bolalarga xavf tug‘dirmoqda, issiq suv o‘tkazish maqsadida bolalar maydonchasi kovlangan bo‘lsada, ishlar shundayligicha qoldirilgan.

Navro‘z mahallasidagi 12-uyning yon tomonidagi kanalizatsiya quvuri sentabr oyida yorilganligi sababli kovlangan bo‘lsada, mazkur kovlangan chuqur hanuzgacha shundayligicha turibdi va fuqarolarga xavf tug‘dirmoqda.
Shu hududdagi bolalar maydonchasidagi yer osti drenaj tizimi quduqlari ochiq holatda, ushbu hududlar anchadan beri obodonlashtirilmagan, chiqindilar to‘planib qolgan.

Guliston mahallasidagi tuman Tibbiyot birlashmasiga qarashli tez tibbiy yordam shahobchasi hududi obodonlashtirilmagan, binoning holati esa og‘ir ahvolda, isitish tizimlari to‘liq ishchi holatda emas, binoning ichki qismi ham ta’mirtalab, elektr sim-kabellari tartibsiz holatda o‘z holicha tortilgan, elektr taqsimlash qutilari ochiq holatda, xonalarda esa isitish vositalari va suyultirilgan gaz ballonlaridan xavfsizlik talablariga zid ravishda foydalanilmoqda, 2 ta xonani isituvchi isitish tizimiga elektr kabellari ochiq holatda tortilgan.