Madinamga xat

📨 Xushxabar

Yerda jimgina yurib osmonlar Robbiga hamd etayotganlarga salomlar bo'lsin...

Robbining rizoligini istab uyqularini harom qilganlarga salomlar bo'lsin.
Ramzon oyini kutib kun sanaganlarga salomlar bo'lsin.

Og'iz yopishimizga hali vaqt bor ekan deb soatiga qarayotganlarga salomlar bo'lsin. Allohim bu oyni sizlarga va bizlarga muborak qilsin!

Rasman: Bugundan barcha shaytonlar kishanlandi. Mo'minlar uchun zararsizlantirildi.

Jannat eshiklari ochildi. Ular bezatildi. Ro'zadorlar uchun maxsus Rayyon eshigi hozirlandi!

Endi Robbimiz va bizning oramizda yagona to'siq qoldi. Nafs! Menlik olami! Men qoldim!

Tafakkur uchun: Uyimizga insonlarni zichlab joylab chiqsak 500 kishi sig‘adi. Mahallamizga shu tartibda 1 million odamni sig'dirish mumkin.

O‘zbekistonga taxminan 10 milliard kishini sig'diraylik. Butun Yer yuziga qancha sig‘dirish mumkin? Barcha sayyoralarga qancha? Gallaktikagachi?

Shularning barini qalb olamimizga joylansa okeanga bir tomchi suv tushganchalik joyni egallaydi.

Ayni shu qalb Allohning nazargohidir. Bu oyda qilishimiz mumkin bo‘lgan eng katta ish qalbimizni poklashdir.

Albatta Alloh zikr qilinsa, qalblari titraguvchi, oyatlari tilovat etilsa, iymonlarini ziyoda qilguvchi va Robbilariga tavakkul qilguvchilargina mo'minlardir.(Anfol surasi 2-oyat)

Ayo, Allohning zikri ila qalblar orom topmasmi?( Ra'd surasi 28-oyat)

O‘shanda u o'z Robbiga sog'lom qalb ila kelmishdi.(Soffat surasi 84-oyat)

Hazrat himmat qilaylik. Dunyo tashvishlaridan charchagan qalbimizni tiriltirish uchun bizga yana bir imkon berildi. Balki so'nggi imkoniyatdir. Himmat qilaylik....

@madinamga_xat

Odamman-mi?

Soatlar kunlarni quvib umrimni qisqartirmoqda. Olgan har nafasim ajalimga yaqinlashtirmoqda. Alamlisi, yo‘lning boshidamanmi o‘rtasidami yoki oxiridaligim noma'lum. Ruhga quvvat bermaydigan amallar, kitob javonda taxlangan kitoblar faqat zararimga guvohlik bermoqda.

Qalami o‘tkir yozuvchilar, mo‘minlarni yig'lata oladigan voizlar, doimo tabbasum bilan yuradigan so‘filar ham yordam bera olmayotgandek menga.

Munofiqning qalbiga muhr uriladi. Qulflanadi. Jamoatdan uzoqlashadi. Gapi ko‘payib amali kesiladi. O‘zimga boqsam shu sifatdan boshqasini topmayman. Uzun orzular dunyoga hirsimni kuchaytirib oliy vazifamdan uzoqlashtirmoqda.

Allohning rahmatini eslatib shayton ma'siyatni ko‘zimga ziynatlamoqda. Tavba eshigining hamon ochiqligi g'aflatdan uyg'onishimga yordam bera olmayabdi.

O‘zimdan aslo rozi emasman. Ko‘chadagi daydi itning maqomi menikidan ming chandon yuqori. Rizqini yeydi. Allohga hamd aytadi. Qayta tiriladi. Tuproqqa aylanadi. Men-chi? Yoki abadiy rohat yoki abadiy azob meni muhaqqaq kutmoqda.

Taqdirdan norozi emasman. Lekin ba'zan ajiyb orzular qilaman. Saodat asrida tug'ilsam edi... Nurli shaharda. Madinada. Dunyo meni chalg'itganda Rasulim huzuriga bora olsam. Ruhiyatidan zavq olsam. Qalbimni tabibiga topshira olsam..

Sahobalar doim shunday qilishardi. Qiynoq jondan o‘tganda, dinni saqlash qiyin bo‘lib qolganda Rosululloh alayhissalom huzuriga borishardi. Ularni boshini silar edingiz.

Dunyo hayoti bir lahzaligini eslatardingiz. Sabr qiling. Sabr qiling. Sabr qiling. Jannatda bog'lar, qasrlar, xizmatchilar sizlarni kutmoqda deb dalda berardingiz. U yerda ham men bilan birga bo'lasizlar deb ularni ilhomlantirardingiz.

Ashoblaringiz huzuringizga kelganda islom nuridan bahra olardilar. Himmatlari oshib ketardi. Shu holat Hanzala roziyollohu anhu bilan sodir bo‘lgandi. Qabulingizga shikoyat qilib kelgandi.

