ЎЗИМ КАБИ ОДДИЙ ТИЛАГИМ  

Аввало,
         тириклик ўзи
                          бир ҳикмат,
Улғаямиз тағин
               бир йилга бешак.
Кўнгилда шукр, ва
                   борига раҳмат,
Янги йил, дўстларим,
                  Сизга муборак!

Бахт асли,
              жамулжам
                          оила билан
Дастурхон гирдида
                  ўтирмоқ демак.
Қаранг,
         қандай ярашади
                   Сизга бу давра,
Янги йил, дўстларим,
                  Сизга муборак!

Севинг бир бирингиз,
           дилдан, кўнгилдан,
Оройиш кунларни
                 айлангиз тилак.
Дунё ғурбатини
                    бир пас
                               унутинг,
Янги йил, дўстларим,
                 Сизга муборак!

Қор бўлмаса,
     оппоқ тилак бор ахир,
Келар бир кун яна
                     ўша яхмалак.
Таомлар ниятсиз
                 бўлгай шўр,
                                  тахир,
Янги йил, дўстларим,
                 Сизга муборак!

Муддао нек бўлса,
толе Сизники,
Иштиёқ,
шижоат-
омадга бўнак.
Илоҳо,
дуолар ижобат бўлсин,
Янги йил, дўстларим,
Сизга муборак!

Кам деманг, ғам еманг,
феълни кенг қилинг,
Насиба бўлса ҳам
ним ёки чорак.
Энг аввало,
икки кўзни
тўқ билинг,
Янги йил, дўстларим,
Сизга муборак!

Қадрлангиз аввал,
               бир-бирингизни,
Не бор ахир ширин
                вафодан бўлак?
Бир суйинг,
             бир кулинг,
                   рақсга тушинг,
Янги йил, дўстларим,
                Сизга муборак!

Ният бўлса агар
тоза, бокира,
Қўллар бизни
Худо,
Аллоҳ Таборак.
Келинг,
шундай экан,
ниятлар айланг,
Янги йил, дўстларим,
Сизга муборак!

Шу азиз
                Ватан бу  - улуғ,
                           табаррук,
Ўзга жаннат излаб,
            бўлмангиз ҳалак.
Қаранг,
               меҳр билан
                        қучаяпти у,
Янги йил, дўстларим,
                Сизга муборак!   

Тилагим ҳам Сизга
               ўзимдек оддий:
Қўллар мени сўзсиз
               осмонда малак.
Қаранг,
          эл уйғонди,
                 Ватан уйғонди,
Янги йил, дўстларим,
                Сизга муборак! 
@farmontosh
2024 йил 30 декабрь.