📚 КУНЛИК ҲАДИС | Расмий канал 🌙

НАВОИЙ ВА РАСУЛУЛЛОҲ


Юзунг гулиға кўнгул равзасин яса гулшан,
Қадинг ниҳолиға жон гулшанин чаман қилғил.
 
📜 Шарҳ: “Гулдек гўзал юзларингиз ташрифи билан менинг кўнглим боғчасини гулшан қилинг, Ниҳол каби қадингиз жоним гулшанини чамандек яшнатиб юборсин”.
 
Такаварингға бағир қонидин ҳино боғла,
Итингға ғамзада жон риштасин расан қилғил.
 
📜 Шарҳ: “Меърож кечаси осмонларга кўтарилар экансиз, такаварингиз – Буроқнинг –туёқларига менинг жигарим қонини эзиб, ҳино қилиб боғланг, чунки Сиз энг улуғ бир сайрга чиқдингиз. Сайил - байрам кечаси, одатга кўра, қўлларга, оёқларга ҳино боғланиб, безанилади”.

Севимли Пайғамбаримиз алайҳиссалом ҳаётлари тарихини диққат билан ўрганган улуғ шоир Отдан сўнг ит ҳақида сўзлаш билан бир воқеа тафсилотига ишора этади. Саҳиҳи Муслимда келган 2104 - ҳадисда Оиша онамиз (р.а.) шундай ривоят қиладилар: Бир куни Расулуллоҳга Жаброил алайҳиссалом қайси вақтда ҳузурларига келишини айтиб ваъда берди. Аммо ўша вақтда келмади. Жаброил алайҳиссалом келганларида Расулуллоҳнинг қўлларида бир таёқ бор эди, ўша таёқни ташладилар-да:“Аллоҳ ҳам, унинг элчилари ҳам ваъдасига хилоф қилмайди-ку”, дедилар. Жаброил алайҳиссалом: “Мен ўша куни келдим, аммо Сизнинг уйингизда ит бор эди, биз фаришталар ит бор уйга кирмаймиз”, дейдилар. Расули акрам ўша куни бир “сарир” - чорпоя сўриларида ётганларида, сўрининг тагига бир кучукча кириб қолади. Шуни кўриб, уйга фаришта кирмайди.  Расулуллоҳ соллаллоҳу алайҳи васаллам билиб қолиб, итни чиқариб юборадилар, шундан сўнг Жаброил алайҳиссалом Пайғамбаримиз ҳузурларига келади. Улуғ шоир илтижоларида: “Менинг ғам чекавериб зада бўлиб кетган ипдек жонимни ўша кучукчанинг бўйнига боғлаб, чиқариб юборинг, шўхлик қилмасин”, демоқдалар.

Расулуллоҳ ҳаётларида ит билан боғлиқ бошқа бир воқеа бўлганлиги ҳақида ҳам хабар берилади. Ибн Аббос ривоят қилган ҳадисда шундай дейилади: Расулуллоҳ очиқ жойда намоз ўқиётганларида олдиларидан бир ит ўтиб кетади. Ул зот намозни қайта ўқимайдилар. Шу муносабат билан намоз ўқиётган одамнинг олдидан ит ўтса, намоз бузилмайди, қайта ўқилмайди, деган ҳукм қолади. Навоий ҳазратлари шу воқеага ишора қилиб: “Намоз - мўминнинг меърожидир. Севимли Пайғамбаримиз алайҳиссалом Яратган Парвардигор билан сўзлашиб турган пайтларида мабодо ит яқинлашса, дарҳол тутиб, унинг бўйнига менинг ғамлар чекавериб ипдек бўлиб қолган жонимни боғланг, токи севимли Расулуллоҳ озор чекмасинлар”, демоқчи бўлгандирлар, каби мулоҳаза ўйғонади.

Филология фанлари доктори, профессор Дилором Салоҳий

┄┄┄┄┄❅┄┄┄┄┄
📚 KУНЛИК ҲАДИС

АЛИШЕР НАВОИЙ ВА РАСУЛУЛЛОҲ ВАСФИ


Буюк мутафаккир, шоир ва давлат арбоби Мир Алишер Навоий ижодидан бир шингил:

Қаро кўзум, келу, мардумлиғ эмди фан қилғил,
Кўзум қаросида мардум киби ватан қилғил.
 
