Vaqt o‘tishi bilan hamma narsa o‘zgaradi. O‘zing sezmagan holatda eski odatlaringni yangilariga alishtirasan. Avval kiyib yurganlaring o‘rnini klassik kiyimlar egallaydi, bulardan boshqasi erish tuyula boshlaydi. Endi avval xayolingni egallagan axmoqona fikrlar o‘rnini o‘zingda mavjud bo‘lgan narsalarni rivojlantirish, 1 so‘mingni qanday 2 so‘m qilish haqidagi fikrlar egallaydi, g‘aroyib-a? Endi ijtimoiy tarmoqlarda yuzlab o‘qilmagan xabarlar javobsiz qolishni boshlaydi, ba'zan haftalab, ba'zan butunlay. Aslida seni ushlab turgan bir-ikki narsalarni hisobga olmasa, tarmoqlar butunlay sen uchun o‘z ahamiyatini yo‘qotadi.
O‘zingda bo‘lgan o‘zgarishlar sababli o‘zingdek fikrlamaydiganlar bilan suhbatlar sen uchun qiziq bo‘lmaydi yoki sen o‘sha suhbatdoshga shunchaki u senga umuman qiziq emasligini aytib qo‘ya qolasan. Endi seni ko‘proq oqibat va natijalar o‘ylantira boshlaydi. Atrofingda qanday shaxslar borligi haqida o‘yay boshlaysan. O‘ttizga-da kirib sevgi haqida kuyib-pishib gapirayotganlarni ko‘rib kulging qistaydi, aynan yoshi o‘ttizga qarab ketayotgan-u, ammo doim hayotidan noliydiganlardan ochiqcha irgana boshlaysan. O‘zgarasan. Endi senda soatlab instagramda reels ko‘rib o‘tirgani, mobil o‘yinlar o‘ynagani vaqt yo‘q. Endi yanada ko‘proq muvaffaqiyatga erishish uchun harakat qilasan. Endi o‘z qilgan ishlaringdan qoniqish hosil qila boshlaysan.
Hammasi o‘zgaradi.

@kitob_ombori