Jalilov. Qaydlar

Xabar berishlaricha, Hilola Umarova O‘zbekiston Respublikasi maktabgacha va maktab ta’limi vaziri lavozimiga ma'qullandi.

Vazirning "Vazirlar Mahkamasi" to'g'risidagi Qonunning 7-moddasiga muvofiq, nomzodi Qonunchilik palatasida ko‘rib chiqilayotganda va ma’qullanayotganda taqdim etishi kerak bo'lgan harakatlar rejasi haqida ma'lumot berilmadi. Umarovaning o'zi ham bunday rejani biron-bir ochiq manbada e'lon qilganicha yo'q. Bu, albatta, bunday rejaning o'zi mavjud bo'lganmi? degan savolni tug'dirmay qolmaydi.

Oʻzbekiston parlamenti deputati, huquqshunos - hokimiyatning bir-biridan mustaqil, oʻzaro bir-birini tiyib tura oladigan va nazorat qila oladigan (checks and balances tizimi ishlaydigan) tarmoqlarga boʻlinishi haqida.

Davletovuz kanalining yozishicha, Oliy Majlis Qonunchilik palatasining Bosh vazir lavozimiga nomzodni ko‘rib chiqishga bag‘ishlangan majlisi bo‘lib o‘tmoqda. "Vazirlar Mahkamasi" to'g'risidagi Qonunning 7-moddasiga binoan, Bosh vazir lavozimiga nomzod Qonunchilik palatasida uning nomzodi ko‘rib chiqilayotganda Vazirlar Mahkamasining yaqin muddatga va uzoq istiqbolga mo‘ljallangan harakat dasturini taqdim etadi.

Savol: nega bunday muhim jarayon biron-bir manbada (na Oliy Majlisning YouTube kanalida, na "O'zbekiston 24"da va na boshqa manbada) jonli efirga uzatilmayapti? "Hokimiyatning yagona manbai" bo'lgan xalq uni boshqaradigan hukumatning yaqin muddatga va uzoq istiqbolga mo‘ljallangan rejalaridan xabardor bo'lishga, o'zini nimalar kutayotganini bilishga haqli emasmi?

Senat oldida turgan ustuvor vazifalardan biri - ijro organlari ustidan nazorat, deyilmoqda.

Savol: joylardagi ijro hokimiyati rahbarlari - hokimlar bir ovozdan Senatga saylangan boʻlsa, Konstitutsiyadagi "hokimiyatlar boʻlinishi" tamoyili buni koʻrib boshini qayerga urishni bilmay oʻtirgan boʻlsa, Senat qanday qilib ijro organlarini nazorat qilishi mumkin?

Rasmiy munosabat

Andijon viloyati Andijon shahri markaziga oʻrnatilgan Bobur haykalining boshqa joyga koʻchirilishi yuzasidan ijtimoiy tarmoqlardagi koʻplab muhokamalarga Andijon viloyati hokimligi matbuot kotibi Muslim Ibrohimovning munosabati (qisqacha mazmuni):

"Kim nima desa deyaversin (yozsa yozaversin), biz baribir bilganimizdan qolmaymiz".

O‘zbekiston Respublikasi Konstitutsiyasining 116-moddasi va “O‘zbekiston Respublikasi Vazirlar Mahkamasi to‘g‘risida”gi qonunning 7-moddasiga muvofiq, hukumat iste'foga chiqdi. Demak, tushunishimcha, hozir hukumat a'zolari - Bosh vazir, uning o'rinbosarlari, vazirlar "v.v.b" ("vaqtincha vazifasini bajaruvchi") maqomida.

Demak, vazirlikka nomzodlarning harakatlar rejalarini va parlamentda ularning tayonlanishidagi qizg'in debatlarning jonli efirini kutib qolamiz

Yangi parlament - eski qiyofalar

"Prezident taklifiga binoan Tanzila Narbayeva uchinchi bor Oliy Majlis Senati raisi etib saylandi. Sodiq Safoyev esa uning birinchi o‘rinbosari, Amanbay Orinbayev o‘rinbosari bo‘ldi.

