* Изҳор

ИЛИНЖ

Қароғинг сирингдан берар гувоҳлик,
Юрагим симирар чиройинг – бода.
Мендаги ошиқлик, сендаги кўҳлик,
Анқонинг уруғи каби – дунёда.

Дилафрўз ёдингдан топсам гар паноҳ,
Дилда дард унутар хасратлигини.
Сочларинг бўйига чайилса ногоҳ,
Ҳис этар бу дунё жаннатлигини.

Қалбимнинг қулфларин абадий очган
Сўзингда ҳайратим синиқлари бор.
Ризвондан чечаклар ифори кўчган
Чеҳрангдан нигоҳим ўмарар ашъор.

Дилимга ҳижронинг айтмоқда ўлан,
Кўнглингга етгайми ишқимнинг ҳиди?
Қайрилган қошларинг қиличи билан
Тинчимни кесгайдир васлинг умиди.

Қулоғим туш кўрар кулгинг жарангин,
Йўлимга танишдир мангу изларинг.
Армонлар ўчирса ҳаётим рангин,
Яшашга чорлайди соҳир кўзларинг.

Телбадай севишим сира этма ман,
Майли-да азобла, майли-да қарға.
Умидим ипларин узиб тамоман,
Васлингдан айлама мени бадарға.

Жасурбек ЭСАНОВ

Уланиш учун: https://t.me/ijod_bustoni