G‘ayratbek Xoldarov | Blog

Rad etilishdan qo'rqasizmi?

Tog'am bilan mashina bozorga chiqdik. Ish bor yordam berasan degandi, ho'p dedim.

Ijtimoiy tarmoqlar va xizmatlarini jamlagan leaflet(varaqa) tarqatishim kerak edi.

Qo'limga 400-700 atrofida varaqa tutqazdi. Bozordagi barcha odamga berib chiqasan dedi, ha oson ekanku deb o'yladim.

Bozorga kirdim. O'rtada turibman. Barchasi begona. Qotib qoldim. Hech nima qila olmadim.

Nimaga? Chunki qo'rqdim. Nimadan? Rad etilishdan. Har bir insonga gapirib aka buni oling deb chiqishim kerak edi. Pullik emas, oddiy narsaku berib qo'yish deb o'ylashingiz mumkin.

Ammo, odamlar har-hil. Oddiy bir bola bilan ishi yo'q. Tabiiyki qo'lida katta pul aylanadi ularni.

Bor boshqa ish qil, menga kerakmas, boshqa odamga bor. Shu kabi gaplar bo'lishi ehtimoli yuqori.

Ota-onam harakatlari va Xudo bergan rizq bilan, hech nimadan kamchilik yo'q katta bo'ldim.

Hech kimga yalinmasdim. Chunki, bunga ehtiyoj yo'q edi.

O'sha kuni o'zimdan qattiq ranjidim. Nahotki shu darajada zaif bo'lsam... tarqatishni boshladim.

Odamlar qiziqyapti. Nima tarqatyapsiz deb o'zlari so'rab kelishdi. Hayron qoldim. Rad etganlari ham bo'ldi. Qo'rquvimga qarshi turishni o'rgandim. Ishimda davom etdim...

Biz doim rad etilishdan qo'rqamiz. Shu sababli qilmoqchi bo'lgan ishlarimizni ayta olmaymiz.

Kimnidir yaxshi ko'rasan o'ziga aytolmaysan, rad etilishdan qo'rqasan. Muammoying bor hech kimga aytolmaysan, hatto yaqinlaringa ham, chunki rad etilishdan qo'rqasan.

Ba'zida hech nimani o'ylamasdan, boricha harakat qilib ko'rish kerak. Chunki, haqiqiy hayot biz o'ylagandaka qo'rquvlarga to'la emas.

@gayratbek_xoldarov

Bu hayotda baxtli bo'lishning yo'li undan ko'p narsa kutmaslikdir. Bo'lmasa qanotlari sindirilgan qushga aylanib qolasan.

Abadiymas bogʻlar, mangumas bahor,
Olov mudom yonmas, oʻchmogʻi tayin.
Yoshlik jismimizni tark aylagan chogʻ,
Yurib boʻlmas axir endi betayin.

Sezmay qolding, ana, onang qarigan,
Ancha choʻkib qoldi otangning qaddi.
Mahkam ushlagancha toʻning baridan,
Sendan madad kutib oʻsar farzanding.

Endi qoʻyib yubor oʻtmishni, unut,
Kuzga yarashmaydi bahoriy hislar.
Oyda-yilda bir bor qoʻymaydi eslab,
Xayoli qalbingdan oʻchmagan qizlar.

Oʻzingni tuproqqa qoʻymaslaridan
Ustiga tuproq tort, muhabbatni koʻm.
Shunda boshlanadi haqiqiy hayot.
Shunda roʻy beradi chinakam oʻlim...

@gayratbek_xoldarov

Duo qilsang hammasi yaxshi bo'ladi (mi?)