... Senat raisi prezidentning taklifiga binoan palata tuzilgandan keyingi birinchi majlisda uning a’zolari orasidan senatorlar umumiy sonining ko‘pchilik ovozi bilan yashirin ovoz berish yo‘li bilan besh yil muddatga saylanadi. O‘tgan yili yangilangan Konstitutsiyaga ko‘ra, bir shaxs ketma-ket ikki muddatdan ortiq raislik qila olmaydi".

Darvoqe. 116-modda nima boʻldi?

Rossiyalik aktyor Sergey Bezrukov Oʻzbekistonning ""Doʻstlik" ordeni bilan taqdirlanibdi. Bezrukov Rossiyaning Ukrainaga bosqinini, undan ham oldinroq Ukrainaning Qrim avtonom respublikasi Rossiya tomonidan noqonuniy anneksiya qilinganini qoʻllab-quvvatlab chiqqan edi. Bezrukov bosqinchilik urushini qoʻllab-quvvatlagani uchun Yevropa Ittifoqining sanksiyalar roʻyxatiga kiritilgan.

Rossiya prezidenti, Xalqaro jinoyat sudi tomonidan harbiy jinoyatlarda gumonlanib hibsga olinishi uchun order berilgan Vladimir Putin ham, oʻz navbatida, Oʻzbekistonlik ikki xonandani taqdirlagan. Umid qilamizki, bu Oʻzbekistonliklarga orden suveren davlatga bosqinni qoʻllab-quvvatlashgani uchun berilmagan. Umuman, xalqaro jinoyatchidan orden olish qay darajada sharaf, bilmadim ...

Yangi O'zbekiston, yangi Konstitutsiya, eski qiyofalar

Gazeta.uz yozmoqda: "Нуриддин Исмоилов в третий раз (uchinchi marta) избран спикером Законодательной палаты Олий Мажлиса. Он возглавляет нижнюю палату парламента Узбекистана с 2015 года".

O'zbekiston Respublikasi Konstitutsiyasi aytmoqda: "Ayni bir shaxs surunkasiga ikki muddatdan ortiq O‘zbekiston Respublikasi Oliy Majlisi Qonunchilik palatasining Spikeri bo‘lishi mumkin emas". (100-modda)

Xabarlarga ko'ra, yangi saylangan parlament o'z ishini boshlagan ko'rinadi. Parlamentning dastlabki majlisi qayerdadir jonli efirga berilyaptimi? Masalan, "O'zbekiston 24"da? Soliq to'lovchilar hisobidan moliyalashtiriladigan hamda vazifasi O'zbekiston va jahondagi muhim voqealarni yoritish bo'lgan bu kanal mamlakat siyosiy hayotidagi muhim (bo'lishi kerak bo'lgan) voqeani jonli efirda olib bera olmasa, bu kanalni moliyalashtirishdan nima naf?

Umuman, fikrimcha, nafaqat hukumat aʼzolarining yangi saylangan parlamentga oʻz harakatlar rejasini taqdim etishi va bu rejalarning xalq vakillari tomonidan qizgʻin muhokama qilinishi, deputatlarning vazirlikka nomzodlarni savollar yomgʻiriga tutishi jonli efirga uzatilishi shart. Shu bilan vazirlikka nomzodlarning rejalari parlamentda muhokama qilinishidan oldin ochiq platformalarda (masalan, tegishli vazirliklar saytlarida) eʼlon qilinishi kerak deb hisoblayman. Axir, xalq oʻzini yaqin istiqbolda nima kutayotganini bilishga haqli emasmi?

Demak, vazirlikka nomzodlarning harakatlar rejalarini kutib qolamiz?

Gazeta.uz ning yozishicha, yangi saylangan Qonunchilik palatasining birinchi majlisi 18-noyabr kuni, Senatning birinchi majlisi 19-noyabr kuni boʻlib oʻtadi.

Oʻzbekiston Respublikasi Konstitutsiyasining 116-moddasiga muvofiq, "amaldagi Vazirlar Mahkamasi yangi saylangan O‘zbekiston Respublikasi Oliy Majlisi oldida o‘z vakolatlarini zimmasidan soqit qiladi, biroq Vazirlar Mahkamasining yangi tarkibi shakllantirilguniga qadar O‘zbekiston Respublikasi Prezidentining qaroriga muvofiq o‘z faoliyatini davom ettirib turadi".

