⚰ Тобут келар...

Тобут келар шимоллардан, тобут келар,
Шердек йигит энди бунда нобуд келар.
Қора қозон қайнасин, деб кетган ўғлон,
Тобут келар шимоллардан, тобут келар.

Сен нишонсан, ғурбатчию ғийбатчига,
Дин айирган, тил айирган миллатчига,
Лаънат айтиб кулфат солган иллатчига,
Тобут келар шимоллардан, тобут келар.

Қарашади сенга худди бекорчи деб,
Саводи паст, авлоди паст, беорчи деб,
Қурол тутган бир жангари террорчи деб,
Тобут келар шимоллардан, тобут келар.

Қаҳратонлар ўтса ҳамки суягингдан,
Рўзғор юки тушмайди ҳеч курагингдан,
Қайси нокас пичоқ урди юрагингдан?!
Тобут келар шимоллардан, тобут келар.

Қадринг қанча, айтчи, юртдош, қадринг қанча?!
Юракда жим, пинхон ётган дардинг қанча?!
Мусофирда қолган сенинг қабринг қанча?!
Тобут келар шимоллардан, тобут келар.

Соддалигинг билиб сени гўл қилдилар,
Виждонсизлар сотиб қарам, қул қилдилар,
Қимматингни сариқ чақа пул қилдилар,
Тобут келар шимоллардан, тобут келар.

Қўйгин энди, борма, иним, у ёқларга,
Номинг суртма қора деган бўёқларга,
Сен кераксан шу она юрт тупроқларга,
Келмасин ҳеч энди тобут шимоллардан!!!

2017 й.

© Вафо Мўмин

👉 t.me/musofirlar