#ғазал
Менинг кўнглумки...
Менинг кўнглумки, гулнинг ғунчасидек таҳ-батаҳ қондур,
Агар юз минг баҳор ўлса, очилмоғи не имкондур.

Агар ул қоши ёсиз боғ гаштин орзу қилсам,
Кўзумга ўқдурур сарву кўнгулга ғунча пайкондур.

Баҳору боғ сайрин не қилайким, дилистонимнинг,
Юзи гул, зулфи сунбул, қомати сарви хиромондур.

Висоли лаззатидин завқ топмоғлиқ эрур душвор,
Фироқи шиддатинда йўқса жон бермаклик осондур.

Бошидин эврулур армони бирла ўлдум, эй Бобур,
Менинг наъшимни бори ул пари кўйидин айлондур.

Заҳириддин Муҳаммад Бобур ҳазратлари

@fariduddin_attor❄