​​Charsillagan yomg‘irli tunlar,
daraxtlarga ilingan osmon.
Sochlaringdek qora quyunlar
talpinadi derazang tomon.

Ehtirosning qaynoq nafasi
choyshabingni tashlaydi otib,
bir bandaning parishon aksi
derazangda turar sovqotib.

U sochlardir ko‘ksingda yongan,
mening bag‘rim yomg‘irlar aro.
U niqobdir siynangda yotgan –
men emasman, men – baxtiqaro.

Men – huv ana: tanho, parishon.
Telbalarcha yig‘lagim kelar.
Daraxtlarga ilingan osmon
va charsillab yog‘ar yomg‘irlar...

© Asqar Mahkam

- @ch_k_t