📜 Шарҳ: Ҳазрат қалблари маҳбубига мурожаат этиш учун, аввало, сўз, ибора ёхуд ташбеҳ излайдилар. Инсон танасининг энг зарур ва азиз бўлган аъзоси кўз неъмати экан, улуғ шоир севимли маҳбубнинг кўзларини тасаввур этадилар. Исломий манбаларни мукаммал билган Ҳазрат Навоий Расули акрам саллоллоҳу алайҳи васалламнинг кўзлари тим қора эканлигини таъкид этароқ, бевосита ийҳом санъати билан - ҳам севимли Пайғамбаримиз алайҳиссаломга хаёлан мурожаат этадилар, ҳам ул зоти бобаракотни ўзларининг кўзлари ўрнида тасаввур қилиб, улуғлайдилар.

Дарҳақиқат, “Расулуллоҳ алайҳиссаломнинг кўзлари қораси тим қора эди”.
Мардумак – кўзнинг гавҳари. Маълумки, кўз қабул қилган тасвирлар ана шу мардумакда, гавҳаракда акс этиб туради. Фан – касб, ҳунар маъносини англатади. Улуғ шоир Расулуллоҳ саллоллоҳу алайҳи васалламга илтижо билан: “Эй қаро кўзли Расулуллоҳ, кўзларимдек азизим, Сизни тушларимда кўрай, кўзларим мардуми ичида доимо сиймонгиз акс этиб турсин, менинг кўзларим мардуми бўлишингиз бир ҳунардек такрор-такрор бўлсин. Ватан – тарк этиб бўлмайдиган маскан, Кўзим мардумини фақатгина Сизнинг аксингиз эгалласин, ё Расулуллоҳ, бу ватанга бошқа ҳеч ким кирмасин”, демоқдалар.  

Филология фанлари доктори, профессор Дилором Салоҳий

┄┄┄┄┄❅┄┄┄┄┄
📚 KУНЛИК ҲАДИС

#Ҳадис_916

ДУНЁ ЛАЪНАТЛАНГАНДИР

 قَالَ: حَدَّثَنَا عَبْدُ الرَّحْمَنِ بْنُ ثَابِتِ بْنِ ثَوْبَانَ، قَالَ: سَمِعْتُ عَطَاءَ بْنَ قُرَّةَ، قَالَ: سَمِعْتُ عَبْدَ اللَّهِ بْنَ ضَمْرَةَ، قَالَ: سَمِعْتُ أَبَا هُرَيْرَةَ يَقُولُ: سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ: «إِنَّ الدُّنْيَا مَلْعُونَةٌ، مَلْعُونٌ مَا فِيهَا إِلَّا ذِكْرَ اللَّهِ وَمَا وَالَاهُ، وَعَالِمٌ أَوْ مُتَعَلِّمٌ». 
هَذَا حَدِيثٌ حَسَنٌ غَرِيبٌ

Бизга Муҳаммад ибн Ҳотим Муаддиб ҳадис айтиб берди. У деди: «Бизга Али ибн Собит ҳадис айтиб берди». У деди: «Бизга Абдурраҳмон ибн Собит ибн Савбон ҳадис айтиб берди». У деди: «Ато ибн Қуррадан эшитдим». У деди: «Абдуллоҳ ибн Зомрадан эшитдим». У деди: «Абу Ҳурайрадан эшитдим»: 
«Расулуллоҳ соллаллоҳу алайҳи васаллам: «Дунё лаънатлангандир. Унда Аллоҳнинг зикри, унга ўхшашлар, олим ва мутаъаллимдан бошқаси лаънатлангандир», дедилар». 

