📣 Kuni kecha davlatimiz rahbari raisligida investitsiyalarni jalb qilish va eksportni oshirish boʻyicha videoselektor yigʻilishi boʻlib oʻtdi.

Yil davomida amalga oshirilgan ishlar sarhisob qilinib, kelgusida nimalarga ahamiyat berish lozimligi belgilab berildi.

📌 2024-yilda:

Xususan, 2024-yilda yalpi ichki mahsulot 6,5 foizga oshib, 115 milliard dollarga yetdi, xorijiy investitsiya 1,6 barobar oʻsib, 34,9 milliard dollarni tashkil qildi, qiymati 10 milliard dollarlik 242 ta yirik va oʻrta loyihalar ishga tushdi, eksport ilk bor 27 milliard dollarga chiqdi.
Qayd etish kerak, 2024-yilda 100 million dollardan koʻp sarmoya kirib kelgan tumanlar soni 50 taga yetdi. Qiyoslash uchun 2023-yilda bunday tumanlar soni 11 ta edi. 6 ta tuman (Davlatobod, Yangi Namangan, Mirzo Ulugʻbek, Chilonzor, Shayxontohur) va 2 ta shaharda (Namangan, Samarqand) investitsiyalar miqdori 300 million dollardan oshgan. Shuningdek, togʻ-kon, neft va gaz, kimyo, qishloq xoʻjaligi sektorlarida reja 2 karra ortigʻi bilan bajarilganligini alohida taʼkidlash joiz.
Erishilgan natijalar bilan bir qatorda baʼzi sohalarda investitsiya rejasi yetarli darajada amalga oshirilmaganligi Prezidentimiz tomonidan tanqid ostiga olindi. Xususan, investitsiya “Oʻztransgaz” va “Oʻzmetkombinat”da 2 barobar, “Oʻzsuvtaʼminot”da 20 foizga pasaygani taʼkidlandi.

📌Shuningdek,

Prezidentimiz endilikda investitsiya boʻyicha yangi nazorat tizimi boʻlishi, bunda Bosh vazir bu yilgi 42 milliard dollar xorijiy investitsiya boʻyicha oyma-oy rejani tasdiqlashi hamda viloyat, shahar va tuman hokimlari, tarmoq rahbarlari haftada ikki kun investitsiya bilan shugʻullanishi, mutasaddilar hududlarga borib, tadbirkorlar bilan uchrashib, masalasini joyida hal qilishi shartligi belgilandi.
Videoselektor yigʻilishi davomida Prezidentimiz Sh.Mirziyoyev 2025-yildagi asosiy vazifalarga toʻxtalib, har bir tuman kesimida bajarilishi lozim boʻlgan indikatorlar toʻplami ishlab chiqilganligi qayd etdi. Unga koʻra joriy yil 27 ta tuman hokimi investitsiyani 200 million dollardan oshirish rejasini olgan, investitsiya rejasi
40 million dollarga ham yetmasligi koʻrsatib oʻtilgan Mirishkor, Koʻkdala, Boyovut, Bandixon, Uzun, Sherobod, Bekobod, Toshkent, Rishton, Gurlan tumanlari hokimlariga yangi loyihalar paketi shakllantirilib, kamida 100 million dollarlik rejani tasdiqlash vazifasi topshirildi. Kamida 200 ta tadbirkorni xalqaro moliya bozoridan 2 milliard dollar jalb qilishga tayyorlash maqsad qilib olindi.
Prezidentimiz yigʻilish davomida baʼzi tadbirkorlarni qiynab kelayotgan muammolarga ham eʼtibor qaratdi. Jumladan, 105 ta tadbirkorning bojxona omborlarida saqlanayotgan 110 million dollarlik uskunalarini egalariga yetkazish boʻyicha “yoʻl xaritasi”ni tasdiqlash vazifasi topshirildi.
Yigʻilishda paxta yetishtirish va qayta ishlashda ham qoʻshimcha bozor mexanizmlari joriy qilinishi qayd etildi. Shu yildan boshlab, klasterlar paxtaga talabi va narx taklifini birjaga qoʻyadi, fermerlar esa oʻziga maʼqulini tanlab, fyuchers shartnomasini tuzadi. Imtiyozli kredit olmay, oʻzi paxta yetishtirgan fermerlarga birjada sotgan paxtasining 10 foizi miqdorida subsidiya beriladi. Imtiyozli kreditni 31-dekabrgacha toʻliq qaytargan fermerlarga kreditning 4 foizi qaytarib beriladi.
Bu, albatta, fermerlarimiz daromadini oshirishda muhim ahamiyatga ega.

Prezidentimiz belgilab bergan ushbu vazifalari , barqaror investitsiya muhiti, fermerlar va tadbirkorlar bilan yaqindan hamkorlik, bu yoʻnalishda yangi loyihalarni amalga oshirish Oʻzbekistonning kelgusi iqtisodiy muvaffaqiyatlari uchun muhim poydevor yaratadi.

🔗 Kun mavzusi