НУРАЛИ ҚОБУЛ ҲИКМАТЛАРИ
( “Султоннинг сўнги куни ёхуд
Амир Соҳибқирон ва Тўхтамишхон”.
Тарихий роман. Тошкент, “Камалак”, 2014)
• Ношукурлик деган хасталик одамнинг қон-қонига сингиб кетса, уни даволаб бўлмайди.
• Кишилар ўз нуқсон ва хатолари олдида кўру кар бўлмасликлари керак, токи бу ҳолат уларни чоҳ томон етакламасунлар.
• Ҳар неки бор, сўнгги йўқлик. Эга бўлажагимиз эса бир чўнтаксиз кафандир.
• Ҳеч қачон халқумингизга эрк бериб, одамлардан ортиқ луқма ўтказманг.
• Кимки жоҳил бўлса, бир кун келиб адолатнинг қўлида жон беради.
• Насиҳатни тинглаб ундан ҳақиқатни ажратиб ола билган одам донишманддир.
• Ҳаддидан ошмасин, дея Яратган ҳар бир инсонни бир томондан қисиб қўяр экан.
• ...Жоҳилият замонида қудратли қўшинсиз тинчликка эришиб бўлмайди.
• Дунёда тарих сабоғидан буюк муаллим йўқ.
• Ҳокимият чўнтагингдаги қанд эмас, у курашиб олинади.
• Сиёсатда ҳақу-ноҳақ бўлмайди. Кучли ва кучсиз бўлади. Андаваю аравани шунга қараб тортмоқ керак.
• Шоирлар аслида инсоният етишмоғи мумкин бўлмаган хаёлий орзу-умидлар оламининг шоҳларидир. Чексиз армон ва илинж туйғуси кишини шоир қилади.
• Ўзини билган одамга шайтон доримас.
• Иймонсизга эрк берсанг, элни талар.
• Илму билимсиз қилинадиган амаллар жоҳилнинг ибодати кабидир.
• Оч ит қутурмайди.
• Одамнинг қорни қаппайгани сари кўзи қисилади.
• Танасини бошқара олмаган эркак, руҳини ҳам назорат қила олмайди.
• Аёл муҳаббатини қирқ йил сир тутиши мумкин, бироқ нафратини бир дақиқа ҳам яшира олмайди.
• Иймоннинг ярми сабр, ярми шукурдир.
• Қўш хотинли хонадонда уй супурилмайди.
• Тушинг ўнгланмай, ишинг ўнгланмайди.
• Сиёсат қўлда балиқ тутишдек гап. Қўлингдан сирғалиб чиқиб кетаверади.
• Ватанни севган кишига унинг тоши олтин, тикони чечак каби туюлади.
• Кўнгил душман дейдилар. Кўнгил тусаган нарсани қилаверсанг, кўнгил нималар тусамайди...
• Балчиқда илдиз ахтариб юрган тўнғизлар тепага чиқиб ўтирган давраларни хуш кўрмайман.
• Агар қайсидир динда бутун инсониятни ўз таълимотига бўйсундириш даъвоси туғилдими, у зулмга айланади.
✍️Имомқул ТУРДИБОЙ ўғли (Имомқул Нуринов),
маданият ходими
Каналга уланиш ⬇️
https://t.me/MuhammadaliAhmadUz