Kuni kecha "Yangi O'zbekiston" universitetida bo'lib o'tgan xalqaro forumda "Yangi O'zbekiston" universitetining birinchi prorektori Bahodir Ahmedov "Oliy ta'lim bozori hali universitetlar sifatga e'tibor qaratadigan darajada yetarlicha to'yingani yo'q", degan fikr bildirdi (va shaxsan men bu fikrga qo'shilaman). Jahon Banki vakili Rita Almeydaga ko'ra esa, Mrkaziy Osiyoda aholining va xususan yoshlar sonining o'sishi bilan oliy ta'lim qamrovi asosiy muammolardan biri bo'lib qoladi. Demak, bu sharoitda nodavlat OTMlarning "boshini chopish" va shu orqali nodavlat OTM ochmoqchi bo'lib yurganlarga mablag'larini boshqa sohaga tikkani ma'qul, degan signal berish emas, endi qadamlar qo'yayotgan nodavlat oliy ta'lim bozoriga oyoqqa turib olish va kamchiliklarini bartataf etishga yordam berish yaxshiroq yechimdir. Lekin, hozirgi sharoitda Oliy ta'lim, fan va innovatsiyalar vazirligi bunday qilmaydi, chunki u davlat OTMlariga raqobatchilar kamayishidan manfaatdor. Demak, agar biz yana o'sha "eski O'zbekiston"dagi holatga - abituriyentda tanlov imkoni yo'q va oqibatda OTMga kirishdan bitirishgacha korrupsiya urchib yotgan holatga qaytishni xohlamasak, Oliy ta'lim, fan va innovatsiyalar vazirligining litsenziya bilan bog'liq vakolatlari bekor qilinishi, sohada mustaqil, shaffof va xolis regulyator bo'lishi kerak.