✍ Термизийнинг сунанида ривоят қилинади

Бу ҳасан ғариб ҳадисдир.
Ушбу ҳадиси шариф қисқа бўлишига қарамай жуда кўп маъноларга далолат қилувчидир. Унда мўмин киши бу дунёга қандай назар қилиб боқиши лозимлиги, қайси ишларни маҳкам тутиб, қайсиларидан четланиши кераклиги жуда фасоҳатли тарзда баён қилингандир.
Расулуллоҳ соллаллоҳу алайҳи васаллам “Дунё лаънатлангандир” деб марҳамат қилдилар. Яъни, дунё ва ундаги нарсалар Аллоҳдан узоқлаштирувчидир. Инсон бу дунёни истамаслиги, унинг ўткинчи лаззатлари ортидан қувмаслиги даркор. Чунки булар билан машғул бўлиб қолган кимса бора-бора қиёмат кунидаги ҳисоб китобни, жаннатни, жаҳаннамни унутиб қўйиши ва абадий ҳаётдаги Аллоҳнинг раҳматидан бебаҳра қолиши мумкин. Пайғамбаримиз соллаллоҳу алайҳи васаллам “Унда Аллоҳнинг зикри, унга ўхшашлар, олим ва мутаъаллимдан бошқаси лаънатлангандир”, дея мўмин ўз ҳаётини қандай манҳаж устига бино қилиши лозимлигини бизларга таълим бердилар. Бизларга берилган ҳаётни Аллоҳни зикр этиш ва унга олиб борувчи амаллар ила ўтказишимиз лозим экан. Бунинг ичида тоат-ибодатлар, солиҳ амаллар, тақво, гуноҳ ва маъсиятдан тийилиш кабиларнинг барчаси мужассамдир. Шундай бўлишига қарамай, илм олиш ва уни ўргатиш алоҳида зикр қилинмоқда. Бу уларнинг нақадар катта аҳамиятга экани, Аллоҳнинг ҳузурида нақадар суюклилигини билдиради.

┄┄┄┄┄❅┄┄┄┄┄
📚 KУНЛИК ҲАДИС

ШАЪБОН АЁЛЛАРНИНГ ҚАЗО РЎЗАСИ УЧУН ЯХШИ ФУРСАТ


Абу Салама айтади: Мен Оиша розияллоҳу анҳонинг шундай деганини эшитганман:
📗 "Менинг Рамазон рўзасидан қазоларим бўлар эди, лекин уларни фақат Шаъбон ойида тутиб беришга қодир бўлар эдим."
(✍ Имом Бухорий ривояти)

     Оиша розияллоҳу анҳо бу ҳадисда Рамазон ойида ҳайз каби узрлар сабабли тута олмаган рўзаларини, келаси йил Шаъбон ойидагина қазо қилишга имкон топганларини баён қилмоқдалар.
Яҳё ибн Саъид ал-Ансорий (ҳадис ровийларидан бири) бу ҳолатнинг сабабини тушунтириб, Оиша онамиз Пайғамбаримиз соллаллоҳу алайҳи васалламга хизмат қилиш билан банд бўлганларини айтган. Яъни, Оиша онамиз ҳамиша Расулуллоҳ соллаллоҳу алайҳи васалламнинг эҳтиёж ва хизматларига шай турар эдилар. Пайғамбаримизнинг барча аёллари ҳам шундай эдилар. Аллоҳ улардан рози бўлсин!
Улар ҳар доим Расулуллоҳни хурсанд қилишга ва розилигини қозонишга интилиб яшаганлар. Шу сабабли, улардан ҳеч бири Расулуллоҳдан рўза тутишга изн сўрамас эди. Чунки Пайғамбаримизнинг уларга бўлган муҳаббат ва рағбатлари сўниб қолишини истамас эдилар.
Шаъбон ойига келиб эса, Расулуллоҳ соллаллоҳу алайҳи васаллам бу ойнинг кўп қисмини рўзадор ўтказганлари учун, аёллари ҳам қазо рўзаларини тутиш учун имконият топар эдилар. Ёки Рамазонгача вақт кам қолгани боис, Пайғамбаримиздан рўза тутишга изн сўрар эдилар. Улар шариатдаги имтиёз ва енгилликдан фойдаланар эдилар. Чунки ўтган Рамазон ва келаси Рамазоннинг орасидаги ҳар қандай вақт қазо рўзалари учун муносиб ҳисобланади.

