Ish odamni baxtli qiladimi? Ha, lekin qanday qilib? Pul, lavozim, obro‘ – bular baxt bermaydi, faqat muammolarni kamaytiradi. Ishdan haqiqiy zavq olish uchun esa ikki narsa kerak: muvaffaqiyatni o‘zingiz yaratishingiz va boshqalarga xizmat qilishingiz. Bu haqda
Harvard Business School professori Arthur Brooks ham tadqiqotlar olib borgan va uning ta’kidlashicha, inson o‘z ishi orqali haqiqatdan ham baxt topishi uchun shu ikki omil muhim rol o‘ynaydi.
Muvaffaqiyatni o‘zingiz yaratishingiz muhim. Inson qadrini bilmagan, mehnatini tan olmagan muhitda ishlasa, bu uni sust, befarq va tushkun qiladi.
Psixologiyada buni
«learned helplessness» («o‘rgatilgan nochorlik») deb atashadi. Boshqacha aytganda, odam nima qilsa ham natija bo‘lmasligini tushunsa, «Baribir hech nima o’zgarmaydi» qabilida ishlasa, intilishdan to‘xtaydi. Shuning uchun inson o’z ishida natija ko‘rish va tan olinishi shart. Bu unga kuch beradi.
Boshqalarga xizmat qilish ham o‘z o‘rnida juda muhim. Tadqiqotlar shuni ko‘rsatadiki, odam o‘zidan tashqari kim uchundir foydasi tegayotganini his qilsa, o‘z ishidan ko‘proq mamnun bo‘ladi. Eng oddiy misol – ish joyida hamkasbga kofe olib berish. Oddiy harakat, lekin odam o‘zini yaxshi his qiladi. Sinab ko’ring.
UC Berkeley tomonidan olib borilgan tadqiqotlar ham shuni tasdiqlaydi: odamlar o‘z manfaatidan tashqari, boshqalarga ham foyda keltirganda, o’z ishidan ko‘proq zavq oladi.
Ishda baxt topishning to‘rtta asosiy sharti bor: maqsad, ishga astoydil kirishishlik darajasi, chidamlilik va mehribonlik. Agar ishda inson o‘zini kerakli his qilsa, yangi narsalar o‘rganib rivojlansa, qiyinchiliklarga bardosh bera olsa va atrofidagilar bilan iliq munosabatda bo‘lsa, u o‘z ishini yaxshi ko‘rib boradi.
Baxtli xodimlar ko‘proq ishlaydi, kamroq xato qiladi, ijodkorroq bo‘ladi va ishdan chiqishni xohlamaydi. Kompaniyalar uchun bu muhim – odamlarning ketishi kamayadi, samaradorlik oshadi, mijozlar sadoqati ortadi.
Xulosa shuki, ish sizga faqat maosh emas, ma’no ham berishi kerak. Ishingizni yaxshilash, natija qilish, boshqalarga yordam berish – mana shular baxtni olib keladi. Agar ish qoniqish bermasa, uni o‘zgartiring yoki yangi ma’no kiriting. Pul topish muhim, lekin maqsad va ma’no bo‘lmasa, odam doim o‘ziga "bu ishni nega qilyapman?" degan savolni beradi. Javob topilmasa, natija ham bo‘lmaydi.
#hr #baxt #ish #corporateculture
🚀
@birfoizbilim — do’stlaringiz bilan albatta bo’lishishga arzigulik ma'lumotlar.