Sizning huzuringizda qalbi yorishib, dunyodan uzilib, oxiratga intilish hissi kuchayishini, huzuringizdan chiqqach bu holati susayishini aytadi. Shunda bu ayni mo‘minning holi ekanligini aytgandingiz. Agar shu holatni doim saqlab tura olsangizlar farishtalar sizlar bilan qo‘l berib ko‘rishishadi degandiz.

Vallohi bu ulug' ne'mat. Men notavon bir kun mo‘min, boshqa kuni munofiq holidaman. Lekin sizlar yaxshi odamsizlar. Bunga iymonim komil. Siz ayni payg'ambarimiz maqtagan maqomga chiqing. Zikr bilan. Istig'for bilan. Salovat bilan.

Allohumma solli va sallim va barik alayh.

@madinamga_xat

Najot

Ba'zan hech kim seni tushunmaydi. O‘zing ham o‘zingni tushunmaysan. Yuraging siqiladi. Hech kim yoqmay qoladi. O‘zingni bu olamda begonadek his qilasan. Qandaydir kamsitilgandekmi, bilmadim.

Qalbing tirnalayotgandek. Taqdir senga kulib hazil qilayotgandek. Ishlaring o‘xshamayapti. O‘zing istagan joyda emassan. Yaxshi odam bo‘lish yo‘lidagi harakatlaring habata bo'ldi. Bariga qo‘l siltash vaqti kelgandek...

Chora izlaysan. Ozroq siqilasan. Eslaysan. Izlaysan. Shunday vaqtlarda sevimli Payg‘ambaring Muhammad sallallohu alayhi vasallam qanday yo‘l tutganini bilging keladi. Duo va namoz bilan yordam so‘raganini bilasan.

Badr g‘azoti yodingga tushadi. Islom lashkarlari ilk bor g‘animga qarshi jangga chiqqan kecha edi. Musulmonlar o‘zidan uch barobar katta qo‘shinga qarshi jang olib borishi kerak edi.

Tabiiyki, siz ham bashar farzandi edingiz, Nabiyyim. Puxta jang rejasini tuzdingiz. Eng yaqin do‘stingiz — Robbingizdan yordam so‘radingiz.

Chodiringizga kirib, uzoq duo qildingiz: "Ey Alloh, agar bu qo‘shin yengilsa, yer yuzida Senga ibodat qilguvchilar qolmaydi. Bizga g‘alaba ber", deb qattiq yolvordingiz.

Ayni shu qullik holatingiz Olamlar Robbiga yoqqan bo‘lsa, ne ajab. Sizga farishtalardan bo‘lgan qo‘shin yuborib nusrat berdiku.

Handaq g‘azotini eslaysan. Og‘ir kunlar. U vaqtda ham najot duo bo'ldi. Shahar tashqarisida mushriklarning ulkan lashkari. Shahar ichida esa vadasida turmagan yahudiylar qo‘shini xavf solib turgandi.

Siz va sahobalaringiz bir necha kunlik qamal oqibatida ochlik va charchoqdan holdan toygan edinglar. G‘alabaga bo‘lgan umid ham so‘nib borayotgandi. Eng yaxshi chorani qo‘lladingiz — mo‘minlarning yordamchisi bo‘lgan Allohga siniq qalb ila duo qildingiz.

Alloh sizni yolg‘iz tashlab qo‘ymadi. Dushman qalbiga qo‘rquv soldi. Ketidan izg‘irin shamol yubordi. G‘animlar chekinishga majbur bo‘ldi.

Imkonsiz ishlarni Robbimiz hal etgan. Hal etadi.

@madinamga_xat

Oyna

Bir kuni Payg’ambarimiz Muhammad sollallohu alayhi va sallamning oldilariga Abu Jahl kelib:
– Bani Hoshim urug’idagi hech bir odam ko‘zimga sendan xunuk ko‘rinmaydi, – dedi.
Rasul alayhissalom:
– To’g’ri aytding, – dedilar.

Shu payt hazrat Abu Bakr roziyallohu anhu kelib qoldilar va:
– Yo Rasululloh, yuzingiz quyoshdek yorqin. Bu olamda sizning yuzingizdan go‘zalroq yuzni ko‘rmadim, – dedilar.
Sarvari koinot unga ham:
– To’g’ri aytding, – deb javob qaytardilar.

Sahobalar Rasululloh sollallohu alayhi va sallamdan bu bir xil javobning hikmatini so’rashdi. Shunda u zot:
– Men Alloh jilolagan bir oynaman, menga qaragan kishi o’zini ko’radi, – deb javob berdilar.

@madinamga_xat

Maktubiy

Ey mening qalbimning nuri, ummatlaringizning bosh panohi, sevimli Payg‘ambarim Muhammad sallallohu alayhi va salam!