Hayotda qiyinchilikka uchrasak aytishadi - Duo qil

Ish topa olmayapsanmi? - Duo qil

Iymonli turmush o'rtoq izlayapsanmi? - Duo qil

Biznesing yurishmayaptimi? - Duo qil

Imtixoning keyingi xaftami? - Duo qil

Agar biz mo'jiza bo'lishini kutib, yaxshi umid va duo qilsagu, ammo hech nima o'zgarmasa yana aytamiz " Ehtimol, hali hammasi yaxshi bo'lib ketar, sabrli bo'l"

Bu yerda men duoning kuchiga ishonchsizlik bildirmayapman, ammo, umuman harakat qilmay, biror narsa yuz berishini kutish ... bu... bu shunchaki illuziya:

-Agar ish qidirayotgan bo'lsang, oldin sohangdagi bilimlaringni oshir. Sheriklar, tanishlar bilan aloqangni kuchaytir. Ish beruvchilarni "eshigini taqillat" va Duo qil.

- Agar Iymonli turmush o'rtoq izlayotgan bo'lsang, avval o'zingni gunohlardan saqla. Juftingda qanday hislatlar bo'lishini istaysan, barchasini o'zingda shakillantirishga harakat qil va Duo qil

- Agar biznesing yurmayotgan bo'lsa, muammoni top, tizimni o'zgartir, ishga olish va ishdan bo'shatish, jamoa va xodimlar bilan ishlash mahoratingni oshir va Duo qil

- Agar keyingi hafta Imtixoning bo'lsa, kuchliroq o'qi, takrorla, sun'iy imtixonlar topshir va keyin Duo qil

@gayratbek_xoldarov

Bu yo'nalishdagi faoliyatim yakunlanadi

Media sohasiga kirganimga ham salkam 3 yildan oshdi.

Ijtimoiy tarmoqlardan foydalanishni boshlaganimga esa bundan ham ko'proq.

Muvaffaqiyat Sirlari brendini yurgizishni boshlaganimdan beri anchagina narsa o'rgandim.

Ijtimoiy tarmoqlar, odamlar psixologiyasi.

Post va videolar tayyorlayman deb anchagina kitoblar o'qidim. Bular meni dunyoqarashimni o'zgartirishga yordam berdi.

Yuzim tanilmagan bo'lsa ham, videolarim orqali insonlarga yordam bera olgan bo'lsam, men uchun bundan ortiq mukofot yo'q.

Ammo...

Ammo, shuncha yil davomida bu tarmoqlardan sezilarli hech narsa o'rganmadim. O'zingiz izlanib post tayyorlab o'rganishingiz mumkin, lekin shunchaki reels ko'rib o'rganmaysiz.

Ishoning hech narsa!

Videolar ko'rasiz tilga oid, dinga, nimalarnidir o'rgatadigan videolar. O'zingizcha yangi narsa o'rganasiz.

Ammo 1 daqiqalik videoning foydasi, keyingi reels videolarni ko'rganingizdan keyin yo'qoladi. Natijada, o'rganyapman, vaqtimni bekor sarflamayapman degan illuziya bilan yuraverasiz.

Ko'p odamlarga tavsiya bergan ekanman, ijtimoiy tarmoqlarga chiqing, daromadingiz oshadi. Rivojlanasiz deb.

Adashgan ekanman. To'g'ri bugungi kunda daromadingiz sezilarli darajada oshishi mumkin. Ammo ba'zi narsalardan anchagina yiroqlashasiz.

Xususan diningizdan, o'rganayotgan bilimlaringizdan va real hayotdan.

Sizga bu boshida bilinmaydi. Ammo vaqtlar o'tgan sayin asabiy va sabrsiz bo'la boshlaysiz.

Fikr-hayolingiz like, izohlar, ko'rishlar soni bilan bog'liq bo'lib qoladi.

Men esa, real hayotga qaytishni xohlayapman. O'z ustimda ishlashga ko'proq vaqtim bo'lishi uchun.

Faqatgina ushbu telegram kanalim qoladi holos. Bu ham o'z fikrlarimni yozib borish uchungina.

