Dardlarim dilim kuydirar,
Ulfatim koʻnglim toʻldirar.
Gʻanimim kunda oʻldirar
Onajonim kelmadingiz!

Toʻy qildim dushmanim keldi
Suymagan suyganim keldi.
Sogʻinib yigʻlagim keldi
Onajonim kelmadingiz!

Topolmadim sizdek sirdosh,
Dunyo ekan koʻp bagʻritosh.
Diydor talab koʻzimda yosh
Onajonim kelmadingiz!

Ruxsorlari oyim onam,
Armonlarga boyim onam.
Sogʻingandir debon bolam,
Onajonim kelmadingiz!

Sizsiz koshonalar vayron,
Yuragim sanchar beomon.
Sogʻindim-ku bugun yomon
Onajonim kelmadingiz!

Qabrimgizga boshin qoʻyib
Mirzo yigʻlar bagʻrin oʻyib.
Bir erkalang desam suyib
Onajonim kelmadingiz!