☝️ Ҳадисдан чиқадиган сабоқлар:
1.  Эрнинг ҳақлари аёлнинг баъзи ибодатларидан устун қилинади.
Бироқ, фарз ва маълум вақт билан чегараланган ибодатлар бу қоидадан мустаснодир.
2.  Аёл киши турмуш ўртоғининг хизматини биринчи ўринга қўйиши мумкин,
лекин фарз бўлган ибодатлар ўз вақтида бажарилиши шарт.
3.  Қазо рўзаларини тутиш учун бутун йил давомида имконият бор,
лекин уни кейинги Рамазонгача адо этиш лозим.

Урватуллаев Саидмаҳмудхон, ҲИМ талабаси

┄┄┄┄┄❅┄┄┄┄┄
📚 KУНЛИК ҲАДИС

ҲАДИСДАГИ "ЙИГИТЛИК"
#шарҳ

❓ САВОЛ: Ассалому алайкум! Йигитлик даврини уламоларимиз 15-32 ёшгача айтишган тўғрими? Ҳозир 18 ёшдаман ҳадисда келган ёшда бўламанми?

💬 ЖАВОБ: Ва алайкум ассалом! Ҳадиси шарифда айтилган ёшликни нимада ўтказгани ҳақида савол жавоб қилинишидан мурод муайян ёш эмас, балки умри давомида энг қувватга тўлган пайтини нимага сарфлаганидир. Валлоҳу аълам!

(https://savollar.islom.uz/s/228630)

«Зикр аҳлидан сўранг» ҳайъати

┄┄┄┄┄❅┄┄┄┄┄
📚 KУНЛИК ҲАДИС

УЙДАГИЛАРНИ БАДЪАТЛАРДАН ҚАЙТАРОЛМАДИМ
#бидъат

❓CАВОЛ: Ассалому алайкум! Аллоҳга ҳамдлар булсин мени ҳидоятга йўллаб қўйганига ҳам 3 йил бўлиб қолди, Марузалар эшитаман диний китоблар ўқийман, шунинг учун ҳозирги кундаги бидиатлар ҳақида малумотга эга бўлдим. Уйимдагилар эса бидъат, ирим сирим тарафдорлари, қачонки мен уларга бу нотўғри деб айтсам мени эшитишни ҳам ҳоҳлашмайди. Ҳаттоки сан бошқа динга ўтиб кетгансан деган сўзларни ҳам айтишди. Улар(Онам ва отамнинг онаси яни бувим)ни бу ишларидан қайтаролмаяпман, айтингчи улар қилаётган бидъат ҳирофотлар, иримларига кўз юмсам бўладими? Чунки улар мени гапиришимни заррача ҳам ҳоҳлашмаяпти ва уларга ақл ўргатиб гуноҳкор бўлиб қолишдан қўрқаман, уларга амру маруф наҳий мункар қилмасам гуноҳкор бўлмайманми? 

💬 ЖАВОБ: Ва алайкум ассалом! Шошилманг, ҳаётингизда ҳеч бўлмаса ўз оилангизни ўнглашни ҳаракатини қилинг. Бунинг учун асло шошилманг. Сиз ва сиз каби ёшларга насиҳатимиз: ҳеч бир инсон хусусан узоқ йиллик ботқоқда юрганлар сизни бир икки бор қилган насиҳатингиз билан ўзгариб қолмайди. Буни тушунинг, сиз ўзингиз ҳидоят топгунингизча қанча вақт ўтди?

Расулуллоҳ соллаллоҳу алайҳи васаллам келтирган динни инсонлар қабул қилиши учун 40 йилгача бирорта ҳам ёлғон гапирмасдан сиддиқ мақомини олдилар. Аҳдини бузмасдан содиқ деган лақабни олдилар. Қўлларидаги борини йўқ демасдан энг сахий деган лақабни олдилар. Омонатга ўта қаттиқ эътибор берганларидан амин деган лақабни олдилар. Набираликни аъло даражада жойига қўйган эдилар Абдулмуттолиб кўрмаса туролмайдиган даражага етдилар. Тижоратда содиқ бўлгандилар Хадийжа онамиз ўзларини бағишладилар, никоҳига олишларини таклиф қилдилар. Қўшничиликни аъло дажада йўлга қўйгандилар қўшниси энг ашаддий душмани бўлса ҳам кўрганда ҳайбатланиб иззатини жойига қўядиган бўлди. Силаи раҳмни аъло даражада бажарганларидан қариндош уруғлари Аллоҳ қалбини очмаганидан бошқа иймон келтирмасликларига ҳеч қандай сабаб тополмадилар ва ҳоказо.

