Ma’lumki, O‘zbekiston Respublikasi Prezidenti huzurida 2024-yil 10-oktabr kuni texnik jihatdan tartibga solish sohasida amalga oshirilgan ishlar va kelgusidagi rejalar to‘g‘risida o‘tkazilgan taqdimotda 2025-yilda ishlab chiqarish korxonalarining 20 mingta rahbar va mutaxassislarini standartlashtirish va metrologiya sohalari yo‘nalishida malakasini oshirish bo‘yicha tegishli topshiriq berilgan.

Mazkur topshiriq ijrosini ta’minlash maqsadida, Andijon viloyatida faoliyat yurituvchi ishlab chiqarish korxonalari va tadbirkorlik subyektlarini jalb etgan holda navbatdagi o‘quv kurslari tashkil qilindi.

Agentlik hamda tizim tashkilotlarining malakali mutaxassislari tomonidan olib borilayotgan ushbu o‘quv seminarlari yakunida bitiruvchilarga sertifikatlar bilan birga xizmat ko‘rsatish bo‘yicha chegirmalar ham taqdim etiladi.

Zero, sohada sifat va samarani ta’minlash uchun zamonaviy bilim va ko‘nikmalarga ega, xalqaro standartlar asosida ishlaydigan mutaxassislarni tayyorlash eng muhim vazifadir.