КИБР
----------------------------------------------
Мосуво бўлди Худо даргоҳидан,
Ул Азозил- номидир шайтон кибр.

Қўзғолиб арслон мисол боргоҳидан,
Бўлди қувғин, қилди кўп исён кибр.

Кибру ҳаво-бедаво дард , во ажаб,
Боқ бугун, бул ён кибр, ул ён кибр.

Кўшк-саройлар ҳайбати осмон қадар,
Авжига чиқмиш,ҳамма ҳайрон кибр.

Ер-улов, осмон -учоқ измида лол,
Тўй-ҳашам,хайру сахо, эҳсон кибр.

Кибру манманлик юриб-турмоғимиз,
Бош -оёқ ҳой-ю ҳавас бул он кибр.

Кибр оти устида шайтон лашкари,
Махв этар, нафсу балойи жон кибр.

Усмоно, аслингки туфроқ жинсидан,
Оташ ўлма,кул қилур осон кибр.

БОБОҚУЛ УСМОН