Бизни яқинларимиз ҳам биз туфайли ҳидоят топишини хоҳласак аввало ўша камолот сифатларини ўзимизда мужассам қилишга ҳаракат қилишимиз керак. Усиз иш битмайди. Сиз асло уйдагиларга қўпол муомалада бўлманг, баҳс мунозара ҳам қилманг. Аксинча жоиз бўлган илтимосларини дилидан муҳаббат қилиб юборадиган даражада адо қилишга ҳаракат қилинг. Ўзи фосиқ фожир бўлган тақдирда ҳам сизни самимийлигингизни ҳис қила олсин. Сиз оилам деб эъзозлашингизни ҳис қилсин. Бир кун келиб сиз кутган ҳолат ҳам албатта бўлади. Улар ҳаққига ҳидоят сўраб тўхтамасдан дуолар қилинг ҳамда “Аллоҳим Сен қайси ҳолатимизга рози бўлсанг мени ўшанга муваффақ қилгин, ҳидоятга солгин” деб дуо қилишига кўниринг.

Аллоҳ таоло "Фурқон" сурасида марҳамат қилади:  

وَجَعَلْنَا بَعْضَكُمْ لِبَعْضٍ فِتْنَةً أَتَصْبِرُونَ وَكَانَ رَبُّكَ بَصِيرًا۝

20...Баъзиларингизни баъзиларингизга синов қилдик. Сабр қилармикансизлар?! Роббинг кўриб турувчи(Зот)дир.
Сабрнинг мукофоти қуйидаги “Оли Имрон” сурасидаги оятда баён қилинган. 

وَاللّهُ يُحِبُّ الصَّابِرِينَ۝ 

 146...Аллоҳ сабрлиларни севадир. 

Валлоҳу аълам!

(https://savollar.islom.uz/s/144189)

«Зикр аҳлидан сўранг» ҳайъати

┄┄┄┄┄❅┄┄┄┄┄
📚 KУНЛИК ҲАДИС

#Ҳадис_915

АЛБАТТА, СУВ ЖУНУБ БЎЛМАЙДИ

عَنِ ابْنِ عَبَّاسٍ ‏رَضِيَ اللهُ عَنْهُمَا‏ قَالَ:
اغْتَسَلَ بَعْضُ أَزْوَاجِ النَّبِيِّ ‏ﷺ‏ فِي جَفْنَةٍ فَجَاءَ ‏النَّبيُّ ‏ﷺ‏ لِيَتَوَضَّأَ مِنْهَا أَوْ يَغْتَسِلَ فَقَالَتْ لَهُ: يَا رَسُولَ اللهِ، إنِّي كُنْتُ جُنُباً ‏فَقَالَ رَسُولُ اللهِ ‏ﷺ‏: إِنَّ الْمَاءُ لَا يَجْنَبُ.
رَوَاهُ أَصْحَابُ السُّنَنِ. ‏

Ибн Аббос розияллоҳу анҳудан ривоят қилинади:

📗 «У киши: «Набий соллаллоҳу алайҳи васалламнинг завжаларидан бирлари бир катта тоғорадан ғусл қилди. Бас, Набий соллаллоҳу алайҳи васаллам ўшандан таҳорат ёки ғусл қилиш учун келдилар. У:
«Эй Аллоҳнинг Расули, мен жунуб эдим», деди. Шунда Расулуллоҳ соллаллоҳу алайҳи васаллам:
«Албатта, сув жунуб бўлмайди», дедилар».
✍ Сунан эгалари ривоят қилганлар.