Qalblar ichidagi bu tuyg‘ularni so‘z bilan ifoda etish qanchalar qiyin! Men bir ojiz banda sifatida sizga yozayotgan ushbu maktubimda sizning buyukligingiz va mehribonligingizni bir bor o‘ylab, ko‘zlarim yoshga to‘lmoqda. Sizning ismingiz tilimga chiqqan har safar, qalbim boshqa dunyoga kirib, jismimni va ruhimni halovat ko'chasiga yetaklamoqda.

Xatto ummatlaringiz orasida Muhammad ismlilariga duch kelganimda badanim jimirlaydi. Men sizga bo‘lgan muhabbatimni qaysi so‘zlar bilan ifoda etishni ham bilmayman yo Rosululloh(s.a.v)

Men sizga juda ham intizorman. Bu gunohkor ko‘zlarim bilan sizning tabassumingizni, sizning muborak yuzingizni bir bor ko‘rishni orzu qilaman. Tushlarimda ham sizning muborak ovozingizni eshitishga mushtoqman. Ey Rasululloh(s.a.v), men bu ojizlik bilan sizning huzuringizga borishni, arz-dodimni, ummatlaringiz holidan shikoyatimni aytishni xohlayman. Ammo o‘zimdagi gunohlarimning og‘irligidan sizga shikoyat qilishga ham uyalaman, Habibim.

Men o‘zimni sizning ummatlaringiz orasida arzimas bir parcha deb his qilsamda, qalbimda bir shirin umid bor: sizning mehribonligingiz va shafoatingiz! Siz bir umr ummatlaringizni o‘ylab yig‘lagansiz, duo qilgansiz, hatto og‘ir kunlaringizda ham bizni eslab, biz uchun Allohdan rahmat so‘ragansiz.

Ey Payg‘ambarim Muhammad sallallahu alayhi va sallam, men sizning yo‘lingizdan borishni istayman. Ammo, dunyoning mayda-chuyda sinovlari meni chalg‘itmoqda. Bu gunohlarimni qalbimni kuydirayotgan olovdek his qilyapman. Sizning huzuringizga qanday yuz bilan boraman yo, Rosululloh? Lekin, men bilaman, siz shunday buyuk va mehribon insonsizki, sizning huzuringizda bizga joy bor.

Ey Rasululloh(s.a.v), qachonki men siz kabi yaxshi inson bo‘lishga harakat qilsam, qalbimda bir umid paydo bo‘ladi. Sizni bir bor ko‘rish, muborak ovozingizni eshitish, siz bilan suhbatlashish – bu mening eng ulkan orzumdir. Allohdan iltijo qilaman: meni sizning yoningizga yaqinlashtirsin va jannatda sizning muborak yoningizda bo‘lishni nasib etsin.

Gunohkor bir banda sifatida sizni sevaman, ey Rasululloh(s.a.v)! Bu maktub orqali qalbimdagi muhabbatni sizga yetkazishga harakat qilyapman. Ammo qalam bilan buni ifodalab berishga ojizlik qilmoqdaman.
Umid qilamanki, bir kun kelib, Alloh taolo bu tilaklarimni qabul qiladi. Sizni sevaman. Ey, Payg‘ambarim Muhammad sallallohu alayhi va sallam sizning shafoatingizga muhtojman.
〰️〰️〰️〰️〰️〰️〰️〰️〰️
والسلام على رسول الله، وعلى آله وصحبه أجمعين


❤️Kanal kuzatuvchisidan)

@madinamga_xat

Shafoat

Tasavvur qiling. Alloh taolo Ma'orij surasida uzunligi 50 ming yilga teng bo‘lishi xabarini bergan kun keldi. Qiyomat kuni. Har kim o‘zi bilan ovvora. Nafsiy, nafsiy deb nadomat chekmoqda. U yerda men ham yuribman. Siz ham bor. Va yana boshqa tanishlaringiz...

Navbatini kutmoqda har kim. Qani kelmasa edi mening galim. Qani endi tuproqqa aylansam degan hasratlarga to‘ldi Mahshar maydoni. Nihoyat navbatingiz keldi. Katta daftarga o‘xshash narsa keltirishdi. U yerga barini yozishibdi. Tavba qiinmagan gunohlarga to‘la edi u.

Robbingiz qarshidasiz. Hijolat teriga g'arq bo‘ldingiz. Xotirangiz zaif bo‘lsa ham negadir dunyo hovlisida qilgan har ishingiz bir-bir ko‘z oldingizda o‘tmoqda.

Bitta–bitta so‘rab olishyabdi, hisobini sizdan bandalar. Afsus. Mezonda yomon amallar bosib ketdi. Bu yog‘i jahannam bo‘ladi joyingiz chog‘i...

To‘xtang. Hali umid borga o‘xshaydi. Kimdir ishga aralashyabdi. Sizning yoningizni olmoqda. Kim ekan bu nur yuzli inson. Rosulullohning o‘zlari-ku) Axir, bu butun umr siz sog'inib o‘tgan usha zotku. Ayni vaqtida keldilar.

