Кетишингни билгандим, рости,
Шунинг учун севганман сени.
Ҳижрон билан ёлғиз қолдириб,
Қандай бахтли айладинг мени.

Ишқ - висолдан кеча олмоқлик,
Ошиқларнинг бахти фироқда.
Мен шунчалар узоқ севаман,
Сен қанчалар бўлсанг йироқда...

Сен қуёшдек балқиб юравер,
Сен қанча яшнасанг оз, гулим!
Гул эканинг рост бўлганидек,
Менинг япроқлигим рост, гулим!

Сенга олислардан термулгум,
Ишқ берган шу ризқни олдим тан.
Сен мангу баҳорсан, тушунгин,
Мен эса куздирман, куздирман...

(с)Шуҳрат Ориф