Balki qachondir ijtimoiy tarmoqlarga ham qaytarman. Unda boshqacha va boshqa yo'nalishda qaytish qilamiz)

@gayratbek_xoldarov

2024 - yilda 12 ta kitob

Ushbu yilda o'qigan kitoblarim va ulardan olgan asosiy xulosalarim bilan bo'lishmoqchiman:

1. Muvaffaqiyatli insonlarning 7 ko'nikmasi - Stiven Kovi

Odamlarning gaplarini qiziqish bilan tinglash ular bilan mustahkam aloqa o'rnatishimizga yordam berishligini o'rgandim.

2. Do'st orttirish va odamlarga tasir o'tkazish - Deyl Karnegi

Odamlarning ismlarini eslab qolish kerakligini o'rgandim.

3. Ey O'glim - Ali Tantoviy

O'g'il bolalarning nafsi va ahloqini sodda usul va misollar bilan tarbiyalagan.

4. Iymon - Shayx Muhammad Sodiq Muhammas Yusuf

Islom dini bo'yicha sizni qiynayotgan barcha savollarga javob topasiz.

5. Deep Work - Kal Nyuport

Chalg'ituvchi omillardan qochib, diqqatni jamlash orqali yuqori samaradorlikka erishish haqida.

6. Eat That Frog -Brayan Treysi

Eng qiyin va muhim ishlarni birinchi qilish kerakligini o'rgandim

7. Do it Today - Darius Foroux

Ishlarni kechiktirmay o'z vaqtida qilish uchun hayotiy maslahatlar bergan

8. It ends with Us - Kolin Xuver

Hayotdagi qiyin tanlovlar va murakkab qarorlarni tasvirlab beradi

9. Noldan birga - Piter Til

Biznesda monopolyaning ahamiyati qanchalik kuchli ekanligini ko'rsatib bergan.

10. Al Kimyogar -Paulo Koelyo

O'z orzularing ortidan quvish va hayotning ma'nosini topish haqida

11. Ilm olish sirlari - Imom Zarnujiy

Ilm olishda nimalarga ko'proq e'tibor berishimiz kerakligini din va dunyo bilimlari oltin o'rtalig'ida tushuntirgan.

12. Hammasi Rasvo - Mark Manson

Umidsizlikka tushgan vaqtingda, hayotga optimistik nigoh bilan qara va qiyinchiliklarni qabul qilishni o'rgan.

@gayratbek_xoldarov

Ularni eshitmang

Yosh mutaxassissiz

Zamonaviy kasblar bo'yicha

O'zingiz xohlagan, yaxshi ko'rgan ishingiz bor

Ertalab turasiz, birorta kafega borasiz, chiroyli atmosferada MacBook'ingizni olib quloqchinni taqib ishingizga kirishasiz

Montaj, kontent, til o'rganish farqi yo'q

Muhimi, ishonavering, 50 yil oldin odamlar havas qilgan hayotda yashayapsiz

Erkinsiz

Instagram oxirgi paytlar juda ham shovqinli bo'lib qoldi

Hamma o'zinikini tiqishtirgisi, "hashamatli hayot"i bilan miyyangizni qotirmoqchi bo'ladi

Hozir sizni eng yaxshi davrlaringizdan biri

Zavqlaning

"Hashamatli hayot"ning emas, qiziqishlaringiz, rivojlanish ortidan boring

Buyam balki keladi, bir kun...

@gayratbek_xoldarov

Qarzdorlik, pul kamligi va ko'p pul topish haqida

Asosiy kanalimda ushbu muammolarni juda ham ko'p so'rashgan. Bunga biroz eslatma qilmoqchi bo'ldim.

Uyda yotib, qo'lida hech qanday hunari yo'q bo'la turib yana ko'p pul topish illuziyasi bilan yurganlar ko'p.

Ko'p pul topmoqchimisiz sohangizda zo'ri bo'ling.

• Ijtimoiy tarmoqlarga chiqing
• O'zingizni, ishingizni taniting

Bilimingizni oshiring. Mana Youtube siz uchun mutlaqo bepul platforma.

Bugungi kunda 1 mln topasizmi 10 mln topasizmi farqi yo'q, rizqingizdan oshiqchasini ololmaysiz.