Demak, keyingi hafta hukumat isteʼfosi kutilyaptimi? Amaldagi vazirlar, xususan, deputatlikdan voz kechgan Maktabgacha va maktab taʼlimi vaziri ham, agar qayta tasdiqlanmoqchi boʻlsa, "Vazirlar Mahkamasi toʻgʻrisida"gi qonunning 7-moddasiga muvofiq, oʻz harakatlar rejasini taqdim etadimi? "Hokimiyatning yagona manbai boʻlgan xalq" bu jarayonni jonli koʻra oladimi?

Muammoni "ura-ura" va "dialog imitatsiyasi" bilan yopib boʻlmaydi - uni tan olish va real dialog kerak

Maktabgacha va maktab taʼlimi vazirligining xabar berishicha, vazir va taʼlim sohasi vakillari uchrashuvi boʻlib oʻtibdi. Unda ta'lim sohasidagi islohotlar, shu jumladan, "mezonlarga asoslangan" deyilayotgan baholash tizimi muhokama qilinibdi. Bu uchrashuvga tizimdagi muammolarni ayta oladigan ota-onalar yoki mutaxassislar taklif etilmagan koʻrinadi.

Oldinroq vazirlik yangi baholash tizimi haqida fikrlar aks etgan video eʼlon qilgan edi - unda mikrofon berilganlar faqat yangi tizimning "naqadar zoʻr"ligini bayon qilishgan, tizimning muammolari haqidagi fikrlarga oʻrin berilmagan.

Oldinroq esa yangi tizimdan norozi bir guruh ota-onalar vazirga oʻz murojaatlarini yoʻllashgan va javobini ijtimoiy tarmoqlarda eʼlon qilishga vaʼda berishgan edi. Tizimdan norozi ota-onalar maxsus guruh ham tashkil qilishgan, undagi bir necha ming qatnashuvchi prokuratura, bolalar ombudsmani va boshqa yuqori idoralarga shikoyatlar yoʻllash imkoniyatlarini muhokama qilishmoqda. Vaziyat tarang, norozilarga vazirlikning muammoni tan olib, real muloqotga kirishish oʻrniga bunday "ura-ura"larni ishga solishi, taʼbir joiz boʻlsa, "koʻzi qonga toʻlgan buqaga qizil latta"dek taʼsir qilmoqda.

Bu ota-onalarni tushunish mumkin: ular va ularning farzandlari tizimning "afzalliklari"ni har kuni oʻz tanalarida his qilishmoqda. Muhokamalarni kuzatdingiz, ular farzandlari koʻngli maktabdan sovigani, oʻqishga borishni istamay qolgani va maktabga borishdan maʼno qolmagani - faqat CHSB - BSBlar oʻtadigan kunlari maktabga borib, shu nazorat ishlarini bir amallab topshirsa kifoya boʻlib qolgani haqida bong urishmoqda.

Vazirlikni ham tushunsa boʻladi: Qozogʻistondan andoza olinganligi taxmin qilinayotgan (u yerda ham ota-onalarning noroziligiga sabab boʻlgan) bu tizimning "zoʻr"ligi haqida "eng yuqori"ga taqdimotlar qilingan, maxsus qarorlar chiqartirilgan, endi borib "uzr, bu tizimning mana bunday kamchiliklari ham bor ekan, ota-onalar bunday deyapti, mutaxassislar bunday deyapti, biz hisobga olmagan ekanmiz" deyish vazirlikning "obroʻsiga yarashmaydi".

Lekin mana bunday "ura-ura" videolar va uchrashuvlar bilan ham muammo hal boʻlib qolmaydi. Real dialog kerak.

Darvoqe. TRM ishlab chiqqan "baholash konsepsiyasi" loyihasi nima boʻldi?

"Mentor Hub" guruhi asoschisi, Toshkent Xalqaro Vestminster universiteti katta oʻqituvchisi Nodira Isamuhamedova bilan taʼlimda tadqiqotlarning oʻrni, ilmiy tadqiqotlarga asoslangan taʼlim siyosati qanday boʻlishi kerakligi haqida suhbatlashdik.

Darvoqe, "Mentor Hub"ning Youtube kanalini kuzatib borishni tavsiya qilaman. Nodira opa jiddiy va pedagoglar uchun kerakli mavzularda suhbatlar tashkil qilmoqdalar.