Doctor's Mind 👩‍⚕️

​​#taqriz

Bir necha kun oldin Pingvin books (Qamar books) farzandlarim uchun bolalar kitoblarini sovg’aga yuborgandi. Shu kitoblarning bir nechtasini o’qib chiqdik. Ayrim fikrlarimni sizlar bilan bo’lishmoqchiman.
Kitoblarni o’qiganim sari o’ylanib qolyapman, bolalar uchun chiqarilgan kitoblarda ba’zida kattalar ham bilmaydigan, tushunmaydigan haqiqatlar ko’rsatib berilgan. Masalan, “G’oz albi” kitobini olaylik. G’ozlar oilasida 3 ta g’ozcha dunyoga keladi. Ulardan biri ya’ni Albi ismli g’ozning rangi boshqalarga o’xshamasdan ajralib turadi ya’ni oq rangda bo’ladi( Nom tanlanganda ham bekorga Albi nomi tanlanmagan, chunki albi so’zi lotin tilidan tarjima qilganda oq degan ma’noni bildiradi). Uni o’zlarining ranglariga o’xshatish uchun nimalar qilishmaydi deysiz? Bo’yoq bilan bo’yab ko’rdilar, lekin yomg’ir yog’ganda yana asl rangiga qaytib qoldi. O’zlarining ranglariga o’xshash palto tikib berdilar, biroq yozda Albi issiq paltoda yura olmadi. Shunda ham Albini o’zlariga o’xshatish qarorlaridan voz kechmadilar. Turli xil bo’tqalar tayyorlab unga yedirdilar. Xullas, har safar biror usulini topishga harakat qilardilar, lekin bu g’oz Albi uchun og’riqli va qiyin jarayon bo’lardi. Bularning bari joniga tekkan Albi dunyo bo’ylab safar qilishga qaror qiladi.
Bir bolaligingizni eslab ko’ringda, qaysidir odatingiz yoki biror tana a’zoyingiz boshqalarga o’xshamagani uchun o’zgartirishga harakat qilganmisiz? Sizni boshqalarga o’xshamaganingiz uchun normadan tashqaridagi inson sifatida ko’rishganmi?

Nafaqat bolalar balkim ayrim kattalar ham ba’zida xarakter, odat yoki tashqi ko’rinishlaridagi biror o’zgachalik sababli o’zlarini noqulay his qiladilar. Jamiyat qo’ygan talablarga mos tushishga, boshqacha aytganda bir chiziqdan og’ishmay yurishga harakat qiladilar. Lekin… Lekin degani shuki, sizning o’zgacha odatingiz bu - norma, o’ziga xos qomatingiz bu - norma, boshqalarga o’xshaymaydigan yuz tuzilishingiz bu - norma.
Kitobni nafaqat bolajonlar, balkim kattalar ham o’qishini xohlardim. Bolajoningizga boshqalardan ajralib turish odatiy holat ekanligini kichkinaligidan tushuntirib borishingiz kerak. Meni yana quvontirgani, kitob oxirisida voqea haqidagi turli xil savollar yozilgan bo’lib bolajoningizni qanchalik darajada tushunganini sinab ko’rishingiz mumkin.
Shunaqa, ba’zida kichkina bolajonlar kitoblari ham shunaqa ulkan haqiqatlarni singdira oladi)

@doctorsmind📖

​​✍️Meri SHelli
📖”Frankenshteyn”

Insoniyat yaralibdiki, hayotning paydo bo’lishi haqidagi savollar u bilan doimo yonma-yon yuradi. Shu paytgacha qanchadan-qancha olimlar bu mavzu ustida bosh qotirib kelmoqdalar, lekin azaliy jumboqlarning yechilganlaridan ko’ra yechilmaganlari bir olam. Navbatdagi o’qigan kitobimning bosh qahramoni ilmga mukkasidan ketgan yosh olim Viktor Frankenshteyn ham o’limni yengishga intiladi, hayot qonunlarini o’rganadi, sirli vositalar orqali yangi mavjudotni jonlantiradi. Lekin… Dunyoga kelishiga sababchi bo’lgan mavjudoti insondan ham chidamli va baquvvat edi, ammo o’ta badbashara edi. Frankenshteyn bu mavjudotni ko’rishi bilan undan voz kechadi, yaratilgan mavjudotning keyingi taqdiri haqida o’ylab ham o’tirmaydi. Uning jirkanch ko’rinishi Frankenshteynni aqldan ozdiradi, shuncha oylik mehnatining natijasi kutilganidek chiqmaganidan hafsalasi pir bo’ladi.
Mahluq ham o’z hayotini davom ettiradi, o’z imkoniyatlarini ishga solgan holda gapirish, o’qish, yozishni o’rganib oladi, odamlarga yaxshilik qiladi va ular bilan birgalikda yashashni istaydi. Tabiiyki odamlar bunday badbashara mahluqni qabul qilmaydilar. Uni haydab soladilar. Biz bilamizki, har qanday mavjudot ham yolg’izlikda yashay olmaydi, o’z jufti va sheriklari bo’lishini xohlaydi. Mahluq esa atrofdagilar tomonidan tan olinmaydi, ketma-ket rad etilishga uchraydi. Bu esa undagi agressiyani kuchaytirib yuboradi va keyinchalik esa bir nechta yomon voqealarga olib keladi.

