Tugadim, tugatdim, tinmadim goho,
Siyladim o‘zimni dunyolar bilan.
Asradim baxtlardan ikki ko‘zimni,
Tegramda chayqalib raqs tushdi tuman.

Savolsiz izillab sang‘idim uzoq,
Jumboqlar mushtladi ma’sum boshimga.
O‘zimni atadim eng mushfiq odam
Yolvorib borganda yorning qoshiga.

To‘kildim, uzildim, titildim davom,
Mavjud dardlarimga yukingan ko‘yi.
Ko‘nglimni o‘zimcha kemirdim tinsiz -
Mendan kelaverdi g‘amlarning bo‘yi.

Boshimni qo‘ygani vujud topmadim,
Onam tizzasidan uzildim tamom.
Xayolga ergashib, hayot sovruldi,
Otam o‘ylaridan tong otgan oqshom.

Borarim, so‘rorim, bo‘zlarim O‘zi,
Peshonam bog‘ladim maysalar bilan.
Chechaklar tergali qirlar izladim -
Tushimda tebranar lolalar hamon.

Tutildim, sitildim, bitildim qadar
Yozolgan qo‘shiqni kuyladim faqat!
Men tunga atalgan emasdim, ammo,
Tonggacha yetmadi mendagi toqat...

Tinmadim, bilmadim, ko‘nmadim davom...

@FeruzaXayrullayeva