Sifatli ta'lim yilida yangi ta'lim vaziri bilan omadimiz keldi deyishga ikkilanadi odam. Yuqori malakali, xorij tajribasini olgan shaxs deyishimiz mumkin biroq o'qish boshlanishi yuzasidan bekor qilingan, qabul qilingan qarorlar sifatsiz ta'limning g'alabasi bo'ldi, afsus.
Masalan, maktablarda davomatni olishdan boshqani bilmaydigan rahbarlar ham hozir sinfga 30 ta bolani o'tirgizib qo'ya olmayapti. O'quvchilar sovuq bahona darslarga tikka qo'yib qo'ydi. Mayli, 11, 18, 16, 23-raqamlari hozirgi diaspora uchun esdalik.
Bitta narsani bilib olaylik, ta'limni isloh qilish bu xolva tarqatish yoki minbarlarda jarangdor so'zlarni aytish emas. Bu botqoqqa botgan mashinani juda kam resurslar yordamida tortib chiqishdek gap.
Bizda kishi boshiga YIM oyiga nari borsa, 100 dollardan tushadi. Ta'limga oid qarorlarni esa Amerika fuqarosidek qabul qilishadi. Afsuski, kambag'al davlatda yashaymiz va siz xohlagandek sharoitda maktablar qurib berishga qurbimiz yetmaydi. Cho'ntakka ketayotgan, bekorga sarflanayotgan barcha pullarni ta'limga tiksak ham kunning oxirida kambag'al mamlakatmiz.
Nodirbekning fikrlariga qo'shimcha qilmoqchimanki, biznikilar joriy etmoqchi bo'layotgan ta'lim tizimi rostan ham bizga "o'tirmaydi". Masalan, Singapurning ta'limga ketkazgan puli bizdagi butun davlat byudjetidan ko'proq. Shuning uchun ularda ta'lim sifatli, bizda esa sifatsiz.
Finlandiya, Singapur, Yaponiyadan andoza olishimiz g'ishtni qolipi bilan guvala quyishga o'xshaydi. Tushuning, ulardagi moliyaviy imkoniyatlar bilan biznikida farq katta. Odamlarimiz bir-biri bilan hatto nima yeyishini ham solishtirganidek, vazirlikdagilar tizimni boshqa davlatlardan olishga urinishi achinarli.
Xullas, sifatli ta'lim qimmat turadi, bu uchun pul kerak. Pul kelishi kuchli iqtisodiyotga bog'liq, bu esa avvalo yuqoridagilarni qadamiga, so'ng har bir fuqaroga bog'liq. Tuyaqushdek boshimizni qumga tiqmasdan vaziyatga tik qarashimiz kerak.
@legal_mind
