​​​​​​АССАЛОМУ АЛАЙКУМ

Қалби иймон нури-ю, Аллоҳ ишқидан ёниб,
Бомдодга кеч қолмай деб, ҳар лаҳзасин қизғониб,
Юрагида энг эзгу ният билан уйғониб,
Ният бирла дуога қўл очганлар, Ассалом!

Саси келмоқда  ана, шодон кунлар куйининг,
Ёруғ кунлар яқиндир, қувончланинг, суюнинг,
Эшиклари очиқдир қутлуғ Аллоҳ уйининг,
Қалбан масжид томонга йўл очганлар, Ассалом!

Оят-ул ҳидоятла қувват бериб иймонга,
Дилда муножотини айтиб қибла томонга,
Қилиб эзгу амаллар, кўнгил бериб Раҳмонга,
Шайтон йўлидан ортга даст қочганлар, Ассалом!

Кетмоқ учун биродар, фосиқ йўллар кўп жуда,
Гуноҳга етакловчи ёв кўнгиллар кўп жуда,
Санайверсак дунёда нотинч эллар кўп жуда,
Тинч юртнинг тинч тонгидан сув ичганлар, Ассалом!

Етдик минг шукур яна қутлуғ, муборак моҳга,
Уйғонинг, ғафлат бирла қолманг оғир гуноҳга,
Уйқудан уйғотишни унутмаган Аллоҳга,
Ҳамду санолар айтиб қўл очганлар, Ассалом!

Ўлмасбек Самарқандий.

@Samarqandiy77