Ҳеч эътибор берасизми, табиатда ҳаммаси жойида:
• ҳеч бир эшак отлар уюрига етакчи бўлишга уринмайди;
• ҳеч бир қўнғиз асалариларга бол йиғишдан ваъз ўқимайди;
• ҳеч бир тошбақа сиртлонларнинг тез чопиш салоҳиятини муҳокама қилмайди;
• ҳеч бир капалак ўзини чумолилардан кўра меҳнаткаш ҳисоблаб, лоф урмайди;
• ҳеч бир ит арслонга ақл ўргатмайди;
• ҳеч бир дарахт ўз мевасини ўзи емайди;
• ҳеч бир гул ўзи учун ифор сочмайди;
• ҳеч бир гиёҳ ўзи ўсган ернинг нобоплигидан шикоят қилмайди...

Одамлар орасида эса ҳамма нарса пала-партиш, ҳеч ким ўз ўрнида эмас:
• номуссизлар иффатлиларга ахлоқдан ўгит беради;
• мияси тузукроқ ишламайдиган одамлар оқилларга бош бўлиш ҳаракатида;
• ўғрилар тўғриларга адолатдан баҳс этади;
• ёлғончилар ҳақгўйларга ҳақиқатдан ваъз ўқийди;
• омилар зиёлиларга ақл ўргатади;
• билмайдиганлар билгичларни пойгакда қолдиради;
• ҳеч нарса яратмаганлар яратилганларга хўжайинлик қилади...

"Ахир улар самовот ва Ер мулклари ҳақида, Аллоҳ яратган нарсалар тўғрисида ва ажаллари яқинлашиб қолган бўлиши мумкинлиги хусусида ўйламайдиларми?!" ("Аъроф" сураси, 185-оят)

Дилфуза КОМИЛ

@konspektor