Hidoyat.uz

#савол_жавоблар

🟢ТИРНОҚНИ ЖУМА КУНИ ОЛИШ КЕРАКМИ?

❓CАВОЛ: Тирноқни фақат жума куни олиш керакми?

💬 ЖАВОБ: Бисмиллаҳир Роҳманир Роҳим.
Тирноқни ҳафтанинг барча кунларида олиш мумкин. Айнан жума куни олиш борасида бирорта саҳиҳ ҳадис бизга маълум эмас. Лекин саҳобалардан Абдуллоҳ ибн Умар разияллоҳу анҳу одатда ҳар жума куни тирноқларини олиб, мўйловларини қисқартирганларини Имом Байҳақий ривоят қилганлар. Шунинг учун айрим фуқаҳоларимиз жума куни жума намози учун покланиб чиқиш мақсадида тирноқ олса яхши, дейишган. Валлоҳу аълам.

✅Ўзбекистон мусулмонлари идораси
Фатво маркази.

✈️ @HidoyatUz 🌐Instagram

Болаларга паноҳ тилаш дуоси

Ибн Аббос розияллоҳу анҳудан ривоят қилинади:
Расулуллоҳ соллаллоҳу алайҳи васаллам Ҳасан ва Ҳусайнларга

أعِيذُكُمَا بِكَلِمَاتِ اللهِ التَّامَّةِ مِنْ كُلِّ شَيْطَانٍ وَهَامَّةٍ وَمِنْ كُلِّ عَيْنٍ لاَمَّةٍ

«Уъийзукума бикалиматиллаҳит таммати мин кулли шайтонин ва ҳаммаҳ ва мин кулли ъайнин ламмаҳ», дуосини ўқиб паноҳ тилар ва: «Бу дуо отангиз Исмоил ва Исҳоқ алайҳимуссаломларнинг паноҳ тилайдиган дуолари эди», деб айтар эдилар.

(Маъноси: Аллоҳнинг мукаммал калималари билан ҳар бир шайтондан, зарарли ҳашаротлардан ва ёмон кўздан сизларга паноҳ тилайман.)

Имом Бухорий ривоятлари.

🌐 @HidoyatUz

КАТТА ГУНОҲЛАРДАН САҚЛАНИШ ҲАҚИДА

Абу Ҳурайра розияллоҳу анҳудан ривоят қилинади: "Расулуллоҳ соллаллоҳу алайҳи ва саллам:
"Етти ҳалок қилгувчидан узоқ бўлинглар!", дедилар. "Эй Аллоҳнинг Расули, улар нималар?" дейишди.
"Аллоҳга ширк келтириш; сеҳр қилиш; Аллоҳ (ўлдиришни) ҳаром қилган жонни ноҳақ ўлдириш; рибо ейиш; етимнинг молини ейиш; қўшин бостириб келганда ортга қочиш; ўзини сақлаган, мўмина, покдамон аёлларга туҳмат қилиш", дедилар”.

(Муттафақун алайҳ)

✈️ @HidoyatUz 🌐Instagram

Дунёда англаб бўлмайдиган нарсанинг ўзи йўқ – англашни истамайдиган одамлар бор;
тушуниб бўлмайдиган нарсанинг ўзи йўқ – тушунишни истамайдиган одамлар бор;
кўзга кўринмайдиган нарсанинг ўзи йўқ – кўришни истамайдиган одамлар бор.
Шу сингари, одам боласига насиб этмайдиган билим ҳам йўқ – билимдаги насибасини рад этадиган одамлар бор...

✈️ @HidoyatUz 🌐Instagram

#савол_жавоблар

🔴 🌺 ЖАННАТНИНГ ЭНГ АФЗАЛ АЁЛЛАРИ

❓ CАВОЛ: Эшитишимча, тўртта аёл мукаммал аёл дейилган экан. Ўша аёллар ким?

💬 ЖАВОБ: Бисмиллаҳир Роҳманир Роҳим.
Абдуллоҳ ибн Аббос разияллоҳу анҳудан ривоят қилинган ҳадиси шарифда Расулуллоҳ саллаллоҳу алайҳи васаллам: «Жаннатнинг энг афзал аёллари — Хадича бинти Ҳувайлид, Фотима бинти Муҳаммад, Марям бинти Имрон ва Фиръавннинг аёли Осиё бинти Мазоҳимдир» , – деганлар (Имом Аҳмад ривоятлари). Валлоҳу аълам.

✅Ўзбекистон мусулмонлари идораси
Фатво маркази.

✈️ @HidoyatUz 🌐Instagram

Донишмандлардан бири айтди: «Қачонки бир иш сени маҳзун қилса, қара, агар бу қийинчилик ҳийла билан ундан чиқиб кетиладиган ишлар сирасидан бўлса, бу мушкулнинг чорасини топиб, уни даф этишда нафсинг ожизлик қилмасин. Агар у ҳийла билан ечилмайдиган ишлар жумласидан бўлса, бас, сабр қил, жазавага тушма. Чунки бошланиши бор ҳар қандай ишнинг, ниҳояси ҳам бор. Сендан талаб этиладигани – ҳаракат қилиш, муваффақият қозониш сенинг зиммангда эмас».