Asardan quyidagi muhim xulosalarni olish mumkin:
1.Oqibati aniq bo’lmagan har qanday bilim va ilmga bo’lgan telbanamo kuchli intilish har doim ham yaxshilik bilan tugamaydi. Bu Frankenshteyn kabi surunkali azob va fojiaga olib kelishi mumkin. Har bir kashfiyotning chegarasi bo’lishi kerak. Bu insonning ruhiyatiga ham salbiy ta’sir o’tkazishi mumkin(bu albatta shaxsiy fikrim)
2.Tashqi ko’rinish jamiyat uchun asosiy omillardan biri. Har doim o’zgacha yoki farqli insonlar odamlar tomonidan qabul qilinishi qiyin bo’lgan.
3.Odamlardan alohidalanish yoki ulardan o’zini olib qochish har doim ham muommoga yechim bo’la olmaydi. Asarda Frankenshteyn hatto yaqinlaridan ham qochib yuradi, mahluq esa odamlarga intiladi. Kuchli alohidalanish ham kuchli intilish ham zararli bo’lishi mumkin.

Asar ilmiy fantastikaning ajoyib namunalaridan biri, aynan hayot, yaratilish va diniy bilimlar endi shakllanayotgan vaqtda ko’plab munozaralarga sabab bo’lgan. Frankenshteyn Xudoning yarata olish qobiliyatini olib qo’yishga intilgan va haddidan oshgan inson sifatida ayblanadi. Bundan tashqari asarda Frankenshteyn tomonidan yaratilgan mahluq uning o’zi tomonidan Iblis deb ataladi. Mahluqning jamiyatdan haydalishi va yolg’izligi Odam Ato va Havo hikoyasidagi quvilish bilan bog’lanadi. Bundan tashqari asar ilm-fan va din o’rtasidagi azaliy qarama-qarshiliklarni ham ko’rsatib beradi. Frankenshteyn misolida ilm-fan va din o’rtasidagi muvozanat ochib beriladi. Tavsiya qilaman.

@doctorsmind📖

​​Ikki kun davomida shopper’imni kitoblarga to’ldirib yurib, mana hozirgina oxirgilarini pochtadan chiqarib yubordim. Kechadan beri bir nechta pochta xizmatlaridan foydalandim: EMU, Starex, BTS. Ushbu post orqali sizlarga ikki kunlik pochta bilan bog’liq sarguzashtlarim va barcha pochta xizmatlari haqidagi xulosamlarimni aytib bermoqchiman.
Dekabrda @quyoshtaraflarda bilan o’tkazgan tanlovimizning bir nechta g’oliblariga, sovg’a uchun va yana boshqa sabablar tufayli kitob yuborishim kerak edi. O’zim odatda EMU pochtasini yaxshi ko’raman va shu pochta xizmatidan ko’p marta foydalanganman. Bu safar kitobni qabul qilib oluvchilar pulini to’lashi kerak bo’lgani uchun, ularga arzonroq bo’lsin deb Starex pochta xizmatidan foydalanishni
lozim topdim. Starexdan avval pochta qabul qilib olganman, lekin hech qachon yuborib ko’rmaganman. Birinchi kun pochtaga borsam o’zingiz paket bilan upakovka qilasiz, ilovadan ham o’zingiz ro’yxatdan o’tkazasiz, shunda pochta puli besh ming so’m bo’ladi deyishdi. Yetmaganiga pochtaning eson-omon borishiga o’zingiz javob berasiz deyishdi) Bunaqasini avval ko’rmaganimga g’alati tuyildi, keyin o’zim pul to’lashim kerak bo’lgan kitoblarga pul to’lab chiqarvordim. O’zi pul to’lab olishi kerak bo’lgan odamlarning oldida xijolat bo’lmay deb ilovani va qadoqlash tartibini so’rab bilib oldim. Bugun esa o’zim ilovadan ro’yxatdan o’tkazib, paketga solib, kitob zarar ko’rmasligi uchun skoch bilan mustahkamlab qo’lbola upakovka qilib olib keldim) Hattoki ustiga yopishtiriladigan etiketkalarigacha o’zim yopishtirib chiqdim) Endi qabul qilib oluvchilar uchun arzon narx bo’ldi. Starex pochtasini bir vaqtlar kitoblarni yetkazib berish uchun pul olmaganliklarini haqida eshitgandim. Bu albatta vaqtinchalik marketing usullaridan biri bo’lgan. Shu bahona pochtaning har bir bosqichini bilib oldim. Yuqorida yozganimdek, bugun EMU pochta xizmatidan ham foydalandim, ushbu pochta menga ishining tartibli ekanligi bilan yoqadi, xodimlari ham har bir savolingizga erinmasdan javob berishadi. Ko’pchilik bu pochtani biroz qimmatroq deyishadi, lekin xizmat ko’rsatish a’lo darajada. Xuddi shunday BTS pochtadagilar ham tartibli xizmat ko’rsatishadi, bir marta pochta yuborganimda oluvchi tarafda muommo bo’lganda ham erinmasdan xushmuomalalik bilan tekshirib berishgandi.
Starex pochtani yomon deyolmayman, biroq arzon narx qo’yilgani bilan tartibsizliklar bor. Besh ming so’mga yuborgan tanishlarim ham hech qachon upakovka qilmaganmiz deyishdi) Bundan tashqari chekkaroq hududlarda hali yetarli darajada ofislari yo’q, bugun ham bitta pochtani chekkaroq joyga yuborishim kerak edi. U joyda ofislari bo’lmagani uchun EMUdan chiqarib yubora qoldim.

