Мирзо Улуғбек номидаги Ўзбекистон миллий университетида кимёгар олимлар иштирокида “Олима – илмдаги фидойилик ва жонкуярлик рамзи” мавзусидаги илмий-амалий анжуман бўлиб ўтди.

“Халқаро илм-фан соҳасидаги хотин-қизлар куни” муносабати билан ташкил қилинган тадбирда Ўзбекистон Республикаси Олий Мажлиси Қонунчилик палатаси, Фанлар Академияси, Ўзбекистон Хотин-қизлар “Олима” уюшмаси, Ўзбекитон миллий университети, Жамоат хавфсизлиги университети ва Божхона қўмитаси вакиллари иштирок этишди.

Анжуманда Божхона қўмитасининг Марказий божхона лабораторияси суд-тиббиёти бош эксперти, органик кимё бўйича магистр Сакина Мусабекова “Божхона соҳасидаги аёлларнинг илмий-тадқиқот фаолияти” мавзусидаги маърузаси билан қатнашди.

Таъкидланганидек, божхона органларида сўнгги йилларда хотин-қизларнинг янги билимларни ўзлаштириши ва интеллектуал салоҳиятларини оширишларига алоҳида эътибор қаратилмоқда. Касбий фаолияти билан бир қаторда бир гуруҳ божхоначи аёллар илмий-тадқиқот ишларини ҳам олиб боришмоқда.

Тадбирдаги фаол иштироки учун С.Мусабекова Ўзбекистон Хотин-қизлар “Олима” уюшмасининг ташаккурномаси билан тақдирланди.