Qarang, sizni maqtamoqdalar. Hech kimga ko‘rsatmay tasbehchangizda aytgan salovatlaringiz haqida gapirmoqdalar. Hayotingizni sunnat ustiga qurganingizni, jamoatda bardavom bo‘lganingizni, dardlaringizni u zotga g‘oibona aytib yig‘laganingizni aytmoqda.

"Yosh bola qariyalarga o‘xshamasangchi"- deyishganda ham, sizga "Zamondan orqada qolib ketyabsan"- deb odamlar tanbeh bergan vaqtlarida ham Rasululloh sallolohu alayhi vasallam ko‘rsatmalaridan chiqmaganingizdan faxrlanmoqdalar.

Alloh mehribon. Suyukli bandasi iltimosini yerda qoldirmadi. Sizni jannatga yo‘lladi. Haqiqattan. Naqadar baxli ummatsiz. Kiring jannatga. Bu yog'ini yoza olmayman. Dunyo hovlisidan turib janatni ta'riflashga qalamim ojiz.

Sizga jannatni sog‘inaman))

Allohumma solli va sallim a'la nabiyyina Muhammad.

@madinamga_xat

Maqom

Yer yuzidagi eng halovatli maskan masjiddir. U tomonga bosilgan qadamlar evaziga gunohlarga kafforot va'da qilingan. U yerda o'qilgan namozning darajasi uydagidan eng kamida 27 barobar ulug'dir.

Yaqinda bir do'stim masjid haqida bir fiqhiy masalani aytib bergandi. Agar birortasi "Menga dunyo harom bo'ldi"- deb qasam ichsa, u kishi qasamini buzmaslik uchun masjiddan chiqmay yashashi kerak ekan.

Chunki masjid dunyo makonlaridan emasda. Rasulimiz alayhissalom aytganlaridek masjidlar jannat bog'laridan bir bog'. Allohning bayti u.

Namozni ado qilish uchun masjidga kirarkanman doim mehrobga yaqinroq o'tirishga harakat qilaman. Chunki savoblarni farishtalar ayni shu joydan boshlab taqsimlasharkan. Mehrobga yaqinroq tursang qalbing ham boshqacha orom oladi.

Mehrobga boqib lol qolasan kishi. Xattotlar uni Qu'roni Karim oyatlari bilan ko'rkam bezashgan. Barcha mehroblarni bir jihat bog'lab turadi go'yo. Mehrob peshtoqi.

Uning o'ng tomoniga arab harflari ila Alloh deb yozilgan. Chap tomoniga esa Muhammad sallolohu alayhi vasallam deb yozilgan bo'ladi doim.

Bu dunyodagi eng muqaddas joy – mehrobning tepasi bo'ldi maqomingiz. Alloh so'zidan keyin o'qiladigan so'z siz bo'ldingiz. Eng yaxshi ota, eng mas'uliyatli boshliq, eng jasur jangchi, eng mehribon er, Allohdan eng ko'p qo'rqadigan qul siz bo'ldingiz.

Masjidul Aqsoda barcha nabiyu rasullarga imomlikka o'tgandingiz. Payg'ambarlar ichida eng buyuk maqomga chiqqandingiz o'shanda.

Eng ko'p salovat yo'llanadigan, eng ko'p seviladigan, insonlardan eng ko'pini shafoat qila oladigan yagona maqomga siz ko'tarildingiz.

Farishtalar ichida eng ulug'i Jabroil alayhissalom bo'ldi. U sizga yo'l ko'rsatib borarkan Sidratul Muntahoga yetganda to'xtadi. U yog'iga faqat siz o'ta olishingizni bildirdi.

Ayni shu payt barcha farishtalardan ham ulug' maqomga chiqdingiz. Alloh bilan parda ortida so'zlashdingiz. Ibrohim alayhissalomga berilgan Halilulloh, Muso alayhissalomga berilgan Kalomulloh maqomlari ham berildi sizga.

Jannatga eng birinchi kiradigan, uning eng oliy darajasida istiqomat qiladigan siz bo'ldingiz. Biz oshiqlar Robbimizdan ko'p narsa so'ramaymiz. Biz so'ramasakda sizga ummat qilgan Zot jannatdagi maskanlarda bizni birga qilsa kifoya. Allohumma Amiyn!

Allohumma solli a'la sayyidina Muhammad.

@madinamga_xat

O'rtacha haftada bitta, ko'pi bilan ikkita xat yozishga harakat qilaman in shaa Alloh.

Go'zal xulq.

Alloh Taolo sizning sharafingiz va maqomingizni ko'rsatish uchun mo'jizalar bilan siyladi. Buyrug'ingiz bilan oy ikki bo'lakka bo'lindi.

Barokangizdan ikki kishi uchun tayyorlangan taom o'nlab sahobalardan ortdi. Sizga muhabbat ko'rsatgan xurmo novdasi ovoz chiqarib yig'ladi.