Shu sababli Allohdan pul so'ramasdan, hozirgi topayotgan pulingizga baraka so'rab, tushkunlikka tushmay harakatda davom eting.

Bularning barchasi, barcha bilgan sodda haqiqatlar.

Siz buni qiyinlashtiryapsiz holos

@muvaffaqiyat_sirlari_tg

Bugun maktabni bitirgan va yoki yaqin yillarda bitiradigan uka-singillarim uchun yozmoqchiman.
(Post uzun bo'ladi)

Bu hech qanday motivatsiya yoki antimotivatsiya emas. Bu ichingdagi barcha seni qiynaydigan savollarga yechim bo'ladigan post bo'ladi in shaa Allah.

Hozir shunday paytdasan ichingda juda ham ko'p savollar. Kim bo'lsam ekan, qanday kasbni tanlay? O'qisammi yoki diplom kerak emasmi?

Pul topishim kerak. Ota-onamga, oilamga moddiy yordam berishim kerak. Chet elda o'qisammikin chunki ishlab pul topsa ham bo'larkan?

Hunaring bo'lsa ijtimoiy tarmoqlarga chiq. Daromading ko'payadi.

Kasb tanlasha qiynalayotgan bo'lsang 1 ta muhim jihatga e'tibor ber. Agar sen odamlar bilan aloqa qilishni xohlasang shunga doir kasblarni o'rganib chiq.

Agar komputerda o'tirib raqamlar bilan yolg'izlikda ishlay olsang IT va komputer bilan ishlaydigan kasblarni qidirib ko'r.

O'zi diplom kerakmi degan savolga javob, diplom emas o'sha universitetdagi 4 yil seni dunyoqarashingni o'zgartirgani kerak.

Universitet haqidagi ba'zi fikrlarni yoritib bermoqchiman. Ko'pchilik o'qitmaydi deb shikoyat qiladi. Umringni isrof qilasan deydi. Bular mutlaqo noto'g'ri.

Universitet ham maktabga o'xshaydi. Ba'zi o'qituvchilar juda ham zo'r o'tadi ba'zilarini darslari senga yoqmaydi.

Eng muhimi ushbu 4 yilda sen yana ko'p narsaga erishishing mumkin. Xohlasang qo'shimcha bilimlar ol. Qiz bola bo'lsang maktabni bitirishingga turmushga berib yuborishmaydi.

Chet elga ishlash va o'qishga kelsak, chetga borib ishlayotganlar qay darajada qiynalayotganini sen bilmaysan ham. Umuman Instagramdagi hayotga ishonma. Videolarda faqat hamma baxtli yurganini qo'yadi.

Hech kim oson ish topib oilasiga dollarlab pul jo'natayotgani yo'q. Barchasi qiyinchilik ko'radi.

Postni oxirigacha o'qidingmi yoki yo'q bilmayman. Agar o'qigan bo'lsang barchasini chuqur o'ylab ko'rish vaqti keldi.

Omad!

@gayratbek_xoldarov

Tayyor bo’ling

2017-yil.

Universitetda 2-kurs edim. Namoz sabab 2-yilga yotoqxona berishmadi — qadriyat uchun badal to’lashni o’rgandim.

Ijaraga oilali hovli topdim. Sharoiti juda og’ir, issiq suv muammo, 5 talaba bir kichik xonada, tagimiz zax, to’shakda yotardik — yashash uchun chidashni o’rgandim.

Stipendiyam 450 ming so’m. Uydagilar pul berisholmasdi. Ijara 200 ming, 3 mahal ovqatga kunlik 8 000 byudjetim bor edi — och qolmaslik uchun rejalashtirishni o’rgandim.

70-80% darslar bo’lmasdi yoki befoyda bo’lardi. Aksar kursdoshlarim gaplashib o’tirishar edi. Men esa qulog’imga narsa tiqib darslarda kitob o’qirdim — rivojlanish uchun chalg’imaslikni o’rgandim.

