Yuk mashinasi avtoshlagbaumni urib o‘tib, 4-sonli UZP qurilmasining ustiga chiqib ketgan va qurilmani sindirgan.

Jizzaxda “Kamaz” yuk mashinasi temiryo‘ldagi svetoforning qizil ishorasiga bo‘ysunmasdan shlagbaumni urib o‘tib ketgan. Bu haqda Toshkent mintaqaviy temiryo‘l uzeli xabar bermoqda.

Hodisa 2024 yil 24 noyabr kuni soat 01:05 larda sodir bo‘lgan. Jizzax-Sirdaryo yo‘nalishida harakatlanib kelayotgan, Qashqadaryo viloyati raqamida bo‘lgan “Kamaz” “Dashtobod-Robot-Dashtobod-Yangiyer” bekatlari oralig‘i 32 kilometrida joylashgan temiryo‘l kesishmasida, ogohlantiruvchi qizil chiroqga bo‘ysunmasdan harakatlangan.

Oqibatda, yuk mashinasi avtoshlagbaumni urib o‘tib, 4-sonli UZP qurilmasining ustiga chiqib ketgan va qurilmani sindirgan.

Qayd etilishicha, poyezdlar harakatlanayotgan vaqtda temir yo‘l kesishmalarida avto hamda boshqa transport vositalari harakatini to‘xtatib, harakat xavfsizligini ta’minlash uchun o‘rnatilgan ushbu UZP qurilmasi, yuk va yo‘lovchi poyezdlari hamda yuzlab yo‘lovchilarning xavfsizligini ta’minlab, baxtsiz hodisaning oldini olishda juda katta o‘ringa ega hisoblanadi.