Vallohi, bu kabi mo'jizalar berilmasada, sizning xulqingiz payg'ambarligingizni tasdiqlashga kifoya qilardi.

Hayit kuni edi. Ko'chada sahobalaringiz bilan ketarkansiz, bir chetda xomush turgan bola oldida to'xtadingiz. Undan holini so'radingiz. Jajji bola yetim qolganidan, hayitlik olmaganidan shikoyat qildi.

Siz yetimlik dardini hammadan ko'p bilardingiz. Bolani yupatdingiz. "Endi sening otang menman," dedingiz.

Bu so'zni barcha qalbi yarimlarga qarata aytgandingiz. Sizsiz yetim qolgan barcha ummatingizni yupatgandingiz ushanda.

Mo'minlar onasi Oisha roziyallohu anho onang bo'ladi, dedingiz. Go'dak qalbi shod bo'ldi. "Ota, men tuyaga minishni xohlayman," dedi jilmayib. Cho'kkaladingiz. Tizzalaringiz yerga tegdi.

Ustingizga yetimni mindirib tuya bo'ldingiz. Har ishni mukammal qilardingiz. Hatto ovozini ham o'xshatay deb "auf, auf!" deya ovoz chiqardingiz. Bu so'zlaringiz ila olamlar Robbi ummatlaringiz gunohini afv etganligi haqida aytib berishgan menga domlalar.

Sizning rahbarligingiz, yoshingiz ulug'ligi, ko'chada bo'lishingiz, yoningizda odamlar borligi – hech biri bir mo'minning qalbiga surur berishingizdan to'sib qo'ymadi. Naqadar kamtarsiza, Habibim.

Qo'shin qomondonlaridan tortib, masjid tozaligiga qarab yuradigan cho'ri ayol ham sizning e'tiboringizdan chetda qolmasdi. Qullar dasturxonida ovqatlanishdan ham tortinmas edingiz.

Rasululloh meni hammadan ko'p yaxshi ko'radi, deb quvonib yurar edi sahobalaringiz. Shungami sizdan keyin, sizning ismingiz zikr qilinganda, qo'llarini ko'ksilariga qo'ydilar. Sog'inchdan bu yurak tashqariga chiqib ketmasin deya...

Allohumma solli va sallim a'la nabiyyina Muhammad.

@madinamga_xat

Do'st haqqi

Qish qattiq kelib ko'mir olishga ham puling yetmay qolganda, bildirmasang-da o'zida borini yarmini bera oladigan do'sting borligi bu baxtdir.

Biznesing o'xshamay bankrot bo'lganingda, do'ppi tor kelib ko'chaga ham chiqishni xohlamaganingda o'zining minib turgan mashinasini sotib, "Tur birodar. Shunga ham o'ylanasanmi. Tashlab qo'ymayman seni"- deya oladigan biri bo'lishi kerak.

Ba'zi sinovlar bir kishiga og'irlik qiladi. G'amlar seni sindirib yuborishi mumkin. Hamma ustingdan kulib boqayotgandek tuyiladi go'yo. Ayni shu mahal senga tirgak bo'ladigan, qo'lini uzatib seni turg'azib qo'ya oladigan bir do'sting bo'lishi kerak.

Ma'siyat eshigi tomon yurishni boshlaganingda, jamoatda ko'rinmay qolganingda senga tanbeh bera oladigan, ko'kragingga bir mushtlab aqlingni kiritib qo'yadigan do'sting bo'lsa Allohga hamd ayt.

Shunday birodarlarga havasim keladi. Eng ko'p yoqtirganim, ular kabi bo'lishni istaganlarim saodat asrida edi. Ulardan keyin hech kim ular kabi bo'la olmadi.

Tunlarning  birida buroqqa minib, Makkadan Masjidul Aqsoga safar qildingiz. U yerdan Olamlar Robbining huzuriga ko'tarildingiz. Shul ulug' maqomda Alloh taolo namozni farz qilib berdi. Makkaga qaytdingiz. Bu xabarni birinchilardan bo'lib tasdiqlagan, shu ondan Siddiq maqomini olgan birodaringiz  Abu Bakr roziyollohu anhu edi.

Hijratga chiqar ekansiz. Uyingiz atrofini dushmanlar o'rab olgandi. Bu xavfli vaziyatda sizning yotog'ingizda  tunagan, o'z jonini fido qilishga tayyor bo'lgan birodaringiz  Ali ibn Abu Tolib roziyallohu anhu edi.

G'orda siz bilan yolg'iz qolgan, u yerdagi  kovaklarni qo'llari va oyoqlari bilan to'sib sizni zaharli ilonlardan himoya qilgan do'stingiz Abu Bakr Siddiq roziyallohu anhu edi.

Tabuk g'azotiga otlanar ekansiz 300 tuyani o'z mablag'idan jihozlab hadya qilgan, sizni mamnun qilib "Bugundan keyin Usmon nima qilsa ham, unga zarar yetmaydi"- degan xushxabarni eshitgan birodaringiz Usmon ibn Affon roziyallohu anhu edi.

