Кириш
Осиғлиқ турибди деворда бир най,
Куйлари мум каби қолгандир қотиб.
Нуроний машшоғин ўн беш йил аввал
Шундоқ кўз ўнгида қўйган йўқотиб.

Сўнг… ҳеч ким чалмади, ҳатто ўғли ҳам,
Ушлаб ҳам кўрмаган набиралари.
Шундоқ кўз ўнгида кўммоқчи бўлиб,
Тинимсиз ёприлар чанглар най сари.

Аммо гард қўндими, сочиқни олиб
Уни артиб турар чолнинг кампири.
Ўн беш йил осилиб най қолди толиб,
Кампир ўлса қандай кечар тақдири?