7 yil o’tdi. Yuqorida aytilgan va aytilmagan barcha qiyinchiliklar qolmadi, lekin olgan darslarimni hech biri yodimdan chiqmadi.

Tushundim. Haqiqiy ilm, tajribalar qattiq og’riqlardan, qiyin vaqtlarda olinar ekan, oson yoki to’kin hayotdan emas.

Rivojlanmoqchimisiz? Qiyin yo’llardan o’tasiz. Tayyor bo’ling.

Ukalaringizni rivojlantirmoqchimisiz? Qiyinroq yo’llardan yurgazing. Tayyor qiling.

©Abdulloh_shamsutdinov

@gayratbek_xoldarov

Unutilgan duolar

Kichkinaligimda namoz vaqtlari ko'rsatilib turiladigan soat bo'lardi. Orqasida islomiy savol-javoblari bilan.

O'qirdim. Yodlardim. Ammo tushunmasdim. Bular nima? Nega yodlashim kerak?

Ayniqsa Chahoriyorlar - Abu Bakr Siddiq, Hazrati Umar, Hazrati Usmon va Hazrati Ali. Bular kimlar?

Doim o'qiganimda shu savolni o'zimga berar edim. O'sha payt Allohdan so'raganman "Ey Alloh, menga bularni tanit. Ularni o'rganishimga yordam ber"...

Yillar o'tdi. Nimadir bo'ldi, tarix faniga qiziqib qoldim. O'rganyapman...7-sinf O'zbekiston tarixi Abu Bakr Siddiq, Umar, Usmon va Ali. Xalifalik davri...

U paytlar, qilgan duolarimni va bularni o'rganishni istaganimni ham eslay olmasdim

Bugun tushunib yetdim. Hech bir narsa o'z o'zidan bo'lmaydi.

Bugungi kundagi yutuqlaringiz, qachonlardir qilgan ishlaringiz samarasi.

Qachonlardir samimiylik va to'la ishonch bilan qilingan duolar samarasi

@gayratbek_xoldarov

Tugaydi

Bir joyda qotib qolding.
Rivojlanolmayapsan.

Hamma bir nimalar bilan band, sen esa o'sha o'sha.

Hamma qayerlardadir baxtli. Sen esa yolg'iz.

Yordam so'ramoqchi bo'lasan - nima yordam kerakligini tushunmaysan.

Kasal ham emassan - sog' ham.

Vaziyatni o'zgartirmoqchi bo'lasan - qo'lingdan kelmaydi.

Qiynalyapsan.

Senda ham shundaymi?

Siqilma, bu holatdan barcha o'tadi. Ishlaring o'xshamasligi bu - sinov!

Oz qoldi. Tugaydi...

Biroz dam ol. Iymoningni yangila. Sayrga chiq. Asosiysi noshukur va noumid bo'lma.

@gayratbek_xoldarov

Stress haqida

Mashinani tez haydasang mazza qilasan

Lekin tez haydalayotgan mashinada o’tirsang stressga tushasan

Stressga sabab tezlik emas

Tormozga oyog’ing yetmasligi

Yomon vaziyatni o’zi stress qilmaydi

Vaziyatda hech narsa qila olmasliging stress qiladi

Siqilasan, chunki boshqa narsa qila olmaysan

Imtihondan oldin talabalar siqiladi

Lekin, rektor kelib — sen aniq kirasan — desa siqilish qolmaydi.

Hech narsa qila olmasang ham

Yordam bera oladigan tanishing bo’lsa siqilmaysan

Tanishing Alloh bo’lsachi?

Va senga, siqilma (9:40) deb aytgan bo’lsachi?

Shunda ham stressga tushasanmi?

©Aziz Rahimov

@gayratbek_xoldarov

Orqada qolib ketasiz

Yangi til o'rganyapsiz. Yangi odamlar. Yangi atmosfera.

Diniy ilmlarni egallamoqchisiz. Atrofingizdagi barcha sizdan aqilliroq. Ko'p narsani biladi.

