#oqdanqizilga

Uygʻonib koʻzguga qararkansan
boʻyningdagi oppoq dur
qonga botganin koʻrding

hayrat bilan qoʻl tekkizding
barmoqlaring qizardi
axir kechagina begard edi u
bu tong nechun
qirmizi rangda?
boʻyningdan yulqib olib
toza suvda yuvishga shoshding
dur boʻyningga maxkam chirmashgan
yechib olish edi ilojsiz
uzib tashlashga esa qiymas koʻzlaring
sen koʻchaga chiqarkansan
sharfing bilan berkitib olding
marvaridning qizil tomonin
va olazarak boqding jinsdoshlaringga
ularning bari sen kabi
yashirib qoʻyishgandi roʻmol ostiga
nomaʼlum rangli munchoqlarini
sen oppoq dur izlading -
yulqib otding yoʻlingda uchragan
har bir ayol sharfini
qip qizil
qip qizil
qip qizil!
xatto bir dona oq munchoq
koʻzga tashlanmas sira
olam toʻldi alvon rangga
qon asta tomardi
oqib tushib boʻyindan
toʻkilardi yuraklariga
toʻkilardi oq qor ustiga

keyin sen ham yechib yubording
boʻyningdan sharfni
va ketding,
ketding xotirjam.

Anif ( Nodirabegim Ibrohimova )