Davlatimiz rahbarining topshirig‘iga asosan Andijon viloyati bo‘ylab "Kambag‘allikdan farovonlik sari" dasturi asosida bir qator amaliy ishlar amalga oshirilmoqda.

Dastur ijrosini ta’minlash maqsadida Baliqchi tumanidagi Zaxkash mahallasida istiqomat qiluvchi ijtimoiy reyestrga kiritilgan, turmush darajasi og‘ir xonadonlar Andijon mashinasozlik instituti rektoriga biriktirilgan.

18-sentyabr kuni institut rektori Umid Turdialiyev ushbu mahallada bo‘lib, hokim yordamchisi Kozimjon Turg‘unov bilan birgalikda o‘ziga biriktirilgan oilalarning turmush sharoiti va ularni qiynab kelayotgan masalalarni o‘rgandi.

O‘rganish davomida fuqarolar S. U., N. T. hamda M. M.lar tikuvchilikdan xabari borligini, agar shaxsiy tikuv mashinalariga ega bo‘lganida uyda o‘tirib, daromad topish imkoniyatiga egaligini bildirishdi.

Ularning murojaatiga asosan subsidiya hamda tijorat banklari orqali imtiyozli kredit olishda ko‘maklashish belgilandi. Shuningdek, dastlabki aylanma kapitalni shaklantirishda hamda buyurtmachilarni topishda ko‘maklashadi.

Misol uchun, ularning birinchi buyurtmachisi institut bo‘lib, muassasa uchun talabalar turar joylariga choyshablar tikib beriladi. Buning uchun xizmat haqi to‘lanadi. Natijada ushbu ayollar dastlabki daromadga ham ega bo‘lishadi.

Rasmiy sahifalarimizga a'zo bo‘ling👇🏻

📱Sayt | 📱Telegram |📱 Facebook | 📱Instagram | 📱YouTube