Xulosam shuki: agar kimgadir sovg’a yuborishim kerak bo’lsa chiroyli upakovka qildirib qimmat bo’lsa ham doimgidek EMU yoki BTS pochtadan yuboraman. Yo’lkira narxini oluvchi to’laydigan vaziyatlarda esa Starexdan qo’lbola, xunukroq o’rab bo’lsa ham jo’natib yuboraveraman.

Siz ko’proq qaysi pochta xizmatlaridan foydalanasiz? Qaysi birining xizmat ko’rsatishi ma’qul bo’lgan? Qaysilariniki esa ma’qul bo’lmagan va nima uchun?

Aytgancha, rasmda men o’ragan pochtalarni ham ko’rishingiz mumkin)

Yana bir gap, Fargo va UzPost pochtalaridan faqat qabul qilib olganman. O’zim biror marta pochta chiqarmaganman, shuning uchun bu pochtalarning narxi haqida nimadir deya olmayman. UzPostdan pochtam juda sekinlik bilan kelgan, lekin viloyatlardagi chekkaroq joylarga yuborishga qulay pochta deyishdi.

@doctorsmind📖

​​✍️Men tan olaman:

Mohichehradan ilhomlanib men ham o’zimnikini yozib chiqdim)

–Yangi kitoblarning hidini yaxshi ko’raman.(eski kitoblarni noyob kitob bo’lsagina xarid qilishim mumkin)
–Kitob o'g'irlamaganman.
–Qahva ichib kitob o’qishni yoqtiraman, ba’zan kitobga berilib ketsam sovib qolgan qahvani ichishga majbur bo’laman)
–Transportda o’qiyotganimda xatcho’p topilmay qolsa pul, plastik kartam va cheklarni ham kitob ichiga solib qo’yishim mumkin)
–Hech kimni kitob sovg'a qilishga majburlamaganman.
–Kitob sovg'a qilishni ham, sovg'aga olishni ham yoqtiraman.
–Kitobdagi voqealar haqida gapirganda hissiyotlarga berilib gapirishimni tan olaman)
–Hozir ko'proq klassik asarlar o'qiyapman.
–Avvallari faqat qattiq muqovalarni sevardim, hozirgi kunda yumshoq muqovalarga ham shaydoman.(Ayniqsa AsaxiyBooks’ning yumshoq muqovali kitoblariga)
–Hozir deyarli she’r o’qimayman (Farzandlarimga she’r yodlatish kerak bo’lgan vaqtda ularning she’rlarini o’qib yod olishimni hisobga olmasa)
–Men ham shovqinda kitob o’qiy olaman(avtobus, metro shovqinida ham asar ichiga kirib keta olaman)
–Zamonaviy turk adabiyotidan avval o’qiganman, hozir bunday asarlarga vaqtimni qizg’onaman.
–Badiiy kitoblarni ko’p o’qiyman, lekin ilmiy-ommabop kitoblarni ham yoqtiraman.
–Ko’p bookbloglarga a’zoman, lekin oxirgi paytlarda ularning har bir postlarini o’qiy olmayman(vaqt masalasi chatoqda)
–Kitoblarni estetik holatda rasm va videoga olishni sevaman. Har bir olgan video va rasmim uchun anchagina ter to'kaman. Shunchaki rasmga olib ketmayman.
–Audio variantdagi kitoblarni uyda ish vaqtida ko’p eshitaman.
–Pdf kitoblarni anchadan beri o’qimadim.
–Kitob do’konga kirib biror marta ham kitobsiz chiqmaganman)
–Galeriyamning katta qismini o’zim olgan kitobli rasm va videolar egallagan.
–Instagram va telegram bloglarimda faqat o’zim olgan video va rasmlardan foydalanaman.
–Sumkamda o’zim bilan doim kitob olib yuraman.
–Kitoblar asosida suratga olingan filmlar menga ko’p hollarda yoqmaydi.(Ular qisqartirilgan yoki bo’rttirilgan bo’ladi)
–Diniy kitoblar o’qiyman.
–Kitobni tugatganimdan keyin kitobning oxirisiga tugatgan vaqtimni albatta yozib qo’yaman.