Siz yangi bo'lganingiz uchun uncha tushunmayapsiz. Ustozingizdan so'ragingiz kelyapti.

Ammo, g'urur qurg'ur yo'l bermayapti. Sheriklarim nima der ekan? Ustimdan kulishsachi deyapsiz.

Xato qilib qo'ysamchi? Keyin nima bo'ladi? Sharmanda bo'lsamchi?

Odamlarning tashvishi o'ziga yetarli. Hammaning o'z hayoti, muammolari bor.

Ular xato qilsa sizga qizig'i bo'lmagandek, siz ham nimanidir bilmasligingizni ularga qizig'i yo'q.

Tushunmadingizmi so'rang - so'ramasangiz o'smaysiz.

Odamlardan uyalishni bas qiling. Uyalsangiz orqada qolib ketasiz.

@gayratbek_xoldarov

Omma oldidagi "taqvodor"

Minglab o'quvchilarga dars berasan - bolalar faqat yaxshi tomoningni ko'radi.

Blog yozasan - obunachilarga faqat ijobiy hislatlaringni ko'rsatasan.

Chiroyli kiyinib, mehmonga borasan - erishgan yutuqlaring bilan maqtanasan.

Insonlar maqtaydi - o'zingni noqulay his qilasan.

Aslida kimligingni o'zing yaxshi bilasan...

Gunohlaringni ko'rsatolmaysan - berkitishga buyurilganmiz.

Kamchiliklaringni o'quvchilarga aytolmaysan - o'rnak olishi mumkin.

Qarindoshlaringa ayblaringni aytmaysan - o'rni emas.

Nima qilsam ekan deb turganingda Abu Bakr Siddiq (r.a) ning insonlar ularni maqtaganida qilgan duolari esinga tushadi:

"Yo Alloh, meni ular o'ylagandanda yaxshiroq qilgin. Ular men haqimda bilmaganlarini mag'firat qilgin"...

©Ustoz kundaligi

@gayratbek_xoldarov

Rivojlanish uchun kerak

Chet ellik odamlar bilan bilan gaplashganimda millatimni so'rashsa o'zbekman der edim.

Ruschani bilasanmi desa, yo'q desam sen o'zbeksanku nimaga rus tilini bilmaysan deyishardi.

Xuddi ularni hayolida biz rus tilini bilishga majburdek. To'g'risi bu yoqmasdi(

Ular qanchalik haq yoki nohaq bilmadim.

Ammo mana Hindlar ham bu ingiliz tili ekan deb o'rganmay qo'ymadi.( Bizni Rossiya bosib olgan bo'lsa, ularni Buyuk Biritaniya bosib olgan)

O'rganib dunyodagi gigant kompaniyalarni boshqarib kelmoqda. Millatchilik qilishmadi va bu ularga katta foyda keltirdi.

Dunyodagi eng kerakli til bo'lgan ingiliz va rus tillarini siz ham o'rganishingiz kerak.

Ko'plab kitoblar va ma'lumotlar o'zbek tiliga tarjima qilinmagan. Til bilsangiz o'sishingizga katta yordam beradi.

Tilni o'rganish millat o'laroq shart emas, ammo rivojlanish uchun kerak.

@gayratbek_xoldarov

Pul insonlarni o'zgartirmaydi, aslida kim ekanligini ko'rsatadi deyishgani rost.

Insonlar qo'liga qancha ko'p pul tushsa, shuncha boylikka qiziqishi ortadi.

Ichidagi "meni" haqiqiy yuzaga chiqa boshlaydi.

Boriga qanoat qilmay yana, yana, deya boshlashadi.

Bunday insonlardan uzoqroq yuring. Ular sizni o'z dunyolari bilan mashg'ul qilib qo'yadi.

O'zingiz ham bundaylardan bo'lmang.

Pulingiz qalbingizda emas, cho'ntagingizda bo'lsin.

@gayratbek_xoldarov