📜 Шарҳ: Бу ҳадиси шарифда аёл киши ғусл учун фойдаланган сувдан қолган сув билан эркак киши таҳорат қилса бўлиши ҳақида сўз бормоқда. Ҳадиснинг лафзидан, зикр қилинган онамиз тоғоранинг ичига тушиб ғусл қилганлару кейин Пайғамбар соллаллоҳу алайҳи васаллам ўша сувни ишлатмоқчи бўлганлар, деб тушунмаслик кераклигини жумҳур уламолари таъкидлаганлар. Онамиз тоғорадаги сувдан олиб, ғуслга ишлатганлар. Албатта, шу аснода қўллари идишдаги сувга теккан бўлиши керак. Шу ва шунга ўхшаш бошқа омилларга, кўра, энди қолган сувни ишлатиб бўлмаса керак, деган фикр туғилгани учун Пайғамбаримиз соллаллоҳу алайҳи васаллам сувни ишлатмоқчи бўлганларида:

«Эй Аллоҳнинг Расули,мен жунуб эдим,» деганлар. Шунда Пайғамбаримиз соллаллоҳу алайҳи васаллам  «Албатта, сув жунуб бўлмайди» деб, ҳукмни баён қилганлар. Демак, жунуб одам теккан ёки олиб ишлатганидан қолган сув нопок бўлиб қолмайди.

Баъзи кишилар бу ҳукмни тушунмай, жунуб одам ҳеч нарсага яқин келиб бўлмайди, деб ўйлайдилар. Ўзларича турли қийинчиликлар келтириб чиқарадилар. Бундай ишлар тўғри эмаслигини ушбу ривоятдан кўриб турибмиз.

«Ҳадис ва ҳаёт» китобидан.

┄┄┄┄┄❅┄┄┄┄┄
📚 KУНЛИК ҲАДИС

ТАҲОРАТНИНГ БУЗИЛИШИ
#таҳорат

❓ САВОЛ: Ассалому алайкум! Инсон таҳорат олгач, орқа тарафдан ел келишининг ўзи таҳоратни бузилишига олиб келадими ёки орқадан ел чиқмагунга қадар таҳорат бузилмаган ҳисобланадими? Шариатимизда бунинг аниқ ҳукми келтирилган манбалар борми?


💬 ЖАВОБ: Ва алайкум ассалом! Ел келиб, заҳартанг қилиб турсаю лекин чиқмаса таҳорат бузилмайди. Аммо бундай ҳолатда намоз ўқиш макруҳ. Агар заррача бўлса ҳам чиқса таҳорат бузилади.

وَعَنْهَا عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: لَا صَلَاةَ بِحَضْرَةِ الطَّعَامِ، وَلَا هُوَ يُدَافِعُهُ الْأَخْبَثَانِ

Яна ўша кишидан (Оиша розияллоҳу анҳодан) ривоят қилинади:

📗 «Набий соллаллоҳу алайҳи васаллам:
«Таом ҳозир бўлганда намоз йўқ. Уни икки (томондаги) чиқинди қистаб турганда ҳам», дедилар».

☝️ Ушбу ҳадисдан олинадиган фойдалар:

1. Таом ҳозир бўлганда намозни кейинга суриш. Албатта, намознинг вақти чиқиб кетгунча таом еб ўтирилмайди.
2. «Заҳар танг» қилиб турган одам ҳам намоз ўқимасин.
3. Қазои ҳожати қистаб турган одам ҳам намозини кейин ўқисин.
4. Қорни дам бўлиб, ел қистаб турган одам ҳам намоз ўқимасин. Бундай ҳолларда бўшаниб олиб, янги таҳорат қилиб, кейин хотиржам намоз ўқилади. (📚 “Ҳадис ва ҳаёт” китобидан).
Валлоҳу аълам!

(https://savollar.islom.uz/s/247384)

«Зикр аҳлидан сўранг» ҳайъати

•┈┈┈┈•❈••✾••❈•┈┈┈┈•
🔸 Ибодат Масалалари 🔸

КЕЧАСИ ЁМОН ТУШ КЎРИШ
#дам_солиш

❓ САВОЛ: Ассалому алайкум! Бир танишим кечалари ёмон туш кўриб қўрқиб йиғлаб уйғонаркан. Нима қилишни маслаҳат берасизлар? Бундан қандай ҳалос бўлиш мумкин?