Изоҳ. Донишманднинг бу насиҳатида Исломдаги «васатия» яъни, ҳар қандай ҳолатда ўрта йўлни тутиш таълимоти гўзал тарзда тақдим этилган. Қийинчиликка рўбарў бўлган инсон мушкулни ечиш тадбири ҳақида ўйлаши ва шунга мувофиқ ҳаракат қилиши – буюрилган иш. Соғлом ва тўғри эътиқоддаги инсон бу буйруққа амал қилади, мушкулот қаршисида довдираб, нима бўлса бўлар деб жим ўтиравермайди. Агар қилинган тадбирдан кўзланган натижа чиқмаса, шунча елиб-югурганини бефойда санаб, тушкунликка тушмайди. Тинимсиз ҳаракатлари орқали етиб келган манзили – сабрда тўхтайди, қалбини муваффақият жазаваси эмас, сабр хотиржамлиги эгаллайди. Чунки мўмин инсон билади: банда ҳаракат қилишга буюрилган, натижа Оллоҳдандир.

"Унвонул баён".

✈️ @HidoyatUz 🌐Инстаграм

Сахийликнинг даражалари

Шамс Табризий ҳазратларидан сахийлик ҳақида сўрадилар. У зот шундай жавоб бердилар:
– Тўрт хил сахийлик бор.
Биринчиси – мол сахийлиги, бу зуҳд соҳибларига хос. Улар мол бериб маърифат оладилар.
Иккинчиси – бадан сахийлиги, бу мужтаҳид олимларга хос. Улар Аллоҳ таолонинг йўлида, илм йўлида вужудларини сарф қиладилар ва ҳидоятни топадилар. Инсонларга ҳидоятда раҳбар бўладилар.
Учинчиси – жон сахийлиги, бу шаҳидларга хос. Улар эса жонлари эвазига жаннатни қозонадилар.
Тўртинчиси – қалб сахийлиги, бу орифларга хос. Улар Маъшуқга кўнгилларини бериб, Муҳаббат оладилар.

Турк тилидан Гўзал Мирзаева таржимаси

✈️ @HidoyatUz

КИМ АЛЛОҲДАН ҚЎРҚСА...

Абу Жаъфар Дийнаварий айтади: "Миср амири Аҳмад ибн Тувлун қиличини ўйламасдан ишлатар эди. Унинг зиндонида ўлганлар сони ўн саккиз мингдан ошиқ эди.
Шайх Абул Ҳасан Бунон унга қаттиқ гапириб, яхши ишларга буюриб, ёмон ишлардан қайтардилар. Унинг ғазаби қайнаб, Шайхни шернинг олдига ташлашга амр қилди. Бу хабар бутун оламга тарқалди. Мен ўша кунларда улар олдида эдим. Амирнинг ўғли Хуморовайҳнинг қасридан шер келтирилди. Хуморовайҳ овга ишқибоз эди. Бирор водий ёки тўқайзорда йиртқичнинг хабарини эшитса, албатта, уни овлашни қасд қилар эди. Унинг махсус кишилари бўлиб, улар шерни тириклайин қўлга тушириб қафасга тиқишар эди. Шайх учун танланган шер энг йиртқич ва ваҳший эди.
Шайхни бир хонага қўйишиб, қафасдаги шерни бўшатиб юборишди. Ўзлари воқеани кузатиб туришар эди. Шер ўкириб Шайх томон келди. Шайхнинг ўлимига кўз очиб юмгунчалик вақт қолган эди. Ҳамма даҳшатда эди. Шайх эса ҳеч нарсага парво қилмас, сокин ва хотиржам эди. Шер келиб худди эгасига содиқ ит каби Шайхни бир ҳидлаб, нарироққа бориб ерга ётиб олди. Гўё бу тақво соҳиби ва шер ўртасидаги кураш эмас, балки Ибн Тувлун ва Аллоҳнинг иродаси ўртасидага жанг эди. Шер Аллоҳдан қўрқадиган зотни кўрди ва ундан қўрқди. Зеро, ким Аллоҳдан ҳақиқий қўрқса, ундан ҳамма нарса қўрқади.
Дийнаварий айтади: "Биз назаримизни шайхга қаратдик. У қовоғини уйиб фикрлар эди. Кейин уни шернинг олдидан чиқариб олишди. Унинг ҳолини ҳамма ўзича шарҳлар эди. Кимдир "Хавф унинг эсини олди", деди. Бошқа биров "У ақли билан ўлим сари йўналди" , деди. Учинчиси "У фикрнинг сокинлигидир. У жисмни ҳаракатдан тўхтатди", деди. Бир гуруҳ инсонлар эса "Ундаги тафаккурга ғарқ бўлиш шерни сеҳрлади" , дейишди. Хуллас, ҳамма ўз фикрини айтди. Шунда амир Ибн Тувлун Шайхдан: "Қалбингдан нима ўтди, нима ҳақида фикрладинг?" деб сўради. Шайх деди: "Менга ҳеч нарса бўлгани йўқ. Фақатгина шернинг сўлаги тозами ёки нажасми деб ўйладим?" деди.

✈️ @HidoyatUz

#савол_жавоблар

🟢 НАМОЗИМ ДУРУСТ БЎЛГАНМИ?

❓CАВОЛ: Чўнтагимда суюқ нажосат теккан қоғоз борлиги эсимда йўқ намоз ўқиб қўйибман. Энди мени намозим дуруст бўладими ёки йўқ?

💬 ЖАВОБ: Бисмиллаҳир Роҳманир Роҳим.
Кишининг кийимига ёки чўнтагидаги нарсага теккан нажосат кам бўлса ва билмасдан намоз ўқиб қўйса, намози дуруст бўлади. Агар нажосат кўп бўлса, ўқилган намозни қайта ўқиш керак. Камлик миқдори - қуюқ нажосатларда 4,25 граммдан ва суюқ нажосатларда катта танга кенглиги миқдоридан ортиқ бўлмаслиги билан белгиланади. Валлоҳу аълам.

✅Ўзбекистон мусулмонлари идораси
Фатво маркази.

✈️ @HidoyatUz