Siz ham o’zingiznikini yozib qoldiring, kanalingiz bo’lsa challenge’ni davom ettiring! Xohlasangiz shaxsiy odatlaringizni ham qo’shib yozing!

@doctorsmind📖

​​✍️Aleksandr Dyuma
📖"Jallod changalidagi oshiqlar”

Aleksandr Dyuma nomi barcha kitobxonlar uchun juda yaxshi tanish, kitobini o’qimagan bo’lsalar ham hech bo’lmaganda uning “Graf Monte Kristo”, “Uch mushketyor” asarlari asosida suratga olingan filmlarni ko’p marta tomosha qilishgan. Hozir esa sizlarga uning ko’pchilik eshitmagan(o'qimagan) yana bir asari haqida aytib bermoqchiman. “Jallod changalidagi oshiqlar” romani hokimyat tepasiga Napoleon Bonopart kelgungacha bo’lgan davrni ya’ni fransuz inqilobi va inqilobdan keyingi tartibsizliklar yuzaga kelgan davr voqealarini ko’rsatib beradi. Mamlakatda fransuz monarxiyasi tugatilish arafasida, qirol Lyudovik XVI qatl etildi, lekin hali ham monarxiya tugatilishini xohlamaydigan sirli guruhlarning harakatlari davom etmoqda. Ular qirolichani qutqarish harakatidalar. Aynan mana shu sirli guruhning a’zosi Jenevyeva va ashaddiy respublikachi Moris Lende o’rtasidagi muhabbat voqealari esa tarixiy voqealarga badiiy tus bera olgan va aynan mana shu ikki insonning harakatlari asarga o’ziga xos intrigani ulasha olgan. Hayotiy qarashlari va maqsadlarining xilma-xilligi ham bu ikki yoshning yaqinlashuviga to’sqinlik qila olmagan.
Dyuma o’sha davr haqiqatlarini ochib bera olgan, lekin noaniqliklar talaygina. Asarga badiiy sayqalni ko’p berib yuborgan, nazarimda. To’g’ri, asar mavzusi dolzarb lekin to’liq ochib berilmagan. Bekorga uning bu asari “Graf Monte Kristo”, “Uch mushketyor”, “Askanio” asarlari panasida qolib ketmagan ekan. Tarixdan bexabar insonlar uchun biroz tushunarsizroq tuyilishi, tarixdan xabardor insonlarga esa asar voqealari biroz g’alati tuyilishi mumkin. Umuman olganda, asar yomon emas, balkim o’zim juda katta taassurotlar kutib xato qilgandirman. Yaxshisi, o’zingiz o’qib ko’ring! Tarixga qiziqadiganlar uchun yaxshi tanlov.

@doctorsmind📖

https://mywishlist.online/w/wmucb3/dildoras-wishlist

Yangi yil oldi “Bookblogerlar jamiyati” a’zolari bilan birgalikda “Secret Santa” o’ynayapmiz. Sovg'a beradigan odamimizni bilamiz, lekin bizga sovg'a yuboradigan inson kimligini bilmaymiz.

Har kim o’z Santasiga yordam sifatida wishlist’ini tuzib chiqqan edi. Men ham o’sha paytda shoshilinchda bir nechta kitoblarni tez-tez kiritgan edim, lekin hali sovg’alarim kelmadi)
Kutamiz…

@doctorsmind📖