Uhud g'azotida jang qattiq kechdi. Mushriklar qo'li baland kela boshladi. Qaltis vaziyatda mohir merganligi bilan sizning ko'zingizni quvnatgan " Oting ey Sa'd. Ota-onam sizga fido bo'lsin!"-degan takrorlanmas maqtovni eshitgan birodaringiz Sa'd ibn Abu Vaqqos roziyallohu anhu edi.

Siz boqiy hayotga rihlat qilganingizda bu musibatga chiday olmasdan "Kim Rasululloh sallolohu  alayhi vasallam vafot etdi desa, uning boshini chopaman!" degan birodaringiz Umar ibn Xattob roziyollohu anhu edi.

Ha birodar. Bu shaxslar mashhur  romanlardagi to'qima obrazlar emas. Ular– mubabbati qiyomatga qadar madh etiladigan qahramonlardir.

Allohumma solli a'la Sayyidina Muhammad an-Nabiyyil ummiy al-Habibil mahbub al-A'alil qodr al-Aziymil jaah va a'la alihi va sohbihi va sallim.

Biz ham shunday birodar bo'lamiz-a?
Jannatdan meni topmasang, keltirishlarini so'raysan-a?

@madinamga_xat

Maktub

Yo Nabiyim! Sizdan uzr so‘rayman. Meni kechiring. Sizga ko‘p salavotlar yetkaza olmayotganim uchun kechiring.

Sizning ko‘rsatmalaringizga amal qila olmayotganim uchun kechiring. Sizning sharafli nomingizga mos bo‘la olmayotganim uchun kechiring. Sizdan hijolatdaman.

Lekin umidim bor: ummatingiz safida turishga, bayrog‘ingiz ostida mahshar maydonida jamlanishga umidim bor.

"Qiyomatda banda yaxshi ko‘rgani bilan birga bo‘ladi," dedingiz. Biz Sizni yaxshi ko‘rdik. Sunnatingizni yaxshi ko‘rdik. Sahobalaringizni, do‘stlaringizni yaxshi ko‘rdik.

Sizdan hisob kuni haqida savol so'ragan a'robiy kabi u kun uchun tayyorlaganimiz faqat Allohga va Rasuliga muhabbatdir.

Ummatingiz haqqiga mag'firat tilab ko'p bor ko'z yosh to'kkandingiz. Bugun biz Sizni sog‘inib yig‘lamoqdamiz. Sizni rosa sog‘indim. Ko‘rgim kelmoqda.

Iltimos, tushlarimda keling. Kuttirib qo‘ydingiz-ku. Sizdan rosa ko‘p narsalarni so‘rashim kerak. Sizga iqtido qilib namoz o‘qigim kelmoqda.

Qiroatingizni eshitgim, quchog‘ingizga bosh qo‘yib yig‘lagim kelmoqda. Keyin meni yupatasiz-a? Meni shafoat qilasiz-a?

Jannat haqida aytib berasiz-a menga? U yerdagi ne'matlar, ostidan anhorlar oqib turadigan salqin so'rilar haqida aytib berasiz-a?

Do‘stlaringiz, sahobalaringiz bilan tanishtirasiz-a? Yaxshisi, ularni ham birga olib keling: Abu Bakr Siddiq roziyallohu anhu, Umar roziyallohu anhu, Usmon roziyallohu anhu, Ali roziyallohu anhuni birga keltiring. Yam-yashil maydonlarda otda sayr qilamiz.

Lekin men ot minishni bilmaymanda. Hechqisi yo‘q. Siz eng yaxshi ustozsiz. Tezda o‘rgatib qo‘yasiz. Keyin birga tahorat olamiz. Kamchiliklarimni o‘zingiz tuzatib qo‘yasiz.

Qachon kelasiz? Tushlarimda Sizni kutyapman. O‘zim ham tez orada borib qolaman yoningizga. Faqat bu dunyo ishlarigina meni to‘xtatib turibdi.

Javobini ham berib yuboring. Axir, javobsiz maktub maktub bo‘larmidi? Sizni duolarida vasila qilguvchi ummatingizdan.

Allohning izni ila bu maktub Madinaga yetkazildi deb umid qilaman🥹

@madinamga_xat

Mahzunmisiz? Unda o'qing...

Yosh qirqqa yetdi. Ruh kamol topdi. Qalb yolg‘izlikni istadi. Hiro g‘origa chiqdingiz. Bobongiz Ibrohim alayhissalomdan meros qolgan ibodatlarga g‘arq bo‘ldingiz.

Vahiy keldi. Payg‘ambarlik maqomiga ko‘tarildingiz. Sizga ilk bor iymon keltirib, tasdiqlagan Hadicha onamiz bo‘ldi.

Sizga vazifa yuklatildi: Allohning dinini Uning bandalariga yetkazish vazifasi. Bu ishga qattiq bel bog‘ladingiz. Bir on bo‘lsada sustkashlik qilmadingiz.

