🌼O‘zim uchun qadrli :|🌿

Butun umrga yetadigan malhamim onam)

tosh deb aytding... 
kecha yig‘ladim, 
yashayapman.... yuraksizmanmi? 
keraklilik ichida uxlab – 
men o‘zimga keraksizmanmi? 
bahor... 
endi gullamoq payti, 
men kurtakka aylanmog‘im shart. 
burni qonab ketdi fevralning – 
sal o‘rnidan turib oldi mart.
kaftlarimga sig‘mas mazmunim, 
dard – chuqurga itarilgan it. 
kim bo‘ldim men so‘zlarni g‘ajib – 
senga izhor bitmagan yigit...
ko‘nglim qattiq. diydam muzlagan. 
gulga berdim ko‘zdagi namni. 
axir qanday haydayin uydan – 
oyoqlari kesilgan g‘amni? 
sening ko‘zing kamalak yorib – 
nur ekadi tashna qonimga. 
g‘urur meni to‘rga o‘tkazib – 
og‘riq tortar dasturxonimga. 
kunlar... 
bilasanmi tabiat – 
uzun qo‘llarini uzatdi. 
men ketmoqchi bo‘ldim baridan – 
ortimdan jim o‘zim kuzatdi. 
ho‘l tamaki... 
gugurtim yonmas.. 
derazadan ko‘chaga boqdim. 
nega seni ko‘ra olmayman? 
alamimdan kiprikni yoqdim.. 
to‘rtta qibla ichida hamon, 
tilga bosdim o‘tkir tishimni. 
qonga bo‘yab yubordi xotir – 
tilib tashlab jilmayishimni. 
nafaqat men, balki derazam 
muzlab borar... 
sen sezasanmi? 
ayoz bo‘lib oynangga borsam – 
menga bir bor gul chizasanmi?
hayot bizni sahnaga tashlab, 
qarsak chalib qo‘yadi zimdan. 
sen shodmisan zafar qozonsam? 
yig‘laysanmi mag‘lubligimda? 
nish urmoqda, qara, maysalar, 
tovonimga sochini surtib. 
she`r yozadi dilga ulangan – 
barmog‘imni qalamim turtib. 
dalli bo‘ldim, 
ehtiros bilan, 
qo‘shiq aytdim, tun ko‘zgu chiroy. 
shundan beri daraxt qizarar, 
shundan beri kiyinmaydi oy. 
sevgi nima? 
qurigan labim – 
savol bilan namlandi xiyla. 
yurak sevish uchun yaralgan 
yuraksizni sev, 
meni o‘yla... 
garchi izhor etmayman yonib, 
garchi baxtga qurmayman ham in, 
garchi zahar ichmayman qonib, 
garchi hamma ko‘ylagim – xudbin. 
garchi sensiz ololdim nafas, 
garchi mag‘rur ulg‘aydim qadim. 
men mehrga aylandim butkul... 
tosh deb aytding... 
kecha yig‘ladim...

– Azizbek Hakimov

Qodir hayot - ulkan yalmog'iz,
Sezib jonim mazalarini,
Yetti yamlab, qilding bir og'iz,
Umrimning sha'n lahzalarini.

Mahkamlading borlik eshigin,
Ochding yo'qlik darchalarini.
"Borsa-kelmas" sari uzatding,
Yillarimning parchalarini.

Aldoqlarga sen meni otding,
Sotding shayton hammollariga.
Mendan kechding -
Bir o'zim botdim,
Yuragimning zindonlariga.

Qodir hayot - makkora maston,
Yoqsang - olov, o'chirsang - kulman.
Kun ko'rmadim dunyoda oson -
Yuragimga men ham bir qulman.

Hali tirilishim beadad,
Hali qanday o'lishlarim bor...
Meni nima qilasan aldab,
Rostdan umring ming yilmi, chinor?

©Usmon Azim

Azobli biroq muhtasham sevgi shudir balki..

ИЛТИЖО

Қайси музофотда, қайси кўчада,
Қайси хитобларда, неча-нечадан.
Ўтиб кетмоқдасан сўнгсиз кечадан,
Осима,
Ёнимга қайтсанг бўлмасми?

Шамолнинг кўринмас қўлида жуссанг,
Адашган туйғулар йўлида  ғуссанг,
Шириннинг бўзлаган элидан қочсанг,
Оҳиста  ёнимга қайтсанг бўлмасми?
  
Таноби тортилган изтироб  кимхоб
Далада  тиллашар, англамас сароб,
Қашқир ёғдулардан томчилар симоб,
На қилдинг, ёнимга қайтсанг бўлмасми?

Уфқдан уфққа шарпалар кўчар,
Кўнгли синиғлари, парчалар кўчар,
Энди бу шаробни бошқалар ичар,
Осима,
Ёнимга қайтсанг бўлмасми?
                                            
Абдували ҚУТБИДДИН

Muvaffaqiyatsizlikka uchrayvergan odamda na o'ziga, na kim/nimaga ishonch qolar ekan. Faqatgina umid. Yaxshi va chiroyli narsalarga umid.

Yaxshilar umriga o'xshaydi fevral!

Fevralni ham omonlikda o'tkazib olsak keyin bahor..

Vujudingiz-u ruhingizni erkalovchi chin fasl!

Eng ko'p sog'iniladigani ham bahor)

Lola-qizg'oldoq saylini qumsadi ko'ngil..

…Мен учун — ҳаёт,
…Сўнгсиз азоб-ғам,
…Руҳимдаги нур —
Бу дунёда сенинг севгинг борлиги.