🔸
lkimyogar✔
Asar haqida qisqachaAsardagi qahramon Santyago. Oddiy oilaning farzandi. Oilasi uning seminariyada o'qib ruhoniy bo'lishini istashardi, ammo u dunyo ko'rishni xohlardi. Dadasining "Faqat cho'ponlargina o'z podalarini haydab shaharma-shahar kezishlari mumkin" degan gapidan keyin o'ziga poda sotib oldi. Qo'ylarni haydab turli shaharlar bo'ylab sayohat qilishni boshladi. Sayohat davomida u doim kitob o'qirdi. Qo'ylarning junini olish uchun to'xtagan shaharda u qo'lidagi kitobni boshqasiga almashtirib olardi.
(Santyagoning kitob o'qishi asarning muhim nuqtalaridan biri)
Bir kuni tushida Misr ehromlarini va u yerda o'z xazinasini topishini ko'rdi. Tushining ta'birini bildi va unga ishondi. Insonlar unga muhtoj bo'lgandagina paydo bo'ladigan shoh Melxisedekni uchratdi. Uning maslahatiga quloq solib o'z xazinasini qidirishga qaror qildi. Bu uchun u osuda hayotidan, daromad manbayi bo'lgan qo'ylaridan voz kechdi. (Bugungi til bilan aytganda risk qildi)
Firibgarga yo'liqib bor pulidan ayrildi. Yo'qotilgan pullarning o'rnini tiklab, qaytadan qo'ylar sotib olaman, bu yo'l men uchun emas ekan degan niyatda o'sha shahardagi xrustal sotuvchining do'konida ishlay boshladi. Bu sohada tajribasiz bo'lsa ham yangiliklarga ochiqligi tufayli do'kon kengaydi, savdosi rivojlandi. (Do'kon egasiga yangilik qilishdan, zamonga moslashishdan qo'rqish kerak emasligini o'rgatdi) Do'kon egasi butun umr Hajga borishni orzu qilgan, lekin bu uchun yetarlicha pul va mablag' yig'ish haqida, do'konga ko'z-quloq bo'ladigan ishonchli odam topish haqida o'ylab hamon yo'lga chiqolmagan inson edi. U Ka'baga yetish hayotining mazmuni ekanligini va agar buni qilsa hayotda boshqa intilib tashaydigan maqsadi qolmasligidan xavotirlanardi. Santyago unga qarab bir kun xazina tomon bormagani uchun afsuslanib qolishi mumkinligini o'yladi. Cho'ponlik hayotiga qaytishdan voz kechib yo'lida davom etdi.
Ehromlarga tomon olib boradigan yo'lda ingliz hamrohga duch keldi. Ingliz tinmay har qanday toshni oltinga aylantira oladigan alkimyogarlik qudrati haqida, butun olam tilini biladigan Alkimyogar haqida gapirardi. Ingliz Alkimyogarni qidirib yo'lga chiqqandi. Ammo Alkimyogarga birinchi bo'lib ingliz emas Santyago duch keldi. Buning sababini so'raganda Alkimyogar unga "Chunki u sen o'z yo'lingdan boryapsan. O'z yo'lidan borayotgan odamga esa butun borliq ko'maklashashadi" deb javob berdi.
Santyago oazisda nafaqat Alkimyogarni, balki Fotimani ham uchratdi. Uning qarshisida ikkita yo'l turardi: Alkimyogar bilan ketib o'z xazinasini topish, yoki Fotima bilan qolib u bilan oila qurish. Santyago Fotima uchun barchasidan voz kechishga rozi edi. Ammo Fotima: "Agar men yo'lingning bir bo'lagi bo'lsam, sen qachondir, albatta oldimga qaytib kelasan" deb uni ketishga va orzularidan voz kechmaslikka undadi.
Santyago bu yerga boshqa kelolmasligi mumkinligidan qo'rqar, ammo haqiqiy muhabbat insonni orzularidan ayirmasligini,aksincha, insonni qaytadan kashf qilib orzulariga yana bir odim yaqinlashtirishi haqida bilmasdi.
Santyago Alkimyogar bilan ehromlar tomon yo'lga chiqdi. Alkimyogardan ko'p narsalarni o'rgandi.
Asar so'nggida Santyago ehromlargacha yetib bordi va xazinasini topdi. Qayerdan topgani sir bo'la qolsin. Bu sizni mutolaaga undasa, ajab emas.
✔
XulosamAsardan ko'p anglashlar oldim. Nimaga Alkimyogar deb nomlanganini ham tushungandekman. Alkimyogarlik bu faqatgina har qanday metallni oltinga aylantirish emas. Asl alkimyogarlik-qalbni sayqallash, unga jilov berish, olamda o'z yo'lini topish va undan borish, boy berishlardan, muvaffaqiyatsizliklardan qo'rqmaslik. Qalbni arzon metalldan qimmatbaho oltinga aylantirish.
❔Cho'ponlar ko'p edi. Lekin nimaga xazina Santyagoga nasib qildi? Nimaga Alkimyogar uni telbalarcha qidirayotgan inglizga emas Santyagoga duch keldi? Chunki Santyago mol-davlat, boylik ortidan emas o'z orzulari orqasidan borayotgan edi. Unga dunyo bo'ylab sayohat qilish, o'zligini anglash muhim edi.
Yana shunday tuyuldiki, asarda islomiy ta'limotlarga nisbatan iliqlik bor.
Albatta, o'qing.
#kitob
#mutolaa
@aynurriza