Maqomingizga mos sinovlar yuborildi. Qosim, Abdulloh, Ibrohim farzandlaringizni qabrga qo‘ydingiz. Barchasi yosh edi, go‘dak edi...

Musulmonlarni Makka chetiga haydadilar. Ochlik va qahatchilik avj oldi. Rafiqangiz Hadicha onamiz vafot etdilar. Ko‘p o‘tmay, amakingiz Abu Tolib ham vafot etdi. Bu yil huzun yili deb nomlandi.

Endi Makkada himoyachingiz qolmadi. Mushriklarning tazyiqi kuchaydi. Toifga bordingiz. Zayd ibn Horisa (r.a.) hamrohingiz bo‘ldi. Toifliklar da’vatni ijobat qilmadilar.

Sizni telba deya toshbo‘ron qildilar. Bosh yorildi. Kavush qonga to‘ldi. Mahzun bo‘ldingiz. Lekin hech qarg‘amadingiz.
Naqadar rahmlisiz-a, Sayyidim!

Ojiz holda yolg‘iz qolganiz uchun Robbingizga duo qildingiz. Aziym farishtalar yerga tushdilar. Toif ustiga tog‘larni qulatish uchun sizdan izn so‘radilar.

Yo‘q dedingiz. Kechirdingiz... Xuddi amakangiz Hamzani qatl qilgan Vahshiy uzr so‘raganda kechirganingiz kabi kechirdingiz. Naqadar rahmlisiz-a, Sayyidim!

Haq yo‘lida jihod qildingiz. Janglar qattiq kechdi. Dubulg‘angiz bukildi. Qilich sindi. Yuzingiz yorildi. Xandaqqa yiqilib qonga belandingiz.

Kun kelib, sizni xandaqqa yiqitganlar ham iymon keltirdi. Uzr so‘radilar. Kechirdingiz. Naqadar rahmlisiz-a, Sayyidim!

Sizning sabringiz va rahm-shafqatingiz mevasidan bugun ikki kishidan boshlangan bu dinga ikki milliarddan ortiq inson e’tiqod qilmoqda.

Siz kabi sobit bo‘la olmayotganim uchun kechiring, ya Rasululloh!

@madinamga_xat

Borsammikan...

13 yil Makkaliklarga Haq Taolodan kelgan sof dinni targ‘ib qildingiz. Allohning izni ila ko‘plari sizga ergashdilar. Bir onda o‘zgardilar. Islomga to‘liq kirdilar.

Bu din yo‘lidagi xizmatga bel bog‘ladilar. Jonlarini tikdilar. Mollarini sarf etdilar. Och qoldilar. Sizni himoya qildilar.

Mushriklar ham jim turmadi. Tazyiq kuchaydi. Xatar kattalashdi. Amr keldi. Hijrat qildingiz. Abu Bakr Siddiq hamrohingiz bo‘ldi.

Siz ikkingiz to‘xtagan Savr g‘ori hozir ham joyida. Ziyoratingizga borganlar aytadi: "Kirdik", deydilar. "Sog‘inib yig‘ladik", deydilar.

Madina yaqiniga keldingiz. Sizdan avvalroq yetib borgan sahobalar peshvoz chiqdilar. Yoqimli nashidlar kuylandi. U nashidni hozir ham mavlidda aytamiz. Tik turib aytamiz. Yig'lab-yig'lab aytamiz...

Hamma xursand edi. Ko‘p sahobalar quvonchdan ko‘ziga yosh oldi. Men ham xursandman. Endi siz namoz o‘qiganingizda ustingizga hayvonlar ichagini tashlashmaydi. Sizni majnun deb haqorat qilishmaydi. Tosh otib kavushingizni qonga to‘ldirishmaydi.

Madina ham xursand. Uning bag‘rida 10 yil da‘vat qilishingizni bilganmikan? Qiyomatgacha qolishingiznichi? Yo‘q, bilmagan. Agar bilganida, quvonchdan yorilib ketardi. O‘zini qo‘ygani joy topolmasdi. Xatto Makkaga ham maqtanardi.

Bilasizmi, hozir odamlar Amerikani orzular shahri deydi. Men va mening do‘stlarim esa Madinani Muhabbat shahri deymiz. Madina siz bilan aziz bo‘ldi. Oshiqlar shahri bo‘ldi.

Qancha oshiqlar u yerga borib muhabbatdan jon berdilar. Bu manzilga piyoda yo‘lga chiqmadilarmi? Allohga tavakkuldan boshqa hech narsasiz yetib oldi-ku.

Siz bosgan tuproqlarni, toshlarni yuzlariga surtdilar. Hayodan tahoratlarini oylab yangilamadilar. Siz namoz o‘qigan masjidingizda kunlab boshini sajdadan ko‘tarmadilar.

