*   *   *
Игнадай ялтиллар дарахт шохлари,
шамолда ип каби чувалашар нур,
кўл юзида гўё улкан кўзойнак,
муз остида сувдек тиниқдир шуур.
 
Тиниб-тинчимайди Табиат момо
сандалга оқ кўрпа ташлаган кўйи
бўй етган шўх-шаддод қизига атаб
сеп тикиб чиқади бутун қиш бўйи.
 
Тўқсон кун кўз очиб-юмгунча ўтар,
ташвиш аригандек эриб битар қор.
Бир тонг зеб бағишлаб сепга, қирларга
югуриб чиқади эрка қиз – Баҳор.

© Икром ИСКАНДАР