“Zulmatda hech kim ergashmaydigan shula’ ila yashadim va so’nggi kunimda o’zim yaratmagan bir shula’ tomon ergashdim…”

Voqea sodir bo’lganiga bir hafta bo’libdi, men endi ko’rdim.

Anglerfish- cho’ntak baliq yoki shula’ baliq okeanning eng tub qismida yashaydigan(chuqurlik 200-2,500metrgacha) , o’zida uzun shula’ taratadigan moddali organiga ega.

Bu orqali baliq o’ljani jalb qilib oziqlanadi. Okean tubi qorong’u va bunga adoptatsiya qilgan hayvonlar shula’ atrofida uzoq turmaydi.

Biologlar tasodifan bu baliqni, quyosh tomon tikkasiga chiqib kelayotganini video tasvirga olishgan. Bu keng tarqalib, millionlab odamlarni e’tiborini tortgan. Qisqa muddatda Pixar’ qisqa animatsion multfilm ham ishlab chiqardi. Chunki bu deyarli kuzatilmaydigan hodisa bo’lib, tub okeanda yashaydigan baliqlar quyosh tugul salgina yorug’likka ham salbiy reaksiya qiladi.

Zoologiya saytlari bu turni, “xunuk” , “qo’rqinchli” hayvon deb ta’riflaydi (National Geographic), BBC esa “qora maxluq”qa o’xshatadi.

Shunday bo’ldiki, bir hafta ichida anglerfish barchani hissiyotlarini o’ynatib yubordi. Mediada “anglerfish kabi yorug’lik tomon intil” , “orzuyingdan to’xtama” , “zulmatda qolma, yorug’lik tomon intilib chiq” kabi shov-shuvli matnlar ommalashdi.

Anglerfish quyosh tomon tikka chiqadi va bir muddat quyoshga qarab turadi. So’ng esa jon beradi…