Sizning ravzangizdan zavq oldilar. Shungami, bir marota borgan yana bormoqchi bo‘ldi. Qayta bordi. Yana qayta bordi. Yana bordi. To‘ymadi. To‘yolmadi. Bu muattar hidlar uni doim chorladi.

Mening ham borgim kelmoqda. Lekin masofamiz olis. Piyoda borolmayman. Chipta narxi esa arzon emas. Hali yetarli mablag‘ yig‘madimda. Yetmaydi. Yo‘q, muammo pulda emas.

Muhabbat yetmas ekan. Ana, yaqinda qo'shni mahalladagi amaki velosipedda borib keldi-ku. Unda ham pul yo‘q edi. Menda ham.

Yoki birodarim Dilshod amaki-chi? U ham hozir ishsiz. Lekin juda ko‘p bordi huzuringizga. Unda ham pul yo‘q edi. Menda ham.

Yoki yozuvchi Fotih Duman asaridagi amaki-chi? U ham sizning huzuringizga borishni qattiq xohladi. Bedor bo‘lib ko‘chalarni kezdi. Allohning valiyiga yo‘liqdi. Bir onda manzilga yetdi... Unda ham pul yo‘q edi. Menda ham.

Lekin bular sizni juda yaxshi ko‘radida. Sevib qolishgan. Shungami, bu ishq chegaralarni buzdi. Sababiyat olamidan chiqib ketdi.

Men-chi? Mening ham borgim kelmoqda. Bir on yashil ravza qarshisida o‘tirsam. Arofatda shaytonga tosh otsam. Hurmo bog‘larida dam olsam. Ozroq baqiyni ziyorat qilsam. Siz yashagan uyga uzoqdan qarasam...

@madinamga_xat

Kanalga a'zo bo'lishingiz talab etilmaydi! Xatlar zavq ila yozilgan. Zavq ila o'qing. Qalbingizga ozroq taskin bersa maqsadimiz komil bo'ladi.

Har vaqt birga bo'ladigan birodarimga...

Hayot qiziq. Hayot zerikarli. Hayot shirin. Hayot mashaqqatli. Gap - dunyo hayoti haqida ketmoqda.

Ozroq nasibamizni yashaymiz. Yaxshi odam bo'lishga harakat qilamiz. Nuqsonlarga yo'l qo'yamiz. Unutamiz. E'tiborsizlik qilamiz.

Keyin qilgan amallarimiz evaziga sinovlar yuboriladi. Sabr qilamiz. Isyon qilamiz. Dunyo dardini ko'tarib yurgandek g'amgin bo'lib qolamiz. Ojizligimizni his qilamiz.

Aytay desang, yaqinlar tushunmaydi. Tushunganlar yordam bera olmaydi. Eshitadi. Aqli yetgan joyigacha maslahat beradi. Ovuntiradi. Kifoya qilmaydi.

Keyin qalbing bir najot izlaydi. Yordam beradigan birini qidiradi. Robbingni zikr qilasan. Uning Habibiga salomlar yo'llaysan. Usha eski tasbehni qo'lga olasan. Bilgan zikrlaringni takrorlaysan.

Keyin uyalasan. Ha uyalasan. Robbingdan uzoqlashib ketganing uchun uyalasan. O'pkang to'lib ketadi. Ko'zingga yosh to'ladi-yu to'kolmaysan. Yoningda odamlar borda. Hech kim yo'q bo'lsayu..

O'ylab qolasan. Shu vaqtgacha ko'p insonlar yoningdan ketganini. Seni ancha vaqtdan berib eslab, xol-ahvol so'rmaganini. Qo'y. Ularni ayblamaymiz. Ular ham sen kabi band hozir.

Yaxshi bir do'st topging keladi. Zo'r bo'lsada. Ko'ngli toza. Hikmatga boy. Tabassumli:)

Vaqt sal kechga o'xshaydi. Hay mayli. Topiladi. U bilan zo'r do'st bo'lasan. Uni sen yoqtirasan. Keyin u ham seni yoqtirib qoladi. Bu boshqacha muhabbat.

Beg'araz bo'ladi. Bardavom bo'ladi. Abadiy bo'ladi. Uzilmaydigan. Xiyonat qilinmaydigan. Vaqt uni faqat mustahkamlaydigan. To'xta. Bu do'stni qayerdan topasan. Ozroq o'yla.

Ha bildim. U Rasullulloh alayhissalom bo'ladi.

Qo'ysangchi. Sen bir oddiy notavon. U kishi bo'lsa olamlarga rahmat. Nabiy. Rasul.

Mayli. Axir ul kishim o'zlari aytgandiku sahobalariga "Men birodarlarimni sog'indim"- deb. Shu birodar sen emasmi. Men emasmi.

Kel biz ham birodarimizni sog'inaylik. Yaxshi birodar bo'laylik. Ul kishi bilan suhbat quraylik. Bilganimizcha. Eplaganimizcha.

@madinamga_xat

بِسْـــــــــــــمِ اللهِ الرَّحْمَنِ الرَّحِـــــــــــــيم