💬 ЖАВОБ: Ва алайкум ассалом! Эрталаб ва кечқурунда 11марта саловат кейин “Фотиҳа”, “Оятул курсий” ва 4та “Қул” билан бошланган сураларни ва охирида яна 11 марта саловат ўқиб дам солиш керак. Бу жуда кўп марта тажрибадан ўтган. Валлоҳу аълам!

(https://savollar.islom.uz/s/190688)

«Зикр аҳлидан сўранг» ҳайъати

•┈┈┈┈•❈••✾••❈•┈┈┈┈•
🔸 Ибодат Масалалари 🔸

#Ҳадис_914

ЖАННАТГА ШУНДАЙ ҚАВМЛАР КИРАДИ

عَنْ أَبِي هُرَيْرةَ رَضِيَ اللهُ عَنْهُ، عَنِ النَّبِيِّ ﷺ قَالَ:
«يَدْخُلُ الْجَنَّةَ أَقْوَامٌ أَفْئِدَتُهُمْ مِثْلُ أَفْئِدَةِ الطَّيْرِ».
رَوَاهُ مُسْلِمٌ [2840].

Абу Ҳурайра розияллоҳу анҳудан ривоят қилинади:

📗 Набий соллаллоҳу алайҳи васаллам:
«Жаннатга шундай қавмлар кирадики, уларнинг қалби қушнинг қалбига ўхшаган бўлади», дедилар».
✍️ Имом Муслим ривояти.

📜 Шарҳ: Яъни уларнинг қалблари қушнинг қалби каби юмшоқ ва мулойим бўлади. Бошқа ҳадисда: «Ҳузурингизга Яман аҳли келди. Улар энг кўнгли юмшоқ, энг қалби мулойим одамлардир», дейилган.

Баъзилар хавфсираб, қўрқиб туриш деб айтишган. Чунки жониворларнинг ичида хавфсираб, қўрқиб турадигани бу қушдир.

Аллоҳ таоло: «Шунингдек, одамлар, жониворлар ва чорва ҳайвонлари орасида ҳам ранг-баранглари бордир. Албатта Аллоҳдан бандалари орасидаги олим-билимдонлар қўрқур», деб айтган. (Фотир сураси, 35-оят).

Юқоридаги ҳадисда хавф ғолиб келган қавмни ирода қилинган. Салафларни зикр қилинганида, улардаги хавфнинг шиддатини айтилган.

Баъзилар бу ҳадисдан мақсад таваккал қилувчилар, деб айтишган.

Баъзилар эртаю кеч ризқни ғам қилишдан омонда бўлганлар назарда тутилган деб айтиб, қуйидаги ҳадисга ишора қилишган.

Умар ибн Хаттоб розияллоҳу анҳудан ривоят қилинади: «Расулуллоҳ соллаллоҳу алайҳи васаллам: «Агар сизлар Аллоҳга ҳақиқий таваккул қилганларингизда эди, худди қорни оч ҳолда кетиб, тўйган ҳолда қайтиб келадиган қуш каби ризқлантирилган бўлар эдингиз!», дедилар».

(Термизий, Насоий, имом Аҳмад, Ҳоким, Ибн Ҳиббон «Саҳиҳ»да ривоят қилган. Абу Исо Термизий: «Бу ҳадис ҳасан-саҳиҳдир», деган).

┄┄┄┄┄❅┄┄┄┄┄
📚 KУНЛИК ҲАДИС

#Эслатма

🕌 «Юнусобод Оқ-тепа» жомеъ масжиди имом-хатиби ва жамоаси номидан таъкидлаб ўтмоқчимиз. Телеграм тармоғидаги каналларимиз барчаси расмий фаолият олиб боради:

📌1. Нурли йўл (t.me/nurli_yol)
📌2. Кунлик Ҳадис (t.me/nurli_yol_hadis)
📌3. Ибодат Масалалари (t.me/nurli_yol_fiqh)
📌4. Қуръон (t.me/nurli_yol_quron)
📌5. Масжид (t.me/oqtepamasjid)

☝️ Биздаги маълумотлар фақат расмий ва текширилган манбалардан олинади. Каналларимизни бехавотир кузатиб боринг.
🌷 Бирга эканлигингиз учун ташаккур!

© Ҳурмат билан, НУРЛИ ЙЎЛ жамоаси.