❗️
SADRIDDIN AYNIY BIR KUNI
Kuyov ortiqcha

Sadriddin Ayniy o‘zbek va tojik adabiyoti ravnaqiga salmoqli hissa qo‘shgan atoqli yozuvchi edi. Zamondoshlarining xotirasiga ko‘ra, adib hayotda o‘zining mashhur qahramoni, xasislik timsoli Qori Ishkambaga ham ozroq o‘xshab ketarkan.
Kunlardan bir kun Ayniy domla qizini turmushga chiqaradi. To‘y ixchamgina, ortiqcha dabdabasiz, kamtarona o‘tadi. Oradan ko‘p o‘tmay, qudalar tomondan bir vakil kelib, yozuvchi bilan muzokara boshlaydi.

- Domla, siz qudalar bilan kuyov chaqiriq qilmaslikka kelishgan ekansiz. Lekin kuyovbola bunga rozi bo‘lmayapti. Hamma jo‘ralari kuyov chaqirdi qilishgan ekan. Ular oldida uyalib qolaman deyapti. Shunga siz nima deysiz?
Ayniy uzoq o‘ylangach, axiyri yon berib, taklifga ko‘nadi.
- Mayli, roziman. Kuyovni payg‘ambar siylagan. Ammo bitta shartim bor.
- Qanday shart ekan?
- Men faqat o‘nta odamga tayyorgarlik ko‘raman, shuni aytib qo‘yasiz.
- Xo‘p bo‘ladi, domla, bu yog‘idan xotirjam bo‘ling.

Nihoyat, belgilangan kuni kuyov tomondan jo‘ralar kelishadi. Domlaning o‘zi mehmonlarni ostonada kutib olib, bittadan, xuddi qo‘y sanagandek sanab o‘tkaza boshlaydi. Jo‘ralar o‘n bitta ekan, domla kelishuvga binoan oxirgi - ortiqcha mehmonni ichkariga qo‘ymaydi. Keyin mehmonlar o‘tirgan xonaga kirib mundoq qarasa, kuyovto‘raga tayyorlangan maxsus joy bo‘sh turganmish. Ma’lum bo‘lishicha, ko‘chada qolgan yigit kuyov ekan.

Shodmon Otabek
"Do‘rmon hangomalari" kitobidan

✅Jadid.uz’ga obuna bo‘ling