***

Бир дийдорга интиқман, Худо,
Ибтидомдан интиҳом қадар.
Ташқаримда алдайман, – дунё
Чап қўлимда ёзилган дафтар.

Кафтларимдан нафас оламан,
Сўз қадалиб қолган кўзимга.
То сенгача сўнгсиз ёғаман
Ўзим ёмғир бўлиб ўзимга.

Кўрганимга дохил қошида
Кулги, йиғи – бори йўқ қарзим.
Ҳар тирикнинг еган ошида
Баҳор билан куздаги базм.

Йиғлаб олсин, тошга қулоқ бер,
Сайраётган қушлар камайди.
Юрагимда айланади ер,
